មេដឹកនាំជប៉ុននិងហ្វីលីពីនយល់ព្រមចរចាកិច្ចព្រមព្រៀងការពារជាតិ
ម៉ានីល ប្រទេសហ្វីលីពីន៖ មេដឹកនាំនៃប្រទេសជប៉ុន និងហ្វីលីពីនបានព្រមព្រៀងគ្នាកាលពីថ្ងៃសុក្រ ដើម្បីចាប់ផ្តើមការចរចារសម្រាប់កតិកាសញ្ញាការពារជាតិដ៏សំខាន់មួយ ដែលនឹងអនុញ្ញាតឱ្យកងទ័ពរបស់ពួកគេចូលទៅកាន់ទឹកដីរបស់គ្នាទៅវិញទៅមកសម្រាប់សមយុទ្ធយោធារួមគ្នា។
សកម្មភាពនេះគឺជាផ្នែកមួយនៃកិច្ចខិតខំប្រឹងប្រែងដើម្បីពង្រឹងសម្ព័ន្ធភាពរបស់ពួកគេក្នុងការប្រឈមមុខនឹងការអះអាងគួរឱ្យព្រួយបារម្ភរបស់ប្រទេសចិននៅក្នុងតំបន់។
នាយករដ្ឋមន្ត្រីជប៉ុនលោក Fumio Kishida ដែលកំពុងបំពេញទស្សនកិច្ចរយៈពេលពីរថ្ងៃនៅទីក្រុងម៉ានីល ក៏បានប្រកាសបន្ទាប់ពីជួបពិភាក្សាជាមួយប្រធានាធិបតី Ferdinand Marcos Jr. ថា រ៉ាដាឃ្លាំមើលឆ្នេរនឹងត្រូវបានផ្តល់ឱ្យហ្វីលីពីនតាមរយៈជំនួយ។ ប្រទេសនេះគឺជាអ្នកទទួលផលដំបូងគេនៃកម្មវិធីជំនួយសន្តិសុខជប៉ុនដែលទើបនឹងចាប់ផ្តើមថ្មីសម្រាប់យោធាសម្ព័ន្ធមិត្តនៅក្នុងតំបន់។
Kishida បានឲ្យដឹងថា នាវាល្បាតរបស់ជប៉ុនបន្ថែម ឧបករណ៍ការពារ និងរ៉ាដា នឹងត្រូវបានផ្តល់ជូនដើម្បីពង្រឹងសមត្ថភាពអនុវត្តច្បាប់របស់ប្រទេសហ្វីលីពីននៅសមុទ្រ។ ប្រទេសជប៉ុនបានផ្គត់ផ្គង់កប៉ាល់ល្បាតរាប់សិបគ្រឿងក្នុងប៉ុន្មានឆ្នាំចុងក្រោយនេះដល់ហ្វីលីពីន ដែលឥឡូវនេះកំពុងប្រើប្រាស់ភាគច្រើនដើម្បីការពារផលប្រយោជន៍ទឹកដីរបស់ខ្លួននៅក្នុងសមុទ្រចិនខាងត្បូងដែលមានជម្លោះ។
ប្រភព៖ AP
ប្រែសម្រួលដោយ៖ ហៃ ឆៃមុីនាង
https://apnews.com/article/japan-kishida-visits-philippines-marcos-jr-defense-f40f40e9faf4481581515e06a6b5e4d7
