អភិបាលខេត្តតាកែវ ឯកភាពតាមការស្នើសុំរបស់ពលរដ្ឋ២គ្រួសារ ដែលសង់របងចូលលើភ្លឺភ្លោះខ្នងប្រឡាយទឹករបស់រដ្ឋ នៅឃុំស្រង៉ែ ស្រុកទ្រាំង ឱ្យរុះរើចេញទុករយះពេល ១ខែ
ភ្នំពេញ៖ នៅក្នុងកិច្ចប្រជុំសម្របសម្រួលរុះរើរបងរបស់ពលរដ្ឋ ២គ្រួសារ ឈ្មោះ សូ ប៊ុនថេន និងឈ្មោះ អ៊ុក ស្រីនូ ដែលបានសាងសង់របងលើភ្លឺភ្លោះប្រឡាយទឹករបស់រដ្ឋ នៅចំណុចភូមិស្វាយអំពារ ឃុំស្រង៉ែ ស្រុកទ្រាំង នាព្រឹកថ្ងៃពុធ ទី០១ ខែវច្ឆិកា ឆ្នាំ២០២៣ ឯកឧត្តម អ៊ូច ភា អភិបាលខេត្តតាកែវ បានឯកភាពតាមការស្នើសុំរបស់បងប្អូនប្រជាពលរដ្ឋទាំង២គ្រួសារខាងលើ ដោយទុករយៈពេល ១ខែ ដើម្បីធ្វើការរុះរើរបងសំណង់រឹងមាំនេះចេញពីភ្លឺភ្លោះដែលជាប្រឡាយទឹករបស់រដ្ឋ។
ឯកឧត្តម អ៊ូច ភា អភិបាលខេត្ត បានមានប្រសាសន៍ថា ម្ចាស់សំណង់ទាំងពីរបានឯកភាពរុះរើរបងចេញទៅតាមព្រំដីដែលបានកំណត់ និងបានឯកភាពរក្សាទុកដី ០,៥ម៉ែត្រ ពីជញ្ជាំងផ្ទះជូនឈ្មោះ សូ ប៊ុនថេន ហើយម្ចាស់សំណង់ទាំងពីរក៏បានឯកភាពគ្នាផងដែរ រយៈពេល១ខែ នឹងរុះរើសំណង់របងនេះចេញ ដោយឈរលើគោលនយោបាយឈ្នះៗទាំងអស់គ្នា។
បន្ថែមពីនេះដែរ ឯកឧត្តមអភិបាលខេត្ត ក៏អំពាវនាវដល់បងប្អូនប្រជាពលរដ្ឋទាំងអស់ សូមកុំសាងសង់សំណង់រឹងមាំណាមួយ ប៉ះពាល់លើដីចំណីផ្លូវ ឬប្រឡាយទឹក ដែលសម្បត្តិរបស់រដ្ឋ ប្រសិនរដ្ឋត្រូវការអភិវឌ្ឍន៍ គឺប្រាកដជាមានផលប៉ះពាល់ដល់បងប្អូន ជំនាន់ក្រោយៗ ជាក់ជាមិនខាន ដូច្នោះមុនបងប្អូន ប្រជាពលរដ្ឋសាងសង់សំណង់អ្វីមួយ ត្រូវមកសុំច្បាប់អាជ្ញាធរ និងមន្ទីរជំនាញជាមុនសិន មុននឹងសាងសង់សំណង់នានា ដើម្បីធាបាននូវសុវត្ថិភាព សោភ័ណភាព ស្របតាមបច្ចេកទេសសំណង់ និងមានភាពស្របច្បាប់ដែលបានចែងផងដែរ ៕
