លោក Zelensky លើកឡើងថា មិនមែនជាពេលវេលា សម្រាប់ការបោះឆ្នោតប្រធានាធិបតីនៅអ៊ុយក្រែនទេ
បរទេស៖ ប្រធានាធិបតីអ៊ុយក្រែនលោក Volodymyr Zelensky បានលើកឡើងកាលពីថ្ងៃចន្ទថា លោកមិនជឿថាវាជាពេលវេលាត្រឹមត្រូវសម្រាប់ការបោះឆ្នោតនោះទេ ខណៈដែលការជជែកពិភាក្សាកាន់តែខ្លាំងឡើងលើការរៀបចំការបោះឆ្នោតនៅឆ្នាំ ២០២៤ ខណៈពេលដែលប្រទេសនេះប្រយុទ្ធប្រឆាំងនឹងការឈ្លានពានរបស់រុស្ស៊ី។
ការបោះឆ្នោតទាំងអស់ រួមទាំងការបោះឆ្នោតប្រធានាធិបតី ដែលគ្រោងនឹងធ្វើឡើងនៅនិទាឃរដូវក្រោយ ត្រូវបានលុបចោលតាមលក្ខណៈបច្ចេកទេស ក្រោមច្បាប់អាជ្ញាសឹក ដែលចូលជាធរមានចាប់តាំងពីជម្លោះបានចាប់ផ្តើមកាលពីឆ្នាំមុន។
លោក Zelensky បានបញ្ជាក់នៅក្នុងសុន្ទរកថាប្រចាំថ្ងៃរបស់គាត់ថា យើងត្រូវតែសម្រេចចិត្តថាឥឡូវនេះគឺជាពេលវេលាការពារ ពេលវេលានៃការប្រយុទ្ធ ដែលជោគវាសនារបស់រដ្ឋ និងប្រជាជនអាស្រ័យ។ លោកបានថ្លែងថាវាជាពេលដែលប្រទេសត្រូវរួបរួមគ្នាមិនបែកបាក់ដោយបន្ថែមថា៖ ខ្ញុំជឿថាឥឡូវនេះមិនមែនជាពេលវេលាសម្រាប់ការបោះឆ្នោតទេ។
ខ្សែបន្ទាត់ជួរមុខរវាងភាគីជម្លោះភាគច្រើននៅតែស្ថិតស្ថេរអស់រយៈពេលជិតមួយឆ្នាំ បើទោះបីជាមានការវាយលុករបស់អ៊ុយក្រែនដែលមានការរិះគន់យ៉ាងខ្លាំង ដោយកងកម្លាំងរុស្ស៊ីបានចូលកាន់កាប់នៅភាគខាងត្បូង និងខាងកើតអ៊ុយក្រែនក៏ដោយ។
ប្រភព៖ France24
ប្រែសម្រួលដោយ៖ ហៃ ឆៃមុីនាង
