រដ្ឋបាលខេត្តតាកែវ ប្រកាសពត៌មានស្តីពីកិច្ចប្រជុំសម្របសម្រួលជាមួយប្រជាលរដ្ឋឱ្យរុះរេីរបងចេញពីភ្លឺភ្លោះដែលជាកម្មសិទ្ធរបស់រដ្ឋ
ភ្នំពេញ៖ រដ្ឋបាលខេត្តតាកែវ មានកិត្តិយសសូមជម្រាបជូនបងប្អូនប្រជាពលរដ្ឋក៏ដូចជាសាធារណៈមតិជ្រាបថា៖ ក្រោយពី ទទួលរបាយការណ៍ពីអាជ្ញាធរមូលដ្ឋាន និងមានការតវ៉ាពីប្រជាពលរដ្ឋពីការសាងសង់របងថ្មរំលោភលើភ្លឺភ្លោះដែលជា កម្មសិទ្ធរបស់រដ្ឋ ស្ថិតក្នុងភូមិស្វាយអំពារ ឃុំស្រង៉ែ ស្រុកទ្រាំង ខេត្តតាកែវ ឯកឧត្តម អ៊ូច ភា អភិបាលខេត្តតាកែវ បានចាត់តាំងក្រុមការងារដោះស្រាយវិវាទក្រៅប្រព័ន្ធតុលាការ របស់រដ្ឋបាលខេត្ត ចុះពិនិត្យ និងសហការជាមួយអាជ្ញាធរ មូលដ្ឋានឃុំ ស្រុកធ្វើការដោះស្រាយជាបន្ទាន់។
នៅថ្ងៃទី២០ ខែកញ្ញា ឆ្នាំ២០២៣ ក្រុមការងារដោះស្រាយវិវាទក្រៅប្រព័ន្ធតុលាការរបស់រដ្ឋបាលខេត្ត បានចុះពិនិត្យ និងវាស់វែងឃើញថាប្រជាពលរដ្ឋចំនួន ២គ្រួសារ បានសាងសង់របងថ្មរំលោភលើភ្លឺភ្លោះក្នុងទំហំ ៣,៥ម៉ែត្រ ក្នុងទំហំសរុប ៦ម៉ែត្ររបស់ភ្លឺភ្លោះនៅក្នុងប្លង់សុរិយោដីដែលបានវាស់វែងមានលក្ខណៈជាប្រព័ន្ធ ព្រមទាំងបានសម្រប សម្រួលឱ្យរុះរើរបងចេញក្នុងរយៈពេល ៣០ថ្ងៃ ប៉ុន្តែប្រជាពលរដ្ឋទាំង ២គ្រួសារពុំបានរុះរើតាមការសម្របសម្រួលឡើយ។ រហូតដល់ថ្ងៃទី៣១ ខែតុលា ឆ្នាំ២០២៣ ក្រុមការងារដោះស្រាយវិវាទក្រៅប្រព័ន្ធតុលាការរបស់រដ្ឋបាលខេត្ត បាន អញ្ជើញគ្រួសារទាំង២ មកធ្វើការសម្របសម្រួលម្តងទៀត ប៉ុន្តែគ្រួសារទាំង២ បានស្នើសុំរក្សារបងនេះសិនដោយសំអាង ថារបងនេះពុំបានប៉ះពាល់ដល់បងប្អូនប្រជាពលរដ្ឋដទៃទេ ព្រោះនៅសល់ទំហំចំនួន ២,៥ម៉ែត្រ ដែលអាចឱ្យប្រជាកសិក ដឹកផលស្រូវពីស្រែឡើងមកកាន់ផ្លូវធំបានហើយនឹងយល់ព្រមរុះរើដោយស្ម័គ្រចិត្ត និងគ្មានលក្ខខណ្ឌនៅពេលដែល អាជ្ញាធរមានគំរោងអភិវឌ្ឍន៍ជាក់ស្ដែងក្នុង មូលដ្ឋាននោះ។
ក្រោយពីទទួលរបាយការណ៍ពីក្រុមការងាររួចមក ឯកឧត្តម អ៊ូច ភា អភិបាលខេត្តតាកែវ ក្នុងគោលបំណង ការពារទ្រព្យសម្បត្តិរបស់រដ្ឋ និងប្រយោជន៍សាធារណៈ នៅថ្ងៃទី០១ ខែវិច្ឆិកា ឆ្នាំ២០២៣ បានដឹកនាំកិច្ចប្រជុំជាថ្មីម្ដង ទៀតដើម្បីសម្របសម្រួលជាមួយប្រជាពលរដ្ឋទាំង២គ្រួសារ ប្រកបដោយភាពទន់ភ្លន់ និងម៉ត់ចត់ ដោយបានសម្រេច ដាច់ខាតត្រូវរុះរើរបងថ្មចេញទៅតាមប្លង់ដីដែលបានកំណត់។ ក្រោយពីការសម្រេចនេះ បងប្អូនទាំង ២គ្រួសារក៏បាន ឯកភាពរុះរើដោយស្ម័គ្រចិត្ត ប៉ុន្តែស្នើសុំរយៈពេល ១ខែដើម្បីធ្វើការរុះរើឱ្យបានរួចរាល់។
សូមបញ្ជាក់ថា យន្តការនៃការដោះស្រាយរបស់ក្រុមការងារដោះស្រាយវិវាទក្រៅប្រព័ន្ធតុលាការ របស់រដ្ឋបាល ខេត្តតាកែវ ជាពិសេស ឯកឧត្តមអភិបាលខេត្ត គឺអនុវត្តទៅតាម នយោបាយ ឈ្នះ ឈ្នះ ដែលមានសម្ដេចតេជោ ជា ស្ថាបនិក និងជៀសវាងឱ្យបានការប៉ះពាល់ដល់ទ្រព្យសម្បត្តិរបស់ប្រជាពលរដ្ឋ ហើយការឯកភាពទុករយៈពេល ១ខែនេះ គឺដើម្បីឱ្យគ្រួសារទាំង២ មានពេលវេលាគ្រប់គ្រាន់ក្នុងការរុះរើសំណង់របស់ខ្លួន ៕
