លោកជំទាវកិត្តិបណ្ឌិត អ៊ឹង កន្ថាផាវី អញ្ជើញចូលរួមវេទិកា លើកទី៣ ស្តីពីការអភិវឌ្ឍស្រ្តី និងកិច្ចសហប្រតិបត្តិការអាស៊ី-អាហ្វីក នៅទីក្រុងហុងកុង

ភ្នំពេញ៖ កាលពីថ្ងៃទី៣១ ខែតុលា ឆ្នាំ២០២៣ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានអញ្ជើញចូលរួមវេទិកា លើកទី៣ ស្តីពីការអភិវឌ្ឍស្រ្តី និងកិច្ចសហប្រតិបត្តិការអាស៊ី-អាហ្វីក “3rd Asian-African Women’s Development and Cooperation Forum” នៅទីក្រុងហុងកុង សាធារណៈរដ្ឋប្រជាមានិតចិន។

នៅក្នុងវេទិកានោះ លោកជំទាវកិត្តិបណ្ឌិត ទទួលបានការអញ្ជើញឱ្យចែករំលែកអំពីកិច្ចខិតខំប្រឹងរបស់រាជរដ្ឋាភិបាល និងមេរៀនបទពិសោធន៍របស់កម្ពុជា នៅក្នុងការលើកកម្ពស់ស្រ្តី ក្នុងកិច្ចអភិវឌ្ឍន៍ និងវិធានគំាទ្រសិទ្ធិស្រ្តី ក្រោមស្មារតីនៃគំនិតផ្តួចផ្តើមខ្សែក្រវាត់និងផ្លូវ។

នៅក្នុងនោះ លោកជំទាវកិត្តិបណ្ឌិត ក៏បានលើក ឡើងអំពីអភិក្រមឆ្ពោះទៅមុខរបស់កម្ពុជា ក្នុងការធ្វើបរិវត្តកម្មយេនឌ័រ តាមរយៈការធ្វើស្ថាប័នភារូបនីកម្ម, ការរៀបចំថវិកាឆ្លើយតបយេនឌ័រ និងការពង្រឹងប្រព័ន្ធតាមដាននិងវាយតម្លៃលើការងារយេនឌ័រជាដើម។ វិស័យអាទិភាព រួមមាន៖ ១. ការបង្កើនភាពអង់អាចដល់ស្រ្តីក្នុងសេដ្ឋកិច្ចឌីជីថល, សេដ្ឋកិច្ចដែលគិតគូរសុខុមាលភាព និងសេដ្ឋកិច្ចបៃតង, ២.ពន្លឿនបរិយាបន្នអភិបាលកិច្ច និងភាពជាអ្នកដឹកនាំ, ៣. ការបន្តលើកកម្ពស់តម្លៃស្រ្តី និងទប់ស្កាត់អំពើហិង្សាលើស្រ្តី, ៤. ចូលរួមក្នុងការអភិវឌ្ឍកម្មវិធីគាំពារសង្គមដែលឆ្លើយតបនឹងយេនឌ័រ និងការសម្រេចការគ្របដណ្តប់សុខភាពសកល, ៥. លើកកម្ពស់ការផ្លាស់ប្តូរគ្នាទៅវិញរវាងប្រជាជនជាមួយប្រជាជាតិផ្សេងទៀត (People to People Exchanges) ព្រមទាំងភាពជាដៃគូនិងកិច្ចសហការក្នុងតំបន់និងអន្តរជាតិ លើការលើកកម្ពស់សមភាពយេនឌ័រ។

នៅក្នុងដំណើរបេសកកម្មនោះ, នៅថ្ងៃទី១ ខែវិច្ឆិកា ឆ្នាំ២០២៣ លោកជំទាវកិត្តិបណ្ឌិត ក៏បានអញ្ជើញចូលរួម នៅក្នុងដំណើរទស្សនកិច្ច នៅក្នុងវិមានសភារបស់ក្រុងហុងកុងផងដែរ ៕