ប្រមុខរាជរដ្ឋាភិបាល៖ ការបង្កើតទារកដ្ឋាននិងមតេ្តយ្យសហគមន៍នៅក្បែរោងចក្រសហគ្រាស គឺជាកិច្ចការសំខាន់សម្រាប់លើកកម្ពស់សុខុមាលភាពទារកនិងការអប់រំរបស់កុមារឱ្យកាន់តែឈ្លាសវៃ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ការបង្កើតទារកដ្ឋាននិងមតេ្តយ្យសហគមន៍នៅក្បែរោងចក្រសហគ្រាស គឺជាកិច្ចការសំខាន់សម្រាប់លើកកម្ពស់សុខុមាលភាពទារកនិងការអប់រំរបស់កុមារឱ្យកាន់តែឈ្លាសវៃ ជាពិសេសធានាបាននូវអនាគតដ៏ភ្លឺស្វាងដល់កូនចៅរបស់បងប្អូនកម្មករនិយោជិត។
ក្នុងពិធីប្រកាសដាក់ឱ្យអនុវត្តន៍ជាផ្លូវការ កម្មវិធីនយោបាយចំនួនពីរក្នុងវិស័យការងារ ដើម្បីជាឧត្តមប្រយោជន៍សម្រាប់កម្មករ និយោជិត នាព្រឹកថ្ងៃទី១៤ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បានមានប្រសាសន៍ថា កន្លងមកនេះ តាមរយៈកម្មវិធីសំណេះសំណាល សម្តេចធិបតី បានណែនាំឱ្យក្រសួងការងារនិងបណ្តុះបណ្តាលវិជ្ជាជីវៈ សហការជាមួយស្ថាប័នពាក់ព័ន្ធ ដើម្បីវិនិយោគលើការរៀបចំបង្កើតទារកដ្ឋាននិងមត្តេយ្យសហគមន៍ នៅតាមបណ្តាតំបន់ជិតរោងចក្រ ដើម្បីចូលរួមចំណែកក្នុងការជួយសម្រាលបន្ទុកដល់កម្មករ កម្មការិនីដែលមានកូននៅក្នុងបន្ទុក សំដៅជួយបង្កើនប្រសិទ្ធភាពនិងផលិតភាពការងាររបស់បងប្អូន កម្មករ កម្មការិនី អាចជួយដល់ការរីកចម្រើនរបស់រោងចក្រផងដែរ។
សម្តេចធិបតី ហ៊ុន ម៉ាណែត បានបន្តថា ការយកចិត្តទុកដាក់លើសុខុមាលភាព ការអប់រំ របស់ប្រជាពលរដ្ឋ គឺគិតពីដើមទី សុខភាពគិតតាំងពីមុនកើត កើតមកហើយត្រូវគិតទាំងពីការអប់រំ ការជួយបង្កើតទារកដ្ឋាននិងមត្តេយ្យសិក្សាសហគមន៍នេះ ដោយឃើញថា ការសិក្សាកន្លងទៅតាមការរាយការណ៍របស់ ឯកឧត្តម បណ្ឌិត សភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា សិស្សដែលបានចូលរួមថ្នាក់បឋមប្រសិនបើបានឆ្លងកាត់នូវមត្តេយ្យមួយជំហានមុន គឺងាយស្រួលនិងងាយចាប់បាននៅថ្នាក់បឋមសិក្សា។
សម្តេចធិបតី បានបញ្ជាក់ថា ការរៀបចំនៅទារកដ្ឋាននិងមត្តេយ្យសហគមន៍នេះ ក៏ចូលរួមចំណែកនៅក្នុងការយកចិត្តទុកដាក់ទៅលើសុខភាព ព្រោះការដាក់នៅទារកដ្ឋានក៏ដូចជាមត្តេយ្យសហគមន៍ក៏ ជួយក្នុងការថែទាំសុខុមាលភាពរបស់ទារក តាមរយៈការគ្រប់គ្រងការជួយបំប៉ន គ្រប់គ្រងទាំងការហូបចុកទាំងអាហាររូបត្ថម្ភ និងការបង្ហាត់បង្រៀនផ្សេងៗ។
បន្ថែមពីនោះ បងប្អូនកម្មករនិយោជិតដែលមានកូនតូច អាចបំពេញការងារបានផងដែរ ខណៈដែលមានអ្នកថែទាំនិងមានគ្រូដែលមានជំនាញនិងអាជីពច្បាស់លាស់ នៅក្នុងការថែទាំនិងផ្តល់ការអប់រំបឋមដល់កូនចៅ ខ្លួននិងទទួលបាន បញ្ញាញាណគ្រប់គ្រាន់ មានអាហារូបត្ថម្ភគ្រប់គ្រាន់និងមានមូលដ្ឋាន ដើម្បីប្រកួតប្រជែងព្រមទាំងចាប់យកនូវឱកាសអប់រំឱ្យបានខ្ពង់ខ្ពស់ច្រើនជាងឪពុកម្តាយ នៅក្នុងសម័យបច្ចុប្បន្នផងដែរ។
«អ្វីដែលជាក្តីសង្ឃឹមរបស់បងប្អូនកម្មករ និយោជិត ដែលកំពុងខិតខំធ្វើការចំពោះមុខនេះ គឺអាចទ្រទ្រង់ជីវភាពគ្រួសារក៏ដូចជាខ្លួនឯង ក៏ប៉ុន្តែការផ្តល់ក្តីសង្ឃឹមនិងអនាគត ដ៏ភ្លឺស្វាងរបស់កូនចៅដែលជាក្តីប្រាថ្នារបស់ប្អូននេះជាអ្វីដែលជាគោលដៅរបស់រាជរដ្ឋាភិបាលគ្រប់ជំនាន់គឺថាធ្វើម៉េចឱ្យប្រជាពលរដ្ឋខ្មែរពីមួយជំនាន់ទៅមួយជំនាន់ កាន់តែល្អប្រសើរកាន់តែមានឱកាស កាន់តែរឹងមាំ និងកាន់តែឈ្លាសវៃនិងសមត្ថភាពកាន់តែខ្ពស់ដើម្បីជំរុញប្រទេសយើងកាន់តែលឿន»៕
