សម្តេចធិបតី ឃួន សុដារី អញ្ជើញចូលរួមព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអំបុក ថ្ងៃទី១ ក្រោមព្រះរាជាធិបតីដ៏ខ្ពង់ខ្ពស់បំផុតនៃព្រះមហាក្សត្រ
ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានអញ្ជើញចូលរួមដង្ហែព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលទ្រង់សព្វព្រះរាជហឫទ័យស្តេចយាងជាព្រះរាជាធិបតីដ៏ខ្ពង់ខ្ពស់បំផុតទត នូវព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងថ្ងៃទី១ នៅថ្ងៃទី២៦ ខែវិច្ឆិកា ឆ្នាំ២០២៣ នៅមុខព្រះបរមរាជវាំង រាជធានីភ្នំពេញ។
យាង និងអញ្ជើញចូលរួមព្រះរាជពិធីនេះដែរ មានវត្តមានសម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមទីប្រឹក្សាផ្ទាល់ព្រះមហាក្សត្រ សម្តេចអគ្គមហាពញាចក្រី ហេង សំរិន ប្រធានកិត្តិយសក្រុមឧត្តមទីប្រឹក្សាផ្ទាល់ព្រះមហាក្សត្រ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ព្រមទាំងព្រះវត្តមាន វត្តមានទ្រង់ សម្តេច ឯកឧត្តម លោកជំទាវ សមាជិកសមាជិកឧត្តមប្រឹក្សាផ្ទាល់មហាក្សត្រ ឯកឧត្តមជាឧបនាយករដ្ឋមន្រ្តី ទេសរដ្ឋមន្រ្តី រដ្ឋមន្រ្តី ឯកអគ្គរាជទូត រដ្ឋទូតប្រចាំកម្ពុជា និងថ្នាក់ដឹកនាំជាច្រើនរូបទៀត។
ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ជាព្រះរាជពិធីបុណ្យដ៏ល្អផូរផង់របស់ខ្មែរមានតំាងពីយូរលង់មកហើយ។ នៅឆ្នាំនេះមានទូកងជាង៣០០បានចូលរួម និងមានប្រទីបចំនួន៣០ នឹងបណ្តែតខ្លួន តាមដងទន្លេសាប នាពេលរាត្រី ញ៉ាំងឱ្យបរិយាកាសនៃការប្រារព្ធកម្មវិធីបុណ្យនាឆ្នាំនេះ កាន់តែអធិកអធមនិងមហាឱឡារិកឡើង។
ទិដ្ឋភាពនៅមាត់ទន្លេមុខព្រះបរមរាជវាំង មានវត្តមានបងប្អូនប្រជាពលរដ្ឋ ភ្ញៀវជាតិ អន្តរជាតិជាច្រើនកុះករមកពីគ្រប់ទិសទីដើរកម្សាន្តនៅក្នុងព្រះរាជពិធីបុណ្យ រួមទាំងកីឡាករប្រណាំងទូកប្រកបដោយភាពសប្បាយរីករាយ។ ក្រៅពីការទស្សនាការ ប្រណាំងទូកងនៅមាត់ទន្លេ បងប្អូនប្រជាពលរដ្ឋក៏អាចទស្សនា និងទិញទំនិញតាមស្តង់តាំងពិពរណ៌ទំនិញជាច្រើននៅតាមទីតាំងនីមួយៗផងដែរ។
សូមឱ្យបងប្អូនប្រជាពលរដ្ឋដើរកម្សាន្តសប្បាយរីករាយជាមួយព្រះរាជពិធីបុណ្យ ដោយចេះគោរពអធ្យាស្រ័យឱ្យគ្នាទៅវិញទៅមក គោរពច្បាប់ចរាចរណ៍ និងថែរក្សាការពារសុខភាព និងធ្វើអនាម័យឱ្យបានជាប់ជាប្រចាំ ។
រាជធានីភ្នំពេញយើងបានផ្លាស់ប្តូរមុខមាត់យ៉ាងខ្លំាងនិងឆាប់រហ័ស អគារធំនិងខ្ពស់ៗ រីកដូចផ្សិតដែលជាទីមោទកភាព របស់យើងទំាងអស់គ្នា។ អ្វីដែលយើងទទួលបាននាពេលនេះ កើតចេញពីសុខសន្តិភាព ដូច្នេះយើងរួមគ្នាថែរក្សា ការពារសុខសន្តិភាពឱ្យបានគង់វង្ស ជានិច្ចនិរន្តន៍តទៅ៕
