រដ្ឋបាលខេត្តក្រចេះ បើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំទី៥ ឆ្នាំ២០២៣ នៅក្នុងស្រុកស្នួល

ភ្នំពេញ៖ នាព្រឹកថ្ងៃអង្គារ ៩កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២១ ខែវិច្ឆិកា ឆ្នាំ២០២៣ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ និងឯកឧត្តម វ៉ា ថន អភិបាលខេត្តក្រចេះ បានអញ្ជើញដឹកនាំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្ត អាណត្តិទី៣ ឆ្នាំទី៥ ឆ្នាំ២០២៣ ស្ថិតនៅសាលាឃុំស្វាយជ្រះ ស្រុកស្នួល ខេត្តក្រចេះ។

ដោយមានការចូលរួមពីឯកឧត្តម លោកជំទាវសមាជិកក្រុមប្រឹក្សាខេត្ត អភិបាលរងខេត្ត ប្រធាន-អនុប្រធានមន្ទីរអង្គភាពជុំវិញខេត្ត កងកម្លាំងទាំងបី នាយករងរដ្ឋបាលខេត្ត លោក លោកស្រីអភិបាល អភិបាលរងស្រុក មេឃុំ និងបងប្អូនប្រជាពលរដ្ឋ។

ឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត មានប្រសាសន៍បញ្ជាក់ពីគោលបំណងនៃការបើកវេទិកានេះឡើង គឺដើម្បីផ្សព្វផ្សាយដល់ប្រជាពលរដ្ឋ ឲ្យបានដឹងនូវសមិទ្ធផលដែលរដ្ឋបាលខេត្ត សម្រេចបានកន្លងមក និងមានគម្រោងជាអទិភាពនានាក្នុងឆ្នាំកន្លងមក ហើយក៏នឹងផ្តល់ឱកាសដល់ប្រជាពលរដ្ឋ បានបញ្ចេញនូវមតិយោបល់ សំណូមពរ រួមទាំងបញ្ហាប្រឈមរបស់ខ្លួន ដើម្បីឲ្យមន្ទីរជំនាញពាក់ព័ន្ធបកស្រាយ និងនាំយកបញ្ហាទាំងនោះមកពិភាក្សានាំគ្នាដោះស្រាយ និងឆ្លើយតបប្រកបដោយប្រសិទ្ធភាព។

អង្គវេទិការបានទទួលការសំណូមពរ និងបញ្ហាប្រឈមចំនួន១៥ ដែលបងប្អូនប្រជាពលរដ្ឋបានលើកនិងស្នើសុំ ក្នុងនោះរួមមាន ៖
-ស្នើរសុំចំណីដីទ្រនាប់ដងអូរដើម្បីដាំដុះ
-ស្នើសុំឲ្យជួសជុលលូរដែលខូចទ្រុឌទ្រោម
-សុំជួសជុលផ្លូវនិងធ្វើស្ពានឆ្ពោះទៅសាលារៀន
-សុំកាត់ឆ្វៀលដីដើម្បីធ្វើផ្លូវចូលភូមិឧបសម្ព័ន្ធ
-សុំឲ្យក្រុមហ៊ុនវិនិយោគ ជួយបាញ់ទឹកស្រោចផ្លូវ កាត់បន្ថយការហ៊ុយ និងកុំឲ្យប៉ះពាល់សុខភាពរស់នៅប្រចាំថ្ងៃ
-បញ្ហាចោរកម្ម
-បញ្ហាខ្វះខាតប្រព័ន្ធទឹកប្រើប្រាស់ប្រចាំថ្ងៃ និងស្នើរសុំតបណ្តាញទឹកស្អាតចូលភូមិ
-ស្នើសុំជួសជុលនិងធ្វើផ្លូវនៅកំណាត់ផ្លូវជាតិលេខ៧៦
-សុំសម្លៀកបំពាក់ឯកសណ្ឋានប្រជាការពារ
-បញ្ហាទឹកលិចទំនប់ មិនអាចចរាចរណ៍ប្រមូលដឹកកសិផលចេញ និងបញ្ហាដីសហគមន៍។

ពាក់ព័ន្ធទៅនឹងសំណើរសំណូមពរខាងលើ ឯកឧត្តមប្រធាននិងជំនាញ បានដោះស្រាយនឹងកន្លែងបានចំនួន១៤ នៅសល់១សំណូមពរ ទុកឲ្យរដ្ឋបាលស្រុកជាអ្នកដោះស្រាយ ៕