ទំហំពាណិជ្ជកម្មកម្ពុជា-អន្តរជាតិ បន្តធ្លាក់ចុះ១២,៥ភាគរយ គិតត្រឹមបំណាច់ខែកញ្ញា
ភ្នំពេញ៖ យោងតាមរបាយការណ៍ពីក្រសួងពាណិជ្ជកម្មកម្ពុជា បានបញ្ជាក់ឱ្យដឹងថា អស់ពេល៩ខែមកនេះ ទំហំពាណិជ្ចកម្មកម្ពុជាជាមួយបណ្តាប្រទេសជុំវិញពិភពលោក សម្រេចបានក្នុងទំហំជាង៣៥ពាន់លានដុល្លារ ចំនួននេះធ្លាក់ចុះអស់១២,៥ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។
បើតាមរបាយការណ៍ដដែល ចាប់ពីខែមករាដល់ខែកញ្ញា កម្ពុជានាំចេញទំនិញទៅផ្សារអន្តរជាតិគិតជាទឹកប្រាក់ជិត១៧ពាន់លានដុល្លារធ្លាក់ចុះ០,៨ភាគរយ បើធៀបនឹងរយៈពេលដូចគ្នាកាលពីឆ្នាំ២០២២ ដែលកាលនោះសម្រេចបានជាង១៧ពាន់លានដុល្លារ។
ចំណែកការនាំចូលពីបរទេសមកវិញក៏មានការធ្លាក់ចុះដូចគ្នាដែរ ពោលគឺ មានទឹកប្រាក់ជាង១៨ពាន់លានដុល្លារ ធ្លាក់ចុះ៥,៩ភាគរយ ធៀបនឹងឆ្នាំ២០២២ សម្រេចបានជាង១៩ពាន់លានដុល្លារ។
តួលេខនេះក៏បានឱ្យដឹងទៀតថា ទំហំនាំចេញ និងនាំចូលទំនិញរវាងប្រទេសជាដៃគូពាណិជ្ជកម្មមួយផ្នែកធំ ក៏ធ្លាក់ចុះដូចគ្នា ខណៈមានប្រទេសមួយចំនួនទៀតដែលរបាយការណ៍បញ្ជាក់ថា ទំហំពាណិជ្ជកម្មកើនឡើង។
ជាក់ស្តែង ទីផ្សារអាម៉េរិកមានទឹកប្រាក់ជិត៧ពាន់លានដុល្លារ ធ្លាក់ចុះ២ភាគរយ ទីផ្សារវៀតណាមជាង២ពាន់លានដុល្លារ កើនឡើង៣០,៧ភាគរយ ទីផ្សារចិនជាង១ពាន់លានដុល្លារ កើនឡើង១៨ភាគរយ និងទីផ្សារជប៉ុនជិត៩០០លានដុល្លារ ធ្លាក់ចុះ១,៣ភាគរយ។ ទោះបីទំហំពាណិជ្ជកម្មជាមួយបណ្តាប្រទេសដៃគូសំខាន់ៗមួយចំនួនថយចុះ ក៏ប៉ុន្តែ ប្រទេសចិន នៅតែជាប្រទេសដៃគូពាណិជ្ជកម្មសំខាន់របស់កម្ពុជា។
គួរជម្រាបថា ក្នុងឆ្នាំ២០២២ ទំហំពាណិជ្ជកម្មអន្តរជាតិកម្ពុជា មានជាង៥៥ពាន់លានដុល្លារអាម៉េរិក ក្នុងនោះការនាំចេញកើនឡើងដល់១៨,៧ភាគរយធៀបនឹងឆ្នាំមុន ស្របពេលដែលការនាំចូលកើនឡើង៤,២ភាគរយ។ របាយការណ៍ដដែលនេះបានឱ្យដឹងដែរថា ការនាំចេញទំនិញសំខាន់ៗមានដូចជា៖ សម្លៀកបំពាក់ ផលិតផលកាត់ដេរផ្សេងៗ ស្បែកជើង គ្រឿងបង្គុំអគ្គិសនី ទោចក្រយាន កៅស៊ូ និងអង្ករ។ ហើយទីផ្សារធំៗរួមមាន៖ សហរដ្ឋអាម៉េរិក សហភាពអឺរ៉ុប ចិន ជប៉ុន និងកាណាដា ខណៈទំនិញនាំចូលសម្រាប់បម្រើតម្រូវការក្នុងស្រុកសំខាន់ៗមានដូចជា៖ វត្ថុធាតុដើម សម្រាប់វិស័យកាត់ដេរ ប្រេងឥន្ធនៈ សម្ភារ និងបរិក្ខារសំណង់ យានយន្តម្ហូបអាហារ និងភេសជ្ជៈ ដែលនាំចូលមកពីប្រទេសសំខាន់ៗដូចជា ចិន វៀតណាម ថៃ សិង្ហបុរី និងឥណ្ឌូណេស៊ី៕
