នាយករដ្ឋមន្ត្រី ហ៊ុន ម៉ាណែត៖ សេចក្តីសម្រេច ក្នុងវេទិការាជរដ្ឋាភិបាល-ផ្នែកឯកជន មានអនុភាពស្មើសេចក្តីសម្រេច របស់គណៈរដ្ឋមន្ត្រី

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចាត់ទុកវេទិការាជរដ្ឋាភិបាល-ផ្នែកឯកជនលើកទី១៩ ជាកិច្ចប្រជុំពេញអង្គគណៈរដ្ឋមន្ត្រីបើកចំហមួយ។ ហេតុនេះហើយ​នៅរាល់ការសម្រេច​ចិត្តរបស់វេទិកាមួយនេះ គឺមានអនុភាពស្មើនឹងសេចក្តីសម្រេចរបស់គណៈរដ្ឋមន្ត្រី។

តាមរយៈសន្ទរកថា ថ្លែងក្នុងវេទិការាជរដ្ឋាភិបាល-ផ្នែកឯកជនលើកទី១៩ នៅវិមានសន្តិភាព នាថ្ងៃទី១៣ ខែវិច្ឆិកា ឆ្នាំ២០២៣ សម្តេចធិបតីថ្លែងបន្តថា ដោយសារតែវេទិកានេះមិនបានធ្វើឡើងអស់ ជាច្រើនឆ្នាំមកហើយ ហេតុនេះមានវិស័យឯកជនជាច្រើនកំពុងទទឹងរង់ចាំថាតើ រាជរដ្ឋាភិបាលមានគោលការណ៍អ្វី ដើម្បីជួយជ្រោមជ្រែងដល់វិស័យឯកជន។ សម្ដេចបាន ចាត់ទុកវិស័យឯកជនជាដៃគូសំខាន់ ក្នុងការអភិវឌ្ឍសេដ្ឋកិច្ចជាតិ និងជីវភាពរស់នៅរបស់ប្រជាជន។

សម្តេចធិបតី លើកឡើងថា នេះវេទិការាជរដ្ឋាភិបាល-ផ្នែកឯកជនលើកទី១៩នៅថ្ងៃនេះ ជាកិច្ចការប្រវត្តិសាស្ត្រថ្មីមួយរបស់រាជរដ្ឋាភិបាលអាណត្តិទី៧ និងក៏ដូចជាសម្រាប់សម្តេចផ្ទាល់ ក្នុងការដឹកនាំវេទិកានេះជាលើកទីមួយផងដែរ។ គួររំឭកថា សម្តេចតេជោ ហ៊ុន សែន បានដឹកនាំវេទិកានេះចាប់ពីឆ្នាំ១៩៩៩ ដល់ឆ្នាំ២០១៩ ពោលគឺពីលើកទី១ដល់ទី១៨។

វេទិកាដដែលនេះ មិនត្រូវបានធ្វើឡើងឡើយនៅ៤ឆ្នាំចុងក្រោយ ដោយសារតែការរីករាលដាលនៃជំងឺកូវីដ-១៩។ ហេតុនេះហើយ ទើបសម្តេចនាយករដ្ឋមន្ត្រីជឿជាក់ថា នឹងមានសំណើជាច្រើនដែលត្រូវដោះស្រាយ ៕