រុស្ស៊ីលើកឡើងថា អ៊ុយក្រែន លេងជាមួយភ្លើងជាមួយនឹងការវាយប្រហារដោយយន្តហោះគ្មានមនុស្សបើកនៅជិតរោងចក្រនុយក្លេអ៊ែរ

មូស្គូ៖ រុស្ស៊ីនៅថ្ងៃព្រហស្បតិ៍នេះ បានឲ្យដឹងថា អ៊ុយក្រែនកំពុងប្រថុយនឹងគ្រោះមហន្តរាយនុយក្លេអ៊ែរ បន្ទាប់ពីយន្តហោះគ្មានមនុស្សបើកអ៊ុយក្រែន ៩គ្រឿង ត្រូវបានបាញ់ទម្លាក់ដោយកងកម្លាំងរុស្ស៊ី នៅជិតស្ថានីយនុយក្លេអ៊ែរ Zaporizhzhia ដែលជារោងចក្រថាមពលបរមាណូដ៏ធំបំផុតរបស់អឺរ៉ុប។

រោងចក្រ Zaporizhzhia ដែលស្ថិតក្រោមការគ្រប់គ្រងរបស់រុស្ស៊ីតាំងពីដើមខែមីនា ឆ្នាំ ២០២២ មានម៉ាស៊ីនរ៉េអាក់ទ័រ VVER-១០០០ V-៣២០ ដែលរចនាដោយសូវៀតចំនួនប្រាំមួយ ដែលមានផ្ទុកសារធាតុអ៊ុយរ៉ាញ៉ូម ២៣៥ ។

រ៉េអាក់ទ័រចំនួន ៤ ត្រូវបានបិទ ខណៈដែលម៉ាស៊ីនរ៉េអាក់ទ័រចំនួន ២ – លេខ ៤ និង លេខ ៥ – ស្ថិតនៅក្នុងរបៀប “បិទក្តៅ” នេះបើយោងតាមប្រតិបត្តិកររោងចក្ររុស្ស៊ី។

ក្រសួងការពារជាតិរុស្ស៊ីបានលើកឡើងថា ការការពារដែនអាកាសបានបាញ់ទម្លាក់យន្តហោះគ្មានមនុស្សបើករបស់អ៊ុយក្រែនចំនួន 9 គ្រឿងនៅជិតទីក្រុង Enerhodar ដែលគ្រប់គ្រងដោយរុស្សី ជាកន្លែងដែលកម្មករជាច្រើនសម្រាប់រោងចក្ររស់នៅ ក្នុងគោលបំណងរំខានដល់ការបង្វិលបុគ្គលិករបស់ទីភ្នាក់ងារថាមពលបរមាណូអន្តរជាតិ (IAEA) ។

ប្រភព៖ REUTERS

ប្រែសម្រួលដោយ៖ ហៃ ឆៃមុីនាង