ឧត្តមសេនីយ៍ទោ សោម ស៊ុន ជួបពិភាក្សាជាមួយក្រុមការងារបច្ចេកទេស ជីករុករកអដ្ឋិធាតុទ័ពស្ម័គ្រចិត្តវៀតណាម K៧២ ខេត្តប៊ីញភឿក ដើម្បីបន្តសកម្មភាពមនុស្សធម៌ ក្នុងដំណាក់កាលទី២៣
ភ្នំពេញ៖ ដោយអនុវត្តតាមកិច្ចព្រមព្រៀងរវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាលនៃសាធារណៈរដ្ឋសង្គមនិយមវៀតណាម ស្ដីពីសកម្មភាពមនុស្សធម៌ជីកគាស់លើកយកអដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតក្នុងសម័យសង្គ្រាមនៅកម្ពុជានាពេលកន្លងទៅ។ នៅថ្ងៃទី៩ ខែវិច្ឆិកា ឆ្នាំ២០២៣ នៅទីបញ្ជាការតំបន់ប្រតិបត្តិការសឹករងកំពង់ធំ បានទទួលជួបពិភាក្សាជាមួយក្រុមបច្ចេកទេសជំនាញរុករកអដ្ឋិធាតុកងទ័ពស្ម័គ្រចិត្តវៀតណាមK៧២ របស់ខេត្តប៊ិញភឿក នៃកងទ័ពប្រជាជនវៀតណាម។
ដែលកិច្ចប្រជុំនេះស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍គណៈកម្មាធិការជំនាញជីករុករកអដ្ឋិធាតុកងទ័ពស្ម័គ្រចិត្តវៀតណាម ខេត្តកំពង់ធំ និងលោកវរសេនីយ៍ត្រី ង្វៀន វ៉ាន់ឡុង អនុប្រធានក្រុមការងារបច្ចេកទេសជីករុករកអដ្ឋិធាតុកងទ័ពស្ម័គ្រចិត្តវៀតណាម ដែលត្រូវបំពេញភារកិច្ចនៅលើទឹកដីខេត្តកំពង់ធំ។
ឧត្តមសេនីយ៍ទោ សោម ស៊ុន បានបញ្ជាក់ថាក្នុងរយៈពេលជាង២០ឆ្នាំកន្លងមកនេះ ខេត្តកំពង់ធំបានសហការជាមួយក្រុមបច្ចេកទេសK៧០ របស់យោធភូមិភាគទី៧ នៃកងទ័ពប្រជាជនវៀតណាម និងក្រុមបច្ចេកទេសK៧២ របស់ខេត្ត ប៊ិញភឿក នៃសាធារណរដ្ឋសង្គមនិយមវៀតណាម បានដំណើរការជីកគាស់លើកយកអដ្ឋិធាតុកងទ័ពស្ម័គ្រចិត្តវៀតណាមនិងបានធ្វើមាតុភូមិនិវត្តន៍ត្រឡប់ទៅប្រទេសកំណើតវិញបានចំនួន១.១៤២អដ្ឋិធាតុ រួចមកហើយ ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ក៏បានបញ្ជាក់បន្ថែមទៀតថា បច្ចុប្បន្ននេះ តាមការស្រាវជ្រាវអដ្ឋិធាតុកងទ័ពស្ម័គ្រចិត្តវៀតណាម ដែលនៅសេសសល់ប្រមាណពី៧០ ទៅ៨០ អដ្ឋិធាតុទៀតនៅក្នងភូមិសាស្ត្រតាមមូលដ្ឋាននានា នៅតាមបណ្ដាស្រុកមួយចំនួន របស់ខេត្តកំពង់ធំ ដែលត្រូវដំណើរការជីករុករកនិងគាស់លើកធ្វើមាតុភូមិនិវត្តន៍ទៅកាន់មាតុប្រទេសជាបន្តទៅទៀត ។
លោកវរសេនីយ៍ ង្វៀន វ៉ាន់ឡុង តំណាងឱ្យគណៈបញ្ជាការយោធាខេត្តប៊ិញភឿក និងជាក្រុមបច្ចេកទេសជំនាញ ជីករកអដ្ឋិធាតុកងទ័ពស្ម័គ្រចិត្តវៀតណាមK៧២ បានសូមគោរពថ្លែងអំណរអរគុណដ៏ជ្រាលជ្រៅជាទីបំផុត ចំពោះថ្នាក់ដឹកនាំខេត្ត អាជ្ញាធរដែនដីគ្រប់លំដាប់ថ្នាក់ និងកងកម្លាំងប្រដាប់អាវុធទាំងបី រួមជាមួយប្រជាជននៅក្នុងខេត្តកំពង់ធំ ដែលបានបង្កលក្ខណៈងាយស្រួល ក្នុងដំណើរការជីកគាស់លើកយកអដ្ឋិធាតុកងទ័ពស្ម័គ្រចិត្តវៀតណាមនាពេលកន្លងមក។
ជាមួយនោះដែរក៏បានសំណូមពរ សូមឱ្យអាជ្ញាធរដែនដីគ្រប់លំដាប់ថ្នាក់ និងប្រជាពលរដ្ឋ មេត្តាបន្តជួយផ្ដល់ដំណឹងនិងសហការ ដើម្បីក្រុមបច្ចេកទេសជីកគាស់លើកយកអដ្ឋិធាតុដែលនៅសេសសល់ទាំងនេះ ធ្វើមាតុភូមិនិវត្តន៍ត្រឡប់ទៅកាន់មាតុភូមិកំណើតវិញដើម្បីជួបជុំសាច់ញាតិក្រុមគ្រួសារ ដែលកំពុងរង់ចាំនៅប្រទេសវៀតណាមផងដែរ ៕
