ឯកឧត្តម ឈា ប៊ុនរិទ្ធ ទទួលជួបពិភាក្សាការងារជាមួយប្រតិភូធនាគារពិភពលោក

ភ្នំពេញ៖ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ ក្រសួងធនធានទឹក និងឧតុនិយម និងជានាយកអង្គភាពគ្រប់គ្រងគម្រោងដែលទទួលហិរញ្ញប្បទានពីធនាគារពិភពលោក នាព្រឹកថ្ងៃអង្គារ ២កើត ខែកត្ដិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៤ ខែវិច្ឆិកា ឆ្នាំ២០២៣ បានទទួលជួបពិភាក្សាការងារជាមួយប្រតិភូធនាគារពិភពលោក ដឹកនាំដោយលោកស្រី Eileen Burke អ្នកឯកទេសជាន់ខ្ពស់ និងជាប្រធានក្រុមកម្មវិធីសកលផ្នែកគ្រប់គ្រងធនធានទឹករបស់ធនាគារពិភពលោកប្រចាំទីស្នាក់ការកណ្តាល។

សូមជម្រាបថា ជំនួបពិភាក្សាបានផ្តោតលើបញ្ហាសកលទាក់ទងនឹង៖
១.សន្តិសុខទឹក និងភាពធន់នឹងអាកាសធាតុ
២.ការងារអាទិភាពនិងបញ្ហាប្រឈមរបស់កម្ពុជាក្នុងការគ្រប់គ្រងធនធានទឹក និងការស្តុកទឹកនៅក្នុងអាងទន្លេសាប
៣.ការងារដែលធនាគារពិភពលោកអាចបន្តគាំទ្រដល់រាជរដ្ឋាភិបាលកម្ពុជា។

ក្នុងឱកាសនេះ ឯកឧត្តមរដ្ឋលេខាធិការប្រចាំការ បានស្នើសុំឱ្យធនាគារពិភពលោកពិចារណាលើការងារមួយចំនួនដូចជា៖
១.ធ្វើការវាយតម្លៃសារពើភ័ណ្ឌអាងស្តុកទឹកដែលមានស្រាប់ទូទាំងប្រទេស
២.ធ្វើការស្តារ និងសាងសង់ហេដ្ឋារចនាសម្ព័ន្ធធនធានទឹក និងប្រព័ន្ធធារាសាស្រ្តដែលមានស្រាប់
៣.ធ្វើការកែលម្អប្រព័ន្ធព្យាករណ៍អាកាសធាតុ និងជូនដំណឹងទុកជាមុនជាមួយនឹងការប្រែប្រួលអាកាសធាតុ និងគម្របដីដោយប្រើប្រាស់បច្ចេកវិទ្យាទំនើប
៤.រៀបចំផែនការអាងស្ទឹង និងអាងទន្លេសាប
៥.ការអភិវឌ្ឍធនធានមនុស្ស។

ឯកឧត្តមរដ្ឋលេខាធិការប្រចាំការ បានថ្លែងអំណរគុណចំពោះធនាគារពិភពលោក ដែលបានផ្តល់នូវកិច្ចសហការយ៉ាងជិតស្និទ្ធ ហើយឯកឧត្តមក៏បានស្វាគមន៍ចំពោះគម្រោងដែលបាននិងកំពុងអនុវត្តជាមួយក្រសួង និងរាជរដ្ឋាភិបាលកម្ពុជា ក្នុងការជំរុញកំណើននៃការអភិវឌ្ឍសេដ្ឋកិច្ចកម្ពុជាឱ្យមានសន្ទុះឈានឡើងប្រកបដោយចីរភាព។

ជាមួយគ្នានេះ ប្រតិភូធនាគារពិភពលោកក៏បានជួបពិភាក្សាផងដែរ ជាមួយក្រុមការងារបច្ចេកទេសរបស់អាជ្ញាធរទន្លេសាប និងនាយកដ្ឋានបច្ចេកទេសពាក់ព័ន្ធនៃក្រសួងធនធានទឹក និងឧតុនិយមដែលរួមមាន៖ នាយកដ្ឋានវិស្វកម្ម នាយកដ្ឋានធារាសាស្ត្រកសិកម្ម នាយកដ្ឋានគ្រប់គ្រង និងអភិរក្សធនធានទឹក នាយកដ្ឋានជលសាស្ត្រ និងការងារទន្លេ និងនាយកដ្ឋានឧតុនិយម។

ជំនួបពិភាក្សាការងារបានបញ្ចប់ក្រោមបរិយាកាសរីករាយ និងប្រកបដោយភាពស្និទ្ធស្នាល ៕