អគ្គនាយកពន្ធនាគារ ទទួលជួបសម្តែងការគួរសម និងពិភាក្សាការងារជាមួយអគ្គនាយកអង្គការស៊ីប៉ា
ភ្នំពេញ៖ ឯកឧត្ដម ឧត្តមអគារនុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ នាព្រឹកថ្ងៃទី០៨ ខែវិច្ឆិកា ឆ្នាំ២០២៣ បានទទួលជួបជាមួយ លោក ហុក សុទ្ធិ អគ្គនាយកអង្គការស៊ីប៉ា (SIPAR) និងសហការី ដើម្បីសម្តែងការគួរសម និងពិភាក្សាការងារ។
ក្នុងជំនួបនេះ ឯកឧត្ដម អគ្គនាយក បានសម្តែងនូវកិច្ចស្វាគមន៍ចំពោះអង្គការស៊ីប៉ា និងស្នើសុំការគាំទ្រ៧ចំណុចរួមមាន៖
-ជួយការងារសាងសង់បណ្ណាល័យនៅពន្ធនាគារខេត្តកែប និងបន្ថែមសៀវភៅ ដែលគម្រោងត្រៀមនឹងសាងសង់ក្នុងឆ្នាំ២០២៤ខាងមុខនេះ
-ជួយការងារសាងសង់បណ្ណាល័យនៅមណ្ឌលយុវនីតិសម្បទា (ស្រុកកណ្តាលស្ទឹង ខេត្តកណ្តាល)
-បន្ថែមចំនួនសៀវភៅដែលពាក់ព័ន្ធបរិបទថ្មី, សង្គមខាងក្រៅ ព័ត៌មានថ្មីនៅក្នុងពន្ធនាគារដែលមានភាពចង្អៀតណែនដូចជា មណ្ឌលអប់រំកែប្រែទី១, ពន្ធនាគារខេត្តកណ្តាល, ពន្ធនាគារខេត្តព្រះសីហនុ និងពន្ធនាគារខេត្តបាត់ដំបង
-ដាក់កម្មវិធីតែងនិពន្ធ សិល្បៈ និងគំនូរ នៅពន្ធនាគារដែលមានភាបចង្អៀតណែន
-ពិនិត្យលទ្ធភាពជួយបន្ថែមការជួសជុល បណ្ណាល័យ ចាស់ទ្រុឌទ្រោម ទាំងមធ្យោបាយ និងបច្ចេកទេសដល់ពន្ធនាគារ និងបន្ថែមចំនួនសៀវភៅ
-ជួយគៀងគរ ដៃគូរសហការ អង្គការក្រៅរដ្ឋាភិបាល ដែលចង់ជួយគាំទ្រដល់អគ្គនាយកដ្ឋានពន្ធនាគារ
-ជួយគាំទ្រកម្មវិធីអក្ខរកម្មហិរញ្ញវត្ថុដែលជាកម្មវិធីថ្មីរបស់ក្រសួងអប់រំ យុវជន និងកីឡាដើម្បីផ្តល់គ្រូបង្គោល និងសៀវភៅ បង្ហាត់បង្ហាញដល់ពន្ធនាគារ។
ក្នុងជំនួបនេះ លោក ហុក សុទ្ធិ អគ្គនាយកអង្គការស៊ីប៉ា បានសម្តែងនូវការចូលរួមអបអរសាទរចំពោះ ឯកឧត្ដម អគ្គនាយក ដែលត្រូវបានព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់តែងតាំងជា អគ្គនាយក នៃអគ្គនាយកដ្ឋានពន្ធនាគារ និងបានថ្លែងអំណរគុណសម្រាប់កិច្ចសហការល្អនាពេលកន្លងមក។
ជាមួយគ្នានេះ លោក អគ្គនាយកអង្គការ បានឯកភាពចំពោះសំណើរបស់ ឯកឧត្តម អគ្គនាយក និងមានសំណូមពរ២ចំណុចមកកាន់អគ្គនាយកដ្ឋានពន្ធនាគារ៖
-ស្នើសុំមានកិច្ចសហការរវាងភ្នាក់ងារជាតិ និងមុខរបរ មានការទំនាក់ទំនងគ្នាដោយផ្ទាល់ជាមួយនាយកដ្ឋានអប់រំកែប្រែ និងស្តារនីតិសម្បទា ដើម្បីអោយស្ថាប័នទាំងពីសហការគ្នាបានល្អរវាងក្រសួងការងារ និងក្រសួងមហាផ្ទៃ
-ស្នើសុំជួយពន្លឿនលិខិតបែបបទរដ្ឋបាលពីការចុះទស្សនកិច្ចតាមមណ្ឌលអប់រំកែប្រែ និងពន្ធនគាររាជធានី ខេត្ត។
ឯកឧត្តម អគ្គនាយក បានមានប្រសាសន៍ឯកភាពតាមសំណូមពររបស់អង្គការស៊ីប៉ា និងថ្លែងអំណរគុណដល់អង្គការដែលបានសហការគ្នាយ៉ាងល្អនាពេលកន្លងមក ៕
