លោកជំទាវរដ្ឋមន្រ្តី អុឹង កន្ថាផាវី ដឹកនាំក្រុមការងារជំនាញអន្តរក្រសួង ស្ថាប័នដែលជាសមាជិកនៃគ.ជ.ប.ជ ជួបពិភាក្សាការងារជាមួយ ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា

ភ្នំពេញ៖ នៅរសៀលថ្ងៃទី៨ ខែវិច្ឆិកា ឆ្នាំ២០២៣ លោកជំទាវកិត្តិបណ្ឌិត អុឹង កន្ថាផាវី រដ្ឋមន្រ្តីក្រសួងកិច្ចការនារី ក្នុងនាមអនុប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) និងជាប្រធានក្រុមការងារសហប្រតិបត្តិការអន្តរជាតិ បានដឹកនាំក្រុមការងារជំនាញអន្តរក្រសួង ស្ថាប័នដែលជាសមាជិកនៃគ.ជ.ប.ជ ជួបពិភាក្សាការងារជាមួយ ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា ក្នុងគោលបំណងពង្រឹងកិច្ចសហប្រតិបត្តិការ និងបង្កើនប្រសិទ្ធភាពនៃការអនុវត្តសកម្មភាពប្រយុទ្ធប្រឆាំងអំពើជួញដូរមនុស្សនៅកម្ពុជា នឹងការអនុវត្តអនុសាសន៍របស់សហរដ្ឋអាមេរិកដែលបានដាក់ជូនមករាជរដ្ឋាភិបាលកម្ពុជា នៅទីស្តីការក្រសួងមហាផ្ទៃ។

កិច្ចប្រជុំនេះមានការអញ្ជើញចូលរួមពីលោកជំទាវ ឯកឧត្តម លោកស្រី លោក តំណាង គ.ជ.ប.ជ ក្រសួងកិច្ចការនារី ក្រសួងយុត្តិធម៌ ក្រសួងការបរទេស និងសហប្រតិបត្តិការអន្តរជាតិ ក្រសួងការងារ និងបណ្តុះបណ្តាលវិជ្ជាជីវៈ ក្រសួងសង្គមកិច្ច អតីតយុទ្ធជន និងយុវនីតិសម្បទា ធានាគារជាតិនៃកម្ពុជា អគ្គស្នងការដ្ឋាននគរបាលជាតិ អគ្គនាយកដ្ឋានអត្តសញ្ញាណកម្ម និងអគ្គនាយកដ្ឋានអន្តោប្រវេសន៍។

លោកជំទាវកិត្តិបណ្ឌិតបានបញ្ជាក់ថា ទោះបីជាក្រុមឧក្រឹដ្ឋជនបានប្រើប្រាស់គ្រប់ឧបាយកល និងមធ្យោបាយបច្ចេកវិទ្យាថ្មីៗក្នុងការប្រព្រឹត្តបទល្មើសយ៉ាងណា ក៏រាជរដ្ឋាភិបាលកម្ពុជាបានតម្កល់ការប្តេជ្ញាចិត្តខ្ពស់ តស៊ូពុះពារការលំបាក និងឧបសគ្គទាំងឡាយ ដើម្បីការពារសន្តិសុខ សុវត្ថិភាព សេចក្ដីថ្លៃថ្នូរ និងអាយុជីវិតមនុស្ស ពីឧក្រឹដ្ឋកម្មនានា ជាពិសេសអំពើជួញដូរមនុស្សតាមរយៈការបើកប្រតិបត្តិការស៊ើបអង្កេតស្រាវជ្រាវ និងបង្ក្រាបបទល្មើសនេះយ៉ាងសកម្ម ដោយបើកទូលាយឱ្យមានបណ្តាញរាយការណ៍ទាន់ហេតុការណ៍ ដើម្បីបង្រ្កាប និងសង្គ្រោះជនរងគ្រោះឱ្យបានទាន់ពេលវេលា ព្រមទាំងចាត់ទុកការប្រយុទ្ធប្រឆាំងអំពើជួញដូរមនុស្សគឺជាអាទិភាពមួយក្នុងចំណោម អាទិភាពទាំងឡាយ ក្នុងរបៀបវារៈនៃកម្មវិធីនយោបាយរបស់រាជរដ្ឋាភិបាលកម្ពុជានីតិកាលទី៧នៃរដ្ឋសភា និងយុទ្ធសាស្ត្របញ្ចកោណដំណាក់កាលទី១ ស្ថិតក្រោមការដឹកនាំដ៏ខ្ពង់ខ្ពស់របស់ សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានសម្តែងនូវការកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងអំពើជួញដូរមនុស្ស ដោយឯកឧត្តមបានបញ្ជាក់ពីជំហររបស់សហរដ្ឋអាមេរិកក្នុងការបន្តពង្រឹងកិច្ចសហប្រតិបត្តិការ និងគាំទ្រជំនួយបច្ចេកទេសនានាដល់រាជរដ្ឋាភិបាលកម្ពុជាក្នុងកិច្ចការនេះដើម្បីការពារឧត្តមប្រយោជន៍របស់ជនរងគ្រោះដោយអំពើជួញដូរមនុស្ស ៕