រដ្ឋបាលខេត្ដក្រចេះ រៀបចំពិធីបុណ្យកឋិនទានរស្មីសាមគ្គី ដើម្បីដង្ហែវេរប្រគេនដល់ព្រះសង្ឃដែលគង់ចាំព្រះវស្សា គឺវត្តផល្លារាម (វត្តទួលមនោរម្យ) និងវត្តបទុមរាជា (វត្តដីដុះ)
ភ្នំពេញ៖ នារសៀលថ្ងៃអង្គារ ២កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៤ ខែវិច្ឆិកា ឆ្នាំ២០២៣ រដ្ឋបាលខេត្ដក្រចេះ បានរៀបចំនិមន្តព្រះសង្ឃ នមស្ការព្រះរតនត្រ័យ ចម្រើនព្រះបរិត្ត និងសម្ដែងព្រះធម៌ទេសនា ក្នុងពិធីបុណ្យកឋិនទានរស្មីសាមគ្គី ក្រោមអធិបតីភាព ឯកឧត្តម វ៉ា ថន អភិបាលខេត្តក្រចេះ និងលោកជំទាវ ហឹង ណារី ឯកឧត្តម ហឿ សុីយ៉ែម ប្រធានក្រុមប្រឹក្សាខេត្តក្រចេះ និងលោកជំទាវ អ៊ូ គឹមសួ ដើម្បីដង្ហែវេរប្រគេនដល់ព្រះសង្ឃដែលគង់ចាំព្រះវស្សាអស់ត្រីមាស ចំនួន២វត្ត គឺវត្តផល្លារាម (វត្តទួលមនោរម្យ) ស្ថិតនៅសង្កាត់ក្រគរ ក្រុងក្រចេះ និងវត្តបទុមរាជា(វត្តដីដុះ) ស្ថិតនៅឃុំព្រែកប្រសព្វ ស្រុកព្រែកប្រសព្វ ខេត្តក្រចេះ។
ដោយមានការចូលរួមយ៉ាងច្រើនកុះករពីសំណាក់ ថ្នាក់ដឹកនាំ មន្ត្រីរាជការ តាមមន្ទីរអង្គភាពជុំវិញខេត្ត មន្ត្រីរាជការក្រុង ស្រុក និងពុទ្ធបរិស័ទជិតឆ្ងាយផងដែរ។
គួរបញ្ជាក់ថា៖បុណ្យកឋិនទាន គឺជាពិធីបុណ្យប្រពៃណីព្រះពុទ្ធសាសនាមួយ ដែលប្រជាជនខ្មែរចាប់ផ្ដើមធ្វើបន្ទាប់ពីបុណ្យចេញព្រះវស្សា។ បុណ្យកឋិនទានតែងត្រូវបានដង្ហែចូលគ្រប់ទីអារាមទាំងអស់ចាប់ពីថ្ងៃ ១រោច ខែអស្សុជដល់ថ្ងៃ១៥កើត ខែកត្តិក គឺពុំមានវត្ដណាមួយត្រូវបានខកខានឡើយ។ ហើយបើទីអារាមណាមិនមានកឋិនទានណាមួយហែរចូលទេ ទីអារាមនោះក៏ត្រូវតែរៀបចំជាកឋិនទានចំណុះជើងវត្តដែរ ៕
