អគ្គនាយកដ្ឋានសវនកម្មផ្ទៃក្នុង រៀបចំកិច្ចប្រជុំពិភាក្សា ស្តីពីវឌ្ឍនភាពនៃការចុះធ្វើសវនកម្មផ្ទៃក្នុង

ភ្នំពេញ៖ នៅព្រឹកថ្ងៃពុធ ទី០៨ ខែវិច្ឆិកា ឆ្នាំ២០២៣ អគ្គនាយកដ្ឋានសវនកម្មផ្ទៃក្នុង បានរៀបចំកិច្ចប្រជុំពិភាក្សា ស្តីពីវឌ្ឍនភាពនៃការចុះធ្វើសវនកម្មផ្ទៃក្នុង ក្រោមអធិបតីភាពដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ដោយមានការអញ្ជើញចូលរួមពី ថ្នាក់ដឹកនាំ អគ្គនាយករង ប្រធាននាយកដ្ឋានចំណុះទាំង៤។ កិច្ចប្រជុំនេះដែរ ប្រព្រឹត្តទៅនៅសាលប្រជុំអគ្គនាយកដ្ឋានសវនកម្មផ្ទៃក្នុង (ជាន់ទី៣) ទីស្តីការក្រសួងមហាផ្ទៃ។

ជាកិច្ចចាប់ផ្តើម ឯកឧត្តម ឧត្តមសេនីយ៍ឯក អគ្គនាយក បានមានមតិស្វាគមន៍ និងមានសេចក្តីសោមនស្សរីករាយនាក្នុងឱកាសដ៏ថ្លៃថ្លានេះ ដែលឯកឧត្តម អគ្គនាយករង ប្រធាននាយកដ្ឋាន កំពុងតែមមាញឹកក្នុងការបំពេញភារកិច្ចចុះធ្វើសវនកម្ម នៅតាមបណ្តាគោលដៅមួយចំនួន បានចំណាយពេលដ៏មានតម្លៃដើម្បីមកជួបជុំគ្នាក្នុងកិច្ចប្រជុំនាពេលនេះ។

ជាកិច្ចបន្ត ឯកឧត្តម ឧត្តមសេនីយ៍ឯក អគ្គនាយក បានកោតសរសើរនិងវាយតម្លៃខ្ពស់ចំពោះថ្នាក់ដឹកនាំ នៃអគ្គនាយកដ្ឋានសវនកម្មផ្ទៃក្នុង ដែលបានខិតខំអនុវត្តតួនាទីប្រកបដោយស្មារតីទទួលខុសត្រូវ និងលះបង់ទាំងកម្លាំងកាយកម្លាំងចិត្ត។

ឆ្លៀតក្នុងឱកាសនោះផងដែរ ឯកឧត្តម ឧត្តមសេនីយ៍ឯក អគ្គនាយក ក៏បានជំរុញណែនាំដល់ថ្នាក់ដឹកនាំ និងជាប្រធានគណៈប្រតិភូ ក្នុងការចុះអនុវត្តការងារចុះធ្វើសវនកម្មផ្ទៃក្នុង ឱ្យបានទាន់ពេលវេលា និងមានប្រសិទ្ធភាពខ្ពស់ ជាពិសេសប្រកាន់ភ្ជាប់ឱ្យបាននូវក្រមសីលធម៌ ភាពជាអ្នកដឹកនាំ វិជ្ជាជីវរបស់សវនករ ឱ្យបានត្រឹមត្រូវ មានប្រសិទ្ធភាព តម្លាភាព និងគណនេយ្យភាព បន្ថែមពីនេះទៀត បានសំណូមពរដល់ថ្នាក់ដឹក មានសាមគ្គីភាពផ្ទៃក្នុងល្អ ចេះធ្វើការជាក្រុម និងគោរពតាមប្រសាសន៍ដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ នូវអភិក្រម ៣កុំ ៣គួរ និងគប្បី១ ក្នុងនោះរួមមាន៖
៣កុំ៖ កុំឈ្លោះគ្នា,កុំប៉ែងជើងគ្នា,កុំច្រណែនគ្នា
៣គួរ៖ គួរស្រលាញ់គ្នា,គួរជ្រោមជ្រែងគ្នា,គួរសាទរគ្នា
គប្បី១៖ គួរឱបដើមឈើក្រសួងមហាផ្ទៃឱ្យបានជោគជ័យ។

ជាកិច្ចបញ្ចប់ ឯកឧត្តម ឧត្តមសេនីយ៍ឯក អគ្គនាយក បានថ្លែងអំណរអរគុណ ចំពោះថ្នាក់ដឹកនាំ អគ្គនាយករង ប្រធាននាយកដ្ឋានចំណុះទាំង៤ ដែលបានចំណាយពេលដ៏មានតម្លៃនាវេលានេះ សូមជួបតែពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕