ឯកឧត្តម កើត ឆែ និងឯកឧត្តម ចាយ ច័ន្ទតារាវណ្ណ អញ្ជើញបើក « វគ្គបណ្តុះបណ្តាលស្តីពីការដោះស្រាយវិវាទក្រៅប្រព័ន្ធតុលាការ »
ភ្នំពេញ៖ ឯកឧត្តម កើត ឆែ អភិបាលរង នៃគណៈអភិបាលរាជធានីភ្នំពេញ តំណាងឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងឯកឧត្តម ចាយ ច័ន្ទតារាវណ្ណ សមាជិកឧត្តមក្រុមប្រឹក្សានៃអង្គចៅក្រម នាព្រឹកថ្ងៃពុធ ទី០១ ខែវិច្ឆិកា ឆ្នាំ២០២៣ បានអញ្ជើញជាអធិបតីក្នុងពិធីបើក « វគ្គបណ្តុះបណ្តាលស្តីពីការដោះស្រាយវិវាទក្រៅប្រព័ន្ធតុលាការ » នៅសាលប្រជុំ នៃសាលារាជធានីភ្នំពេញ។
ឆ្លៀតក្នុងឱកាសនេះ ឯកឧត្តមអភិបាលរងរាជធានី បានថ្លែងអំណរគុណយ៉ាងជ្រាលជ្រៅដល់ ឯកឧត្តម ចាយ ច័ន្ទតារាវណ្ណ សមាជិកឧត្តមក្រុមប្រឹក្សានៃអង្គចៅក្រម, លោកស្រីមេធាវី ខៀវ សុខា ប្រធានក្រុមមេធាវី អេស ឌី អាយ អន្តរជាតិ, លោកមេធាវី ឈិត វិនា សមាជិកក្រុមមេធាវី អេស ឌី អាយ អន្តរជាតិ និងលោក-លោកស្រីប្រតិភូអមដំណើរទាំងអស់ ដែលបានចំណាយពេលវេលាដ៏មានតម្លៃ ចូលរួមចែករំលែកនូវចំណេះដឹងលើទិដ្ឋភាពច្បាប់ និងវិធីសាស្ត្រក្នុងការដោះស្រាយវិវាទក្រៅប្រព័ន្ធតុលាការ ដែលនេះ គឺជាការរួមចំណែកក្នុងការកសាងមូលធនមនុស្ស សម្រាប់បុគ្គលិក-មន្ត្រីរាជការ នៅរដ្ឋបាលរាជធានី-ខណ្ឌ-សង្កាត់ លើការអនុវត្តការងារដោះស្រាយ និងសម្របសម្រួលវិវាទនៅមូលដ្ឋាន ឱ្យកាន់តែមានប្រសិទ្ធភាព និងប្រសិទ្ធផលខ្ពស់។
លើសពីនេះ ឯកឧត្តមអភិបាលរងរាជធានី សូមជូនពរឱ្យដំណើរការនៃវគ្គបណ្តុះបណ្តាល ដ៏មានសារៈសំខាន់នេះ ទទួលបានជោគជ័យតាមការគ្រោងទុក និងស្នើសិក្ខាកាមទាំងអស់ត្រូវយកចិត្តទុកដាក់ចូលរួមឱ្យបានពេលលេញ និងខិតខំត្រងត្រាប់ទទួលនូវចំណេះដឹង និងបទពិសោធន៍នានា តាមរយៈការធ្វើបទបង្ហាញរបស់ក្រុមគ្រូឧទ្ទេស ដើម្បីយកទៅអនុវត្តជាក់ស្តែង និងបំពេញការងារជួយដល់ប្រជាពលរដ្ឋនៅមូលដ្ឋានរៀងៗខ្លួនឱ្យកាន់តែប្រសើរបន្ថែមទៀត ៕
