សម្តេចធិបតី៖ បើសិនជាគ្មានស្ថិរភាពនិងសុខសន្តិភាពទេ នោះគ្មានឡើយដីដែលអាចបង្កបង្កើនផល និងទីផ្សារ

ភ្នំពេញ៖ ក្នុងឱកាសអញ្ជើញជាអធិបតីក្នុងពិធីប្រកាសដាក់ឲ្យប្រើប្រាស់ជាផ្លូវការ នូវគោល នយោបាយ អាទិភាពទី៥ និងទី៦ របស់រាជរដ្ឋាភិបាល នីតិកាលទី៧នៃរដ្ឋសភា នាព្រឹកថ្ងៃទី២០ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ទោះបីជាយើងដាក់ទិសដៅក្នុងការជំរុញការធ្វើពិពិធកម្ម ជំរុញការលើកកម្ពស់ឧស្សាហកម្ម សេវាកម្ម ឌីជីថលក៏ដោយ ក៏យើងមិនអាចដើរចោលកសិកម្មបានដែរ។

សម្តេចធិបតី នាយករដ្ឋមន្ត្រី បានថ្លែងបន្តថា ជាក់ស្ដែង កម្មវិធីគោលនយោបាយអាទិភាពទី ៥ និងទី៦នេះ គឺសំដៅពង្រឹង និងជំរុញបន្ថែមទៅលើការជួយទាញសក្តានុពលកសិកម្មរបស់យើង និងធ្វើយ៉ាងណាអោយបានផលបានច្រើនទៅដល់កសិកររបស់យើង។

ឆ្លៀតក្នុងឱកាសនោះ សម្តេចធិបតី នាយករដ្ឋមន្ត្រី ក៏បានអបអរសាទរចំពោះពូជអង្ករស្រូវសែនក្រអូបកម្ពុជា ដែលបានឈ្នះពានរង្វាន់មាសក្នុងកម្មវិធីវាយតម្លៃគុណភាពរសជាតិប្រភេទអង្ករ សម្រាប់អង្ករសគ្រាប់វែង ចិន-អាស៊ាន លើកទី១ ដែលរៀបចំដោយវិទ្យាស្ថានស្រូវនៃបណ្ឌិតសភាវិទ្យាសាស្រ្តកសិកម្មខេត្តគួងស៊ី ប្រទេសចិនកាលពីថ្ងៃទី២៨ ខែតុលា ឆ្នាំ២០២៣ ៕