រដ្ឋបាលខេត្តក្រចេះ រៀបចំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្ត ឆ្នាំ២០២៣

ភ្នំពេញ៖ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ និងឯកឧត្តម ភឹម ភីរ៉ា អភិបាលរងខេត្ត តំណាងឯកឧត្តម វ៉ា ថន អភិបាលខេត្ត នាព្រឹកថ្ងៃចន្ទ ១កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៣ ខែវិច្ឆិកា ឆ្នាំ២០២៣ បានអញ្ជើញដឹកនាំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្ត ឆ្នាំ២០២៣ នៅឃុំកំពង់ដំរី ស្រុកឆ្លូង ខេត្តក្រចេះ។ ដោយមានការចូលរួមពី ឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត អភិបាលរងខេត្ត លោក លោកស្រី ប្រធាន អនុប្រធាន មន្ទីរអង្គភាពជុំវិញខេត្ត ប្រធាន សមាជិកក្រុមប្រឹក្សាខេត្ត អភិបាល អភិបាលរងស្រុក មេឃុំ ស្មៀន និងប្រជាពលរដ្ឋនៅឃុំ ក្នុងស្រុកឆ្លូង។

ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត បានគូសបញ្ជាក់ថា តួនាទី ភារកិច្ច សិទ្ធិអំណាច សមិទ្ធផល និងបញ្ហាប្រឈមនានារបស់ក្រុមប្រឹក្សាខេត្ត ដើម្បីបង្ខិតសេវាសាធារណៈឱ្យកាន់តែជិតប្រជាពលរដ្ឋ និងដើម្បីធានាដល់កិច្ចដំណើរការការងាររបស់រដ្ឋបាលខេត្ត-ក្រុង ស្រុក-ខណ្ឌ ប្រកបដោយតម្លាភាព និងគណនេយ្យភាព រាជរដ្ឋាភិបាលបានរៀបចំអោយមានក្រុមប្រឹក្សា រាជធានី-ខេត្ត-ក្រុង-ស្រុក-ខណ្ឌ ដែលជាតំណាងសាធារណៈជន ជាអ្នកការពារ និងបម្រើឱ្យផលប្រយោជន៍ប្រជាពលរដ្ឋទាំងអស់នៅក្នុងដែនដីរបស់ខ្លួន។

អង្គវេទិកាបានទទួលការសំណូមពរ និងបញ្ហាប្រឈមចំនួន១៧ ដែលបងប្អូនប្រជាពលរដ្ឋបានលើកឡើង និងស្នើសុំ ក្នុងនោះរួមមាន៖ ខ្វះអណ្តូងទឹក, ខ្វះគ្រូបង្រៀន, ខ្វះសាលារៀន, សុំជួសជុលផ្លូវ, បញ្ហារថយន្តធុនធំខុសបច្ចេកទេសដឹកលើសទំងន់ ធ្វើឲ្យខូចផ្លូវ និងហេដ្ឋារចនាសម្ព័ន្ធនានា, ស្នើសុំតបណ្តាញអគ្គិសនីចូលភូមិ, ការចុះបញ្ជីដីលក្ខណៈជាប្រព័ន្ធ និងការស្នើសុំប័ណ្ណក្រីក្រជាដើម។ ពាក់ព័ន្ធទៅនឹងសំណើសំណូមពរខាងលើ ឯកឧត្តមប្រធានក្រុមប្រឹក្សាខេត្ត និងជំនាញ បានដោះស្រាយនឹងកន្លែងបានចំនួន១៦ នៅសល់១សំណូមពរ ទុកឲ្យរដ្ឋបាលស្រុកជាអ្នកដោះស្រាយ។

ដោយក្នុងនោះឯកឧត្តម ហឿ ស៊ីយ៉ែម បានជម្រុញបន្ថែមឲ្យអាជ្ញាធរពាក់ព័ន្ធត្រូវចុះពិនិត្យពិភាក្សា និងពន្លឿនដោះស្រាយនូវបញ្ហា និងសំណូមពរជូនប្រជាពលរដ្ឋ ហើយសហគមន៍ក៏ត្រូវចូលរួមតាមដាន និងគោរពអនុវត្តន៍ផងដែរ។ ព្រមទាំងស្នើសុំឲ្យអាណាព្យាបាល និងសហគមន៍ សូមជួយសហការ និងរាយការណ៍ដល់សមត្ថកិច្ចអំពីទីតាំងប្រើប្រាស់ និងចរាចរណ៍លក់ដូរចែកចាយគ្រឿងញៀន ដើម្បីចាត់វិធានការចាប់បង្រ្កាប និងទប់ស្កាត់ នូវជាបញ្ហាសកលនេះ ដែលរាជរដ្ឋាភិបាលកំពុងតែខិតខំធ្វើ ហើយក៏តម្រូវឲ្យយើងទាំងអស់គ្នាចូលរួមឲ្យសកម្មផុលផុសផងដែរ។

ឯកឧត្តម ភឹម ភីរ៉ា អភិបាលរងខេត្ត ក៏បានមានប្រសាសន៍ជម្រុញលើកទឹកចិត្ត និងផ្សព្វផ្សាយនូវផែនការរបស់រាជរដ្ឋាភិបាលអាណតិ្តទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីនៃកម្ពុជា បានដាក់ចេញនូវផែនការអភិវឌ្ឍន៍ផ្នែកសមត្ថភាពបណ្តុះបណ្តាលវិជ្ជាជីវៈដល់ប្រជាពលរដ្ឋចំនួន១លាន៥សែននាក់ ឲ្យមានការងារធ្វើ មានមុខរបរចំណូល ដើម្បីលើកកម្ពស់ជីវភាពប្រចាំថ្ងៃ កាត់បន្ថយភាពអត់ការងារធ្វើ កាត់បន្ថយការចំណាកស្រុក និងលើកកម្ពស់ការងារក្នុងស្រុក ដោយការចូលសិក្សានូវជំនាញទាំងអស់នេះ នៅវិទ្យាស្ថានពហុបច្ចេកទេសភូមិភាគតេជោសែនឥសាន្ត ដែលមានទីតាំងនៅទីរួមខេត្តក្រចេះ ៕