អាវរងារជាអំណោយដ៏ថ្លៃថ្លា របស់សម្ដេចតេជោ និងសម្ដេចកិតិ្តព្រឹទ្ធបណ្ឌិត ត្រូវបានចែកជូនយោធិន កងពលតូច ថ្មើរជើងលេខ ៤២ យោធភូមិភាគទី៤

ភ្នំពេញ៖ លោកឧត្តមសេនីយ៍ ត្រី នាក់ វង់ មេបញ្ជាការរង និងជានាយសេនាធិការ តំណាងដ៏ខ្ពង់ខ្ពស់ ឧត្តមសេនីយ៍ទោ ប៉ែន វ៉ូយ មេបញ្ជាការកងពលតូចថ្មើរជើងលេខ៤២ នៅថ្ងៃទី១៥ ខែវិច្ឆិកា ឆ្នាំ២០២៣ បានធ្វើការបើកចែកអាវរងារ ដែលជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រ និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់គ្រប់បណ្តាកងឯកភាព និង ជំនាញពាក់ព័ន្ធចំណុះ កងពលតូចថ្មើរជើងលេខ ៤២ យោធភូមិភាគទី៤។

ក្នុងឱកាសនេះដែរ លោកមេបញ្ជាការ បានបញ្ជាក់ថាតាមរយៈ ឯកឧត្តម ហ៊ុន ម៉ានិត មេបញ្ជាការរង កងទ័ពជើងគោក តំណាងដ៏ខ្ពង់ខ្ពស់របស់សម្តេចតេជោ និងសម្តេចកិតិ្តព្រឹទ្ធបណ្ឌិត ឯកឧត្តមបានមានប្រសាសន៍ថា សម្តេចទាំងទ្វេរតែងតែគិតគូរពីសុខភាពរបស់កងទ័ពគ្រប់កាលៈទេសៈ តួយ៉ាងជារៀងរាល់ឆ្នាំ នៅរដូវភ្លៀង បានចែកអាវភ្លៀង រដូវរងារ បានចែកអាវរងារ ជូនដល់យោធិនគ្រប់ៗរូប ។

ជំនួសមុខឲ្យ នាយទាហាន នាយទាហានរង និងពលទាហានទាំងអស់ក្នុង កងពលតូចថ្មើរជើងលេខ ៤២ លោកមេបញ្ជាការ សូមគោរពថ្លែងអំណរគុណ និងគោរពដឹងគុណយ៉ាងជ្រាលជ្រៅបំផុតជូនចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងទ្វេរ តែងតែយកចិត្តទុកដាក់ គិតគូរពីសុខទុក្ខ សុខមាលភាព និងជីវភាពរស់នៅរបស់កងកម្លាំងប្រដាប់អាវុធគ្រប់ប្រភេទ ជារៀងរាល់ឆ្នាំ ៕