កាកបាទក្រហមកម្ពុជា រៀបចំកិច្ចប្រជុំបូកសរុបវឌ្ឍនភាពការងារអភិវឌ្ឍយុវជន និងអ្នកស្ម័គ្រចិត្តកាកបាទក្រហមកម្ពុជា ២៥រាជធានី-ខេត្ត និងគ្រឹះស្ថានឧត្តមសិក្សាក្នុងរាជធានីភ្នំពេញ
ភ្នំពេញ៖ នៅថ្ងៃទី ២៣ ខែវិច្ឆិកា ឆ្នាំ២០២៣នេះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានអញ្ជើញជាអធិបតីភាពក្នុងពិធីបើកកិច្ចប្រជុំបូកសរុបវឌ្ឍនភាពការងារអភិវឌ្ឍយុវជន និងអ្នកស្ម័គ្រចិត្តកាកបាទក្រហមកម្ពុជា ២៥រាជធានី-ខេត្ត និងគ្រឹះស្ថានឧត្តមសិក្សាក្នុងរាជធានីភ្នំពេញ ដែលកិច្ចប្រជុំនេះប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា ដោយមានការអញ្ជើញចូលរួមពីថ្នាក់ដឹកនាំ មន្ត្រី អ្នកស្ម័គ្រចិត្តនៃទីស្នាក់ការកណ្តាល, គណៈកម្មាធិការសាខា, មន្ត្រីប្រតិបត្តិសាខា, មន្ត្រីប្រតិបត្តិទទួលបន្ទុកការងារយុវជន និងអ្នកស្ម័គ្រចិត្ត, ទីប្រឹក្សាយុវជន និងតំណាងយុវជនកាកបាទក្រហមកម្ពុជា សរុបចំនួន ១៣០នាក់។
កិច្ចប្រជុំរយៈពេលមួយថ្ងៃពេញនេះ នឹងដំណើរការទៅតាមរបៀបវារៈដែលបានគ្រោងទុក ដើម្បីពង្រឹងនិងពង្រីកសកម្មភាពការងារ និងបង្ហាញវឌ្ឍនភាពការងារយុវជន និងអ្នកស្ម័គ្រចិត្តកាកបាទក្រហមកម្ពុជា ដែលបាននិងកំពុងចូលរួមក្នុងសកម្មភាពមនុស្សធម៌កាកបាទក្រហមកម្ពុជា ក្នុងឆ្នាំ២០២៣ និងទិសដៅអនុវត្តបន្ដ។
អង្គប្រជុំនឹងពិនិត្យការអនុវត្ត អនុស្សរណៈយោគយល់រវាងកាកបាទក្រហមកម្ពុជា និងក្រសួងអប់រំ យុវជន និងកីឡា ជាពិសេសផ្ដោតលើការកសាងផែនការអភិវឌ្ឍឆ្នាំ២០២៤ និងបន្តបន្ទាប់៕
