ឧត្ដមសេនីយ៍ឯក ហ៊ុន ម៉ានិត នាំយកអាវរងាជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត ប្រគល់ជូនយោធភូមិភាគទី៣ កងទ័ពជើងគោក

ភ្នំពេញ៖ ឯកឧត្តមឧត្ដមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក នៃកងយោធពលខេមរភូមិន្បានចុះសាកសួរសុខទុក្ខ និងនាំយកអាវរងារដែលជាអំណោយរបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចែកជូនដល់បងប្អូនកងទ័ព កងកម្លាំង នៅយោធភូមិភាគទី៣ នាថ្ងៃទី២ ខែវិច្ឆិការ ឆ្នាំ២០២៣ នៅទីបញ្ជាការយោធភូមិភាគទី៣ ។

ឯកឧត្តម ហ៊ុន ម៉ានិត បានមានប្រសាសន៍ថា សម្តេចតេជោ និងសម្តេចកិត្តិព្រឹទ្ធបណ្ឌិត តែងតែគិតគូរយកចិត្តទុកដាក់ សុខទុក្ខរបស់កងកម្លាំង និងក្រុមគ្រួសារជាប្រចាំ ដែលបានលះបង់គ្រប់បែបយ៉ាង ដើម្បីការពារថែរក្សាសុខសន្តិភាព ស្ថិរភាពសង្គម និងសណ្តាប់ធ្នាប់សាធារណៈ។

ឯកឧត្តម ហ៊ុន ម៉ានិត បានបន្តថា ក្រោមការដឹកនាំ និងស្របតាមគោលនយោបាយរាជរដ្ឋាភិបាល យើងនៅតែបន្តបេ្តជ្ញាកំណែទម្រង់វិស័យយោធាឱ្យមានប្រសិទ្ធភាពខ្ពស់ លើកកម្ពស់សមត្ថភាពកងទ័ព ទំនើបកម្មយោធា និងជាពិសេសជំរុញលើកស្ទួយជីវភាពបងប្អូនកងកម្លាំងប្រដាប់អាវុធទាំងអស់។ ទាំងអស់នេះ តម្រូវឱ្យបងប្អូនទាំងអស់ បណ្តាអង្គភាពទាំងអស់ ចូលរួមជាមួយគ្នា គាំទ្រដល់កំណែទម្រង់ ដើម្បីផលប្រយោជន៍ជាតិរបស់យើង។

ក្នុងនាមជាកងទ័ព ដាច់ខាតត្រូវគោរពវិន័យ បទបញ្ជា ការពារសុខសន្តិភាព បូរណភាពដែនដី ការពាររាជរដ្ឋាភិបាល គាំទ្រដល់ការអនុវត្តគោលនយោបាយ និងកិច្ចការងារកំណែទម្រង់របស់រាជរដ្ឋាភិបាល ឱ្យទទួល បានលទ្ធផលល្អប្រសើរ។

សូមថ្លែងអំណរដល់បងប្អូនកងទ័ព កងកម្លាំងប្រដាប់អាវុធ ទាំងអស់ សម្រាប់ការលះបង់គ្រប់បែបយ៉ាង មានជំហរច្បាស់លាស់ ស្មោះត្រង់ឥតងាករ៉េ គាំទ្ររាជរដ្ឋាភិបាល ចូលរួមទប់ស្កាត់បដិវត្តពណ៌ ដែលចង់ផ្តួលរំលំរាជរដ្ឋាភិបាលស្របច្បាប់ ហើយការពារថែរក្សាបាននូវសុខសន្តិភាព និងស្ថិរភាព ជូនប្រជាជន ។