ឯកឧត្តម ឈួរ សុបញ្ញា អញ្ជើញចូលរួមក្នុងពិធីអភិសេកព្រះរូបសំណាកព្រះឥសី សួង ហៅទេវតាដើរដី នៅវត្តកាសេមរតនារាម ហៅវត្តធម្មយុត្តិ ក្នុងក្រុងកំពង់ឆ្នាំង

ភ្នំពេញ៖ នាព្រឹកថ្ងៃសៅរ៍១៣កើត ខែកក្តិក ឆ្នាំថោះបញ្ចស័កព.ស.២៥៦៧ ត្រូវនិងថ្ងៃទី២៥ ខែវិច្ឆិកា ឆ្នាំ២០២៣ នៅវត្តកាសេមរតនារាម ហៅវត្តធម្មយុត្តិ ស្ថិតក្នុងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង បានប្រារព្ធពិធីអភិសេកព្រះរូបសំណាកព្រះឥសី សួង ហៅទេវតាដើរដី និងរៀបចំចង្ហាន់ប្រគេនព្រះសង្ឃចំនួន៥៥អង្គ។

ពិធីនេះប្រារព្ធក្រោមអធិបតីភាព ឯកឧត្តម ឈួរ សុបញ្ញា រដ្ឋលេខាធិការក្រសួងមុខងារសាធារណៈ ដោយមានការនិមន្តនិងអញ្ជើញចូលរួមពីលោក
សរ លាង ប្រធានមន្ទីរធម្មការ និង សាសនា ខេត្តកំពង់ឆ្នាំង និងមានការនិមន្តចូលរួមពី ព្រះសរណមង្គល ប៉ុណ្យ ប៊ុនជីង ព្រះសមុហ៍គណខេត្ត,ព្រះសិរីធម្មញាណ នុច មុនី ព្រះលេខា
ធិការគណខេត្ត ,ព្រះវិមលញាណ ឆន ឆុង ព្រះអនុគណក្រុងកំពង់ឆ្នាំង និងព្រះមង្គលានុរ័ក្ខ អំ សៃ ព្រះជំនួយការសាលាគណខេត្ត និងជាព្រះចៅអធិការវត្តកាសេមរតនារាម ហៅវត្តធម្មយុត្តិព្រមទាំងមានការនិមន្តចូលរួមពីព្រះសង្ឃក្នុងវត្ត និង ពុទ្ធបរិស័ទផងដែរ។

ពិធីបានប្រារព្ធធ្វើតាមលំដាប់លំដោយនៃប្រពៃណីព្រះពុទ្ធសាសនា ដោយថ្វាយគ្រឿងសក្ការៈបូជា ព្រះមន្រ្តីសង្ឃជ័យន្តោ ថ្វាយព្រះរូបសំណាកព្រះឥសី សួង ហៅទេវតាដើរដី រួចមក ឯកឧត្តម ឈួរ សុបញ្ញា, លោក សរ លាង ព្រមទាំងអ្នកចូលរួមបានធ្វើការបួងសួង សុំពរជ័យ សិរីមង្គលសួស្តីចូលមានដល់សម្តេចសង្ឃគ្រប់ព្រះអង្គ ថ្នាក់នាំមន្រ្តីមន្រ្តីសង្ឃគ្រប់លំដាប់ថ្នាក់ ព្រះសង្ឃគ្រប់ព្រះអង្គ សម្តេចថ្នាក់ដឹកនាំប្រធានព្រឹទ្ធសភា, សម្តេចប្រធានរដ្ឋសភា និងសម្តេចតេជោប្រធានគណបក្សប្រជាជនកម្ពុជា សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា សម្តេចមហាបវរធិបតី នាយករដ្ឋមន្រ្តី ថ្នាក់ដឹកនាំខេត្ត មន្រ្តីរាជការ និង ប្រជាពលរដ្ឋទាំងអស់ សូមមានព្រះសុខភាព ព្រះជន្មយឺនយូរ និងសុខភាពល្អ ជន្មាយុយឺនយូរ រួមគ្នារក្សាសុខសន្តិភាពដែលមានបច្ចុប្បន្នក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាលអោយនៅគង់វង្ស និង ទុកជាកេរ្តិ៍តំណែលសំរាប់កូនខ្មែរជំនាន់ក្រោយគោរពបូជា ៕