ឯកឧត្តមបណ្ឌិត ជ្រុន ថេរ៉ាវ៉ាត ដឹកនាំគណៈប្រតិភូ អន្តរក្រសួង ចុះត្រួតពិនិត្យ និងវាយតម្លៃ ការងារថែទាំជាប្រចាំផ្លូវ DBST ចំនួន ៧ខ្សែ ស្ថិតក្នុងស្រុកសាមគ្គីមានជ័យ និងស្រុករលាប្អៀរ

ភ្នំពេញ៖ កាលពីព្រឹកថ្ងៃសុក្រ ១២រោច ខែអស្សុជ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១០ ខែវិច្ឆិកា ឆ្នាំ២០២៣ ឯកឧត្តមបណ្ឌិត ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈប្រតិភូ អន្តរក្រសួង រួមមាន តំណាងក្រសួងអភិវឌ្ឍន៍ជនបទ និងតំណាងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃ (ដំណាក់កាលទី១) ការងារថែទាំជាប្រចាំផ្លូវ DBST ចំនួន ៧ខ្សែ ប្រវែងសរុប ៥២.៧៣០ម៉ែត្រ ស្ថិតក្នុងស្រុកសាមគ្គីមានជ័យ និងស្រុករលាប្អៀរ និងប្រភេទផ្លូវដីល្បាយក្រួសចំនួន ១៥ខ្សែ ប្រវែងសរុប ១១៨.៨០០ម៉ែត្រ ស្ថិតក្នុងស្រុកសាមគ្គីមានជ័យ ស្រុករលាប្អៀរ ស្រុកទឹកផុស និងស្រុកកំពង់ត្រឡាច។

ខ្សែផ្លូវខាងលើ អនុវត្តដោយមន្ទីរអភិវឌ្ឍន៍ជនបទខេត្តកំពង់ឆ្នាំង។

បន្ទាប់ពីបានត្រួតពិនិត្យ និងវាយតម្លៃលើគុណភាពខ្សែផ្លូវតាមលក្ខណៈបច្ចេកទេសរួចមក គណៈប្រតិភូអន្តរក្រសួង បានណែនាំដល់មន្ទីរអភិវឌ្ឍន៍ជនបទខេត្តកំពង់ឆ្នាំង ចំណុចដូចខាងក្រោម៖

១.ចំពោះផ្លូវប្រភេទ DBST ទាំង ៧ខ្សែ៖
មន្ទីរត្រូវជួសជុលឡើងវិញ នូវកន្លែងដែលស្រុត និងប៉ោងកៅស៊ូ ដោយឡានដឹក លើលទំងន់ សម្អាតប្រឡាយ និងសម្អាតមាត់លូ។

២.ចំពោះផ្លូវដីល្បាយក្រួសទាំង ១៥ខ្សែ៖ មន្ទីរត្រូវលុបសំបុកមាន់ ដែលទើបខូចដោយភ្លៀងធ្លាក់ជាប់ជាប្រចាំ រយៈពេលកន្លងមកនេះ និងធ្វើការជួសជុលឡើងវិញជាបន្ទាន់ត្រង់កន្លែងលិចទឹក ក្រោយពេលទឹកស្រក ៕