អនុសាខាកាកបាទក្រហមកម្ពុជា ស្រុករមាសហែក ទទួលបានបច្ច័យ ទេយ្យទាន ជាគ្រឿងឧបភោគ បរិភោគ និងរបស់ប្រើប្រាស់ពីព្រះសង្ឃទាំង ៥២វត្ត ក្នុងស្រុករមាសហែក
ភ្នំពេញ៖ ដើម្បីជួយសម្រាលការលំបាករបស់ប្រជាពលរដ្ឋដែលងាយរងគ្រោះ និងរងគ្រោះមហន្តរាយ ដោយសារគ្រោះធម្មជាតិផ្សេងៗ នាថ្ងៃទី៣ ខែវិច្ឆិកា ឆ្នាំ២០២៣ លោក ស៊ូ ម៉ុល ប្រធានកិត្តិយសអនុសាខា និងលោក ស្វាយ សុភាព ប្រធានគណៈកម្មាការ អនុសាខាកាកបាទក្រហមកម្ពុជា ស្រុករមាសហែក និងសហការី បានទទួលបច្ច័យ ទេយ្យទាន ជាគ្រឿងឧបភោគ បរិភោគ និងរបស់ប្រើប្រាស់ ពីព្រះធម្មកិច្ចមុនី រស់ ឌី ព្រះរាជាគណៈថ្នាក់កិត្តិយស នៃព្រះរាជាណាចក្រកម្ពុជា ព្រះបាឡាត់គណខេត្តស្វាយរៀង ព្រះអនុគណស្រុករមាសហែក ចៅអធិការវត្តចន្ត្រី រួមជាមួយព្រះសង្ឃ គ្រូអាចារ្យ គណៈកម្មការវត្តទាំង ៥២ វត្ត ដើម្បីរួមចំណែការងារមនុស្សធម៌ជួយដល់ប្រជាពលរដ្ឋដែលងាយរងគ្រោះ និងរងគ្រោះមហន្តរាយ ដោយសារគ្រោះធម្មជាតិផ្សេងៗ ក្នុងមូលដ្ឋានស្រុករមាសហែក ។
-អំណោយដែលបានទទួលរួមមាន៖ អង្ករ ១,០០០ គីឡូ មី ២៦ កេស ទឹកផ្លែឈើ ៦កេស ទឹកបរិសុទ្ធវីតាល់ ២៦ កេស និងទឹកធម្មតា ៣១ យួរ ទឹកត្រី ៣៦ យួរ ទឹកស៊ីអ៊ីវ ២៤ យួរ ត្រីខកំប៉ុង ១០ យួរ សម្ភារៈផ្សេងៗមួយចំនួនធំទៀត សរុបសម្ភារៈគិតជាថវិកា ១៥,៧៥២,៥០០ រៀល និងបច្ច័យ ១,២០០,០០០ រៀល ។
