សម្តេចធិបតី ប្តេជ្ញាថែរក្សាសុខសន្ដិភាពនិងការបង្រួបបង្រួមជាតិទោះក្នុងកាលៈទេសៈណាក៏ដោយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ប្តេជ្ញាថែរក្សាសុខសន្ដិភាពនិងការបង្រួបបង្រួមជាតិទោះក្នុងកាលៈទេសៈណាក៏ដោយ ដើម្បីធានាដល់ការអភិវឌ្ឍ និងភាពសុខសាន្តរបស់ប្រជាជន។

ក្នុងពិធីអញ្ជើញអបអរសាទរខួបអនុស្សាវរីយ៍លើកទី២៨ ថ្ងៃបង្កើតបញ្ជាការដ្ឋានទ័ពពិសេស នាព្រឹកថ្ងៃទី១០ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បានមានប្រសាសន៍ថា សមិទ្ធផលការងារដែលសម្រេចបាននាពេលនេះ គឺបានមកពីវីរៈយុទ្ធជនគ្រប់ជំនាន់ ដែលបានបូជាសាច់ស្រស់ឈាមស្រស់ ដើម្បីការពារជាតិ មាតុភូមិ និងធានាបានសុខសន្តិភាព។

សម្តេចធិបតី ហ៊ុន ម៉ាណែត បានបន្តថា សន្ដិភាពនិងការបង្រួបបង្រួមជាតិ គឺជាការរកបានដោយលំបាកបំផុត ដែលសមិទ្ធផលទាំងនេះ ក៏បានកើតចេញពីការលះបង់នូវសាច់ស្រស់ឈាមស្រស់ របស់យោធិនជំនាន់មុនរបស់កម្ពុជា ដូច្នេះក្នុងនាមជាអ្នកបន្តវេនជំនាន់ក្រោយ ត្រូវតែបន្តការពារឱ្យខាងតែបាននូវសន្តិភាពនិងការបង្រួបបង្រួមជាតិដែលរកបាន ដើម្បីធានាដល់ការអភិវឌ្ឍរបស់ប្រទេសជាតិ និងភាពសុខសាន្តរបស់ប្រជាជន ក្រោមដំបូលនៃសន្តិភាពនេះ។

សំឡេង « សូមឧទ្ទិសសមិទ្ធផលថ្ងៃនេះដល់វីរៈយុទ្ធជនគ្រប់ជំនាន់ ទាំងក្នុងបញ្ជាការដ្ឋានទ័ពពិសេសក៏ដូចជាកងយោធពលខេមរភូមិន្ទ ទាំងមូល ដែលបានលះបង់សាច់ស្រស់ ឈាមស្រស់នៅក្នុងបុព្វហេតុការពារជាតិមាតុភូមិ ក៏ដូចជាការស្វែងរកនូវសន្តិភាព ការបង្រួបបង្រួមជាតិដូចសព្វថ្ងៃ។ ដូច្នេះសន្តិភាពនិងការបង្រួបបង្រួមជាតិជាអ្វីដែលយើងរកបានដោយលំបាកបំផុត ដែលយើងជាអ្នកជំនាន់ក្រោយត្រូវតែរែកពន់និងថែរក្សាឱ្យបានជាដាច់ខាត ទោះក្នុងកាលៈទេសៈណាក៏ដោយ» ៕