ថវិកា ស្បៀងអាហារ និងសម្ភារៈ ជាអំណោយរបស់សម្តេចធិបតី និងលោកជំទាវ ត្រូវបានប្រគល់ជូនអតីតគ្រួសារយុទ្ធជន ៧គ្រួសារ ជួបការលំបាកជីវភាព នៅស្រុករលាប្អៀរ

ភ្នំពេញ៖ ឧត្តមសេនីយ៍ត្រី ហ៊ូ ចាន់ដារ៉ា នាយកសាលាពលទាហាន យោធភូមិភាគពិសេស នៅថ្ងៃទី១ ខែវិច្ឆិកា ឆ្នាំ២០២៣ បានអញ្ជើញគ្រួសារអតីតយុទ្ធជនចំនួន ០៧គ្រួសារ ដែលមានប្តីធ្លាប់បម្រើការងារនៅក្នុងសាលាពលទាហាន យោធភូមិភាគពិសេស ហើយត្រូវទទួលមរណៈភាព បច្ចុប្បន្នជួបការលំបាកផ្នែកជីវភាពរស់នៅ មកទទួលយកអំណោយថវិកា ស្បៀងអាហារ ដែលជាអំណោយរបស់សម្តេចមហាបវរធិបតី ហ៊ុន ម៉ាណែត និងលោកជំទាវ ពេជ ចន្ទមុន្នី ក្នុងមួយគ្រួសារៗទទួលបាន អង្ករ០១ការុង, មីជាតិ០១កេស, ទឹកត្រី០១យួរ, ទឹកស៊ីអ៊ីវ ០១យួរ និងថវិកាចំនួន ៥០,០០០រៀល ។

ក្នុងឱកាសនោះផងដែរឯកឧត្តម ឧត្តមសេនីយ៍ត្រី ហ៊ូ ចាន់ដារ៉ា នាយកសាលាពលទាហាន យោធភូមិភាគពិសេស បានពាំនាំប្រសាសន៍ផ្តាំផ្ញើសួរសុខទុក្ខដល់បងប្អូនទាំងអស់ដែលធ្លាប់មានគុណបំណាច់ជាមួយជាតិមាតុភូមិពីសំណាក់ប្រមុខរាជរដ្ឋាភិបាល ថ្វីត្បិតតែអំណោយតិចតួចក៏ពិតមែន ប៉ុន្តែអាចឱ្យបងប្អូនដោះស្រាយជីវភាពបានមួយរយៈផងដែរ។

ចុងក្រោយតំណាងគ្រួសារទាំង ០៧គ្រួសារ បានថ្លែងអំណរគុណដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ពេជ ចន្ទមុន្នី ដែលជានិច្ចជាកាលទោះកាលៈទេសៈណាក៏ដោយ សម្តេចតែងតែជួយដោះស្រាយរាល់ទុក្ខលំបាករបស់ប្រជាពលរដ្ឋ និងសូមគោរពជូនពរ សម្តេចមហាបវរធិបតី ហ៊ុន ម៉ាណែត និងលោកជំទាវ ពេជ ចន្ទមុន្នី ជួបប្រទៈពុទ្ធពរទាំង០៤ប្រការ និងមានអាយុយឺនយូរ ប្រាជ្ញាវាងវៃ ដើម្បីដឹកនាំប្រទេសជាតិ ឱ្យសម្បូររុងរឿងនាថ្ងៃអនាគត ៕