រដ្ឋបាលខេត្តក្រចេះ រៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំទី៥ ឆ្នាំ២០២៣ ក្នុងស្រុកអូរគ្រៀងសែនជ័យ
ភ្នំពេញ៖ នៅព្រឹកថ្ងៃពុធ ១០កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២២ ខែវិច្ឆិកា ឆ្នាំ២០២៣នេះ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ និងឯកឧត្តម វ៉ា ថន អភិបាលខេត្តក្រចេះ បានអញ្ជើញដឹកនាំវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្ត អាណត្តិទី៣ ឆ្នាំទី៥ ឆ្នាំ២០២៣ ស្ថិតនៅវត្តខេត្តនារាម(វត្តស្រែត្រែង) ឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ។ ដោយមានការចូលរួមពីឯកឧត្តម លោកជំទាវសមាជិកក្រុមប្រឹក្សាខេត្ត អភិបាលរងខេត្ត ប្រធាន-អនុប្រធានមន្ទីរអង្គភាពជុំវិញខេត្ត កងកម្លាំងទាំងបី នាយករងរដ្ឋបាលខេត្ត លោក លោកស្រីអភិបាល អភិបាលរងស្រុក មេឃុំ និងបងប្អូនប្រជាពលរដ្ឋ។
ឯកឧត្តម ហឿ សុីយ៉ែម ប្រធានក្រុមប្រឹក្សាខេត្ត មានប្រសាសន៍បញ្ជាក់ពីគោលបំណងនៃការបើកវេទិកានេះឡើង គឺដើម្បីផ្សព្វផ្សាយដល់ប្រជាពលរដ្ឋ ឲ្យបានដឹងនូវសមិទ្ធផលដែលរដ្ឋបាលខេត្ត សម្រេចបានកន្លងមក និងមានគម្រោងជាអទិភាពនានាក្នុងឆ្នាំកន្លងមក ហើយក៏នឹងផ្តល់ឱកាសដល់ប្រជាពលរដ្ឋ បានបញ្ចេញនូវមតិយោបល់ សំណូមពរ រួមទាំងបញ្ហាប្រឈមរបស់ខ្លួន ដើម្បីឲ្យមន្ទីរជំនាញពាក់ព័ន្ធបកស្រាយ និងនាំយកបញ្ហាទាំងនោះមកពិភាក្សានាំគ្នាដោះស្រាយ និងឆ្លើយតបប្រកបដោយប្រសិទ្ធភាព។
ក្នុងអង្គវេទិការ បានផ្តល់ឱកាសដល់ប្រជាពលរដ្ឋ បានបញ្ចេញនូវមតិយោបល់ សំណូមពរ រួមទាំងបញ្ហាប្រឈមរបស់ខ្លួន ដើម្បីឲ្យមន្ទីរជំនាញពាក់ព័ន្ធបកស្រាយ និងនាំយកបញ្ហាទាំងនោះមកពិភាក្សានាំគ្នាដោះស្រាយ ដោយក្នុងនោះអង្គវេទិកាបានទទួលសំណូមពរ និងបញ្ហាប្រឈមចំនួន២០ និងដោះស្រាយបាន១៧ ដែលបងប្អូនប្រជាពលរដ្ឋបានលើកនិងស្នើសុំ ក្នុងនោះរួមមាន៖
-សុំស្ពានឆ្លងព្រែកចូលភូមិ
-បញ្ហាខុសសំបុត្រកំណើតនិងឯកសារនានា
-សុំសំលៀកបំពាក់ប្រជាការពារ -បញ្ហាទំនាស់ដីជាមួយក្រុមហ៊ុនវិនិយោគ និងទំនាស់ដីជាមួយសហគមន៍
-ស្នើសុំលូរំដោះទឹកបន្ថែម ដើម្បីដោះទឹកបានលឿន ទប់ស្កាត់ការហូរដាច់និងខូចផ្លូវ
-បញ្ហាធ្វើអត្តសញ្ញាណប័ណ្ណរួចហើយ តែមិនទាន់បានទទួល
-ស្នើសុំតបណ្តាញអគ្គីសនីចូលភូមិ និងបញ្ហាផ្សេងៗមួយចំនួនទៀត ៕
