សម្តេចធិបតី ហ៊ុន ម៉ាណែត លើកទឹកចិត្តពលរដ្ឋឲ្យបំពាក់ ETC-OBU សម្រាប់ធ្វើដំណើរលើផ្លូវល្បឿនលឿន

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកទឹកចិត្តឲ្យពលរដ្ឋទៅបំពាក់ឧបករណ៍ ETC-OBU សម្រាប់ធ្វើដំណើរលើផ្លូវល្បឿនលឿន តាមគន្លងផ្លូវ ETC ខណៈដែលក្រុមហ៊ុន សម្រេចបន្តពន្យារពេល មិនយកថ្លៃសម្រាប់ការចុះឈ្មោះដើម្បីបំពាក់ឧបករណ៍នេះ ។

ក្នុងឱកាសជួបសំណេះសំណាលជាមួយកម្មករជាង១ម៉ឺន ៥ពាន់នាក់ នៅខេត្តព្រះសីហនុ នាថ្ងៃទី៧ ខែវិច្ឆិកា សម្តេចធិបតី ហ៊ុន ម៉ាណែត បានបញ្ជាក់ថា ជាមួយនឹងការអបអរខួប១ឆ្នាំនៃការបើកឱ្យដំណើរការផ្លូវល្បឿនលឿនភ្នំពេញ-ក្រុងព្រះសីហនុ ក្រុមហ៊ុនបានឯកភាពជាមួយរាជរដ្ឋាភិបាល ពេលដែលបើកលើផ្លូវល្បឿនលឿន ក្រុមហ៊ុនគិតលុយ ៨០% ហើយមួយឆ្នាំត្រូវដំឡើងព្រោះគាត់ត្រូវការវិនិយោគ ប៉ុន្តែឥលូវរាជរដ្ឋាភិបាលបានចរចា ក្រុមហ៊ុនក៏មានការយោគយល់ និងបានពន្យាសម្រាប់ការបង់ថ្លៃតាមប្រព័ន្ធ ETC មិនមានការតម្លើងទេសម្រាប់ក្នុងរយៈពេល១ឆ្នាំ ដោយឡែកការជិះលើផ្លូវដោយរង់ចាំបង់ជាសាច់ប្រាក់ផ្ទាល់គឺមានការពន្យាពេលចំនួន ៦ខែទៀត។

សម្តេចធិបតី ហ៊ុន ម៉ាណែត ថ្លែងថា «សុំបងប្អូនទៅដាក់ពាក្យ សុំបំពាក់ឧបករណ៍ ETC តាមប្រព័ន្ធអេឡិចត្រូនិចនេះ ស្រួលផងវាមិនចាំបាច់រង់ចាំ ខ្ញុំពេលខ្លះជិះក្បូនមក មកក្បូននឹង ពេលឡានមកដល់ទ្វាវាបើកស្រាប់ ព្រោះយើងបញ្ជូលកាតក្នុងនឹង ងាយស្រួលអត់ចាំបាច់ចាំ ហើយបើអ្នកបង់សាច់ប្រាក់ត្រូវតកន្ទុយគ្នាខាតពេល»។

គួរបញ្ជាក់ដែរថា ETC (Electronic Toll Collection) ជាច្រកអាទិភាពនៅពេលដែលរថយន្តបានបំពាក់ឧបករណ៍ OBU(On-Board Unit) រួច លោកអ្នកអាចធ្វើដំណើរតាមគន្លងផ្លូវ ETC (ច្រកអាទិភាព) បានភ្លាមៗ ដោយមិនចាំបាច់តម្រង់ជួររង់ចាំ ជួយសន្សំសំចៃពេលវេលា និងចូលរួមទប់ស្កាត់ការកកស្ទះចរាចរណ៍នៅបញ្ជរបង់ប្រាក់ ក៏ដូចជាផ្តល់ភាពងាយស្រួល ជូនដល់បងប្អូនអ្នកបើកប​រ ៕