មន្ត្រីជាន់ខ្ពស់ក្រសួងធនធានទឹក ចុះពិនិត្យកិច្ចការសន្តិសុខទឹកតាមតំបន់ព្រំដែន ក្នុងភូមិសាស្ត្រខេត្តបន្ទាយមានជ័យ

ភ្នំពេញ៖ នៅថ្ងៃទី២៨ ខែវិច្ឆិកា ឆ្នាំ២០២៣ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម និងសហការី រួមជាមួយ ប្រធាននិងអនុប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានចុះពិនិត្យកិច្ចការសន្តិសុខទឹកតាមតំបន់ព្រំដែន ក្នុងភូមិសាស្ត្រខេត្តបន្ទាយមានជ័យ។

សូមជម្រាបថា ទឹកជំនន់ពីប្រទេសថៃពីខេត្តសុរិន្ទ និងខេត្តស្រះកែវ តែងតែយាយីបង្កការជន់លិចដល់តំបន់ស្រុកថ្មពួក ស្រុកភ្នំស្រុក ស្រុកព្រះនេត្រព្រះ ស្រុកស្វាយចេក និងក្រុងសិរីសោភ័ណ ខេត្តបន្ទាយមានជ័យ រហូតដល់ស្រុកក្រឡាញ់ និងស្រុកស្រីស្នំ ខេត្តសៀមរាប។

ក្នុងឱកាសនោះ ឯកឧត្តមរដ្ឋលេខាធិការបានឱ្យដឹងថា ដោយទទួលបាននូវកិច្ចសហការប្រតិបត្តិការយ៉ាងជិតស្និទ្ធពីក្រសួងសេដ្ឋកិច្ច និងហិរញ្ញវត្ថុ ការចុះពិនិត្យដើម្បីសិក្សាបន្ទាន់ និងឈានទៅធ្វើការសាងសង់នាពេលដ៏ខ្លីខាងមុខគឺចាប់ពីភូមិសាស្រ្តចំណុចចាប់ផ្តើមក្បាលស្ទឹងស្វាយចេកក្នុងតំបន់ភ្នំឆត្រ តំបន់ខេត្តស្រះកែវ ប្រទេសថៃ តំបន់ច្រកក្តឹបថ្ម និងតំបន់ប្រតិសកម្មរវាងស្ទឹងស្វាយចេកនិងស្ទឹងកំបុត រហូតដល់គីឡូមែត្រទី៦០​ក្នុងស្រុកស្វាយចេក និងក្រុងសិរីសោភ័ណ ខេត្តបន្ទាយមានជ័យ។

ឯកឧត្តមរដ្ឋលេខាធិការបញ្ជាក់ថា ដើម្បីបញ្ចៀសនូវការជន់លិច ការចាត់វិធានការគ្រប់គ្រងទឹក ប្រើប្រាស់ទឹក និងបញ្ជាទឹកលើស្ទឹងស្វាយចេក និងស្ទឹងកំបុតជាកិច្ចការចាំបាច់បំផុត៕