ឯកឧត្តម វ៉ា ថន ជួបសំណេះសំណាលជាមួយគណៈកម្មការគ្រប់គ្រងទូក ង ដែលត្រូវចូលរួមប្រណាំង នាឱកាសថ្ងៃបុណ្យអុំទូក នៅរាជធានីភ្នំពេញ
ភ្នំពេញ៖ នារសៀលថ្ងៃព្រហស្បតិ៍ ១១កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៣ ខែវិច្ឆិកា ឆ្នាំ២០២៣ ឯកឧត្តម វ៉ា ថន អភិបាលខេត្តក្រចេះ បានអញ្ជើញជួបសំណេះសំណាល និងណែនាំដល់គណៈកម្មការគ្រប់គ្រងទូក ង ដែលត្រូវចូលរួមប្រកួតប្រណាំងក្នុងព្រះរាជពិធីបុណ្យអុំទូក បណ្តែតប្រទីត និងសំពះព្រះខែ អកអំបុក នាថ្ងៃទី២៦-២៧-២៨ ខែវិច្ឆិកា ឆ្នាំ២០២៣ខាងមុខនេះ។
ឯកឧត្តម វ៉ា ថន អភិបាលខេត្ត បានមានប្រសាសន៍ទៅកាន់គណៈកម្មការដឹកនាំទូក ង ត្រូវត្រៀមលក្ខណៈដើម្បីដឹកជញ្ជូនក្រុមកីឡាករតាមរថយន្ត និងអូសសណ្ដោងតាមផ្លូវទឹក ទៅរាជធានីភ្នំពេញឲ្យបានល្អ នឹងមានសុវត្ថិភាព ហើយនៅពេលមកដល់ភ្នំពេញ ក្រុមការងារនិងគណៈកម្មការត្រូវយកចិត្តទុកដាក់លើការស្នាក់នៅហូបចុក អនាម័យ និងសុខភាពរបស់ក្រុមកីឡាករ។
ម្យ៉ាងវិញទៀត គណៈកម្មការ និងក្រុមកីឡាករទូក ង ត្រូវគោរពវិន័យបទបញ្ជា មានការឯកភាពផ្ទៃក្នុងល្អ និងចេះយោគយល់អធ្យាស្រ័យគ្នាទៅវិញទៅមក គឺត្រូវខិតខំហ្វឹកហាត់ និងរួមកម្លាំងគ្នាដើម្បីធ្វើយ៉ាងណាឲ្យទូក ង កាន់តែលឿនដើម្បីយកជ័យជម្នះ និងកិត្តិយសជូនខេត្ត និងហាមដាច់ខាតមិនត្រូវពិសារគ្រឿងស្រវឹង។
សូមបញ្ជាក់ដែរថា៖ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក សម្រាប់ខេត្តក្រចេះ មានទូក ង ចំនួន២០ទូក ក្នុងនោះមាន ទូកខ្នាតពិសេសចំនួន៤ទូក និងទូកខ្នាតអន្តរជាតិចំនួន១៦ទូក។ ក្នុងនោះដែរឯកឧត្តមអភិបាលខេត្ត បានប្រគល់នូវគ្រឿងបិរភាប និងថវិការួមមាន ៖ ទូកខ្នាតពិសេសទាំង៤ទូក ក្នុង១ទូក ទទួលបានថវិកា ៣,០០០,០០០រៀល ភេសជ្ជៈ១៥កេស មី១៥កេស និងអង្ករ២៥០គីឡូក្រាម និងទូកខ្នាតអន្តរជាតិក្នុង១ទូក ទទួលបានថវិកាចំនួន ១,០០០,០០០រៀល ភេសជ្ជៈ៥កេស មី៥កេស និងអង្ករ១០០គីឡូក្រាម ៕
