លោក Marcos របស់ហ្វីលីពីនជួបជាមួយលោក Xi របស់ចិន ដើម្បីស្វែងរកមធ្យោបាយកាត់បន្ថយភាពតានតឹងនៅសមុទ្រចិនខាងត្បូង
ម៉ានីល៖ ប្រធានាធិបតីហ្វីលីពីន លោក Ferdinand Marcos Jr បានជួបជាមួយប្រធានាធិបតីចិន លោក Xi Jinping កាលពីថ្ងៃសៅរ៍ ទី១៨ ខែវិច្ឆិកា ដើម្បីស្វែងរកមធ្យោបាយ ដើម្បីកាត់បន្ថយភាពតានតឹងនៅសមុទ្រចិនខាងត្បូង និងស្តារលទ្ធភាពចូលនេសាទរបស់អ្នកនេសាទហ្វីលីពីនឡើងវិញ។
លោក Marcos បានប្រាប់អ្នកយកព័ត៌មាននៅខាងក្រៅកិច្ចប្រជុំ APEC នៅសាន់ហ្វ្រាន់ស៊ីស្កូថា ហ្វីលីពីន និងចិនចាំបាច់ត្រូវបន្តទំនាក់ទំនង ដោយកិច្ចប្រជុំជាផ្នែកសំខាន់នៃដំណើរការដើម្បីរក្សាសន្តិភាព និងរក្សាផ្លូវសមុទ្របើកចំហ និងផ្លូវអាកាសលើសមុទ្រចិនខាងត្បូង។
លោក Marcos បានលើកឡើងដោយមិនបានបញ្ជាក់លម្អិតថា៖ យើងបានព្យាយាមបង្កើតយន្តការដើម្បីបន្ថយភាពតានតឹងនៅសមុទ្រចិនខាងត្បូង។
លោក Marcos បានឲ្យដឹងថា លោកបានសម្តែងការព្រួយបារម្ភចំពោះឧប្បត្តិហេតុរវាងនាវាចិន និងហ្វីលីពីន រួមទាំងការប៉ះទង្គិចគ្នាមួយ។ លោកថា លោកក៏បានលើកឡើងពីទុក្ខលំបាករបស់អ្នកនេសាទហ្វីលីពីន។
ខ្ញុំបានស្នើឲ្យយើងត្រឡប់ទៅស្ថានការណ៍ដែលអ្នកនេសាទចិន និងហ្វីលីពីនកំពុងនេសាទជាមួយគ្នាក្នុងដែនទឹកទាំងនេះ។
ប្រភព៖ CNA
ប្រែសម្រួលដោយ៖ ហៃ ឆៃមុីនាង