រដ្ឋមន្ត្រី ថោ ជេដ្ឋា អញ្ជើញជាអធិបតីក្នុងកិច្ចប្រជុំរៀបចំផែនការសកម្មភាពសម្រាប់គ្រប់គ្រងនិងអភិវឌ្ឍវិស័យធនធានទឹក និងឧតុនិយម ឆ្នាំ២០២៤
ភ្នំពេញ៖ នាថ្ងៃទី០២-ទី០៣ ខែវិច្ឆិកា ឆ្នាំ២០២៣ ឯកឧត្ដម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញជាអធិបតីក្នុងកិច្ចប្រជុំរៀបចំផែនការសកម្មភាពសម្រាប់គ្រប់គ្រង និងអភិវឌ្ឍវិស័យធនធានទឹក និងឧតុនិយមឆ្នាំ២០២៤ និងផែនការសកម្មភាពរយៈពេល ៣ឆ្នាំ (២០២៥-២០២៧) មានការចូលរួមពីឯកឧត្តមរដ្ឋលេខាធិការប្រចាំ ឯកឧត្តម លោកជំទាវ ថ្នាក់ដឹកនាំ លោក លោកស្រីប្រធាន-អនុប្រធានមន្ទីរធនធានទឹក និងឧតុនិយមរាជធានី-ខេត្ត។
ឯកឧត្តមរដ្ឋមន្រ្តី ក៏បានណែនាំឱ្យពិនិត្យមើលឡើងវិញនូវការបំពេញតួនាទីភារកិច្ចនាពេលកន្លងមក និងឆ្លុះបញ្ចាំងពីចំណុចខ្លាំងនិងចំណុចខ្សោយក៏ដូចជាបញ្ហាប្រឈមចំពោះមុខ ដើម្បីរួមគ្នាគិតដោះស្រាយឱ្យបានទាន់ពេលវេលា ជាពិសេសធ្វើយ៉ាងណាឱ្យការរៀបចំផែនការសកម្មភាពឆ្នាំ២០២៤ និងផែនការយុទ្ធសាស្ត្រនិងផែនការសកម្មភាពរយៈពេលបីឆ្នាំ (២០២៥-២០២៧) ទទួលបានជោគជ័យ និងគ្រប់ជ្រុងជ្រោយ។
ឯកឧត្តមរដ្ឋមន្ត្រី ក៏បានផ្តាំផ្ញើដល់ឯកឧត្តមថ្នាក់ដឹកនាំ និងមន្ទីររាជធានី-ខេត្តទាំងអស់បន្តយកចិត្តទុកដាក់ អនុវត្តការងារឱ្យកាន់តែសកម្ម និងមានប្រសិទ្ធភាពថែមទៀត ដើម្បីនាំមកនូវជោគជ័យ និងសមិទ្ធផលថ្មីៗ បន្ថែមទៀត ជូនស្ថាប័នក៏ដូចជារាជរដ្ឋាភិបាល និងប្រទេសជាតិ និង ចូលរួមរៀបចំ និងពង្រឹងការងារគតិយុត្តរបស់ក្រសួងឱ្យស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ៕
