កម្ពុជាលុបចោលគម្រោងសាងសង់រោងចក្រអគ្គិសនីដើរដោយធ្យូងថ្ម តម្លៃ១៥០០លានដុល្លារ ដែលមានអនុភាព៧០០មេហ្គាវ៉ាត់ នៅខេត្តកោះកុង
ភ្នំពេញ៖ កម្ពុជាបានសម្រេចលុបចោលហើយនូវគម្រោងសាងសង់រោងចក្រអគ្គិសនី ដំណើរការដោយធ្យូងថ្មតម្លៃ១៥០០លានដុល្លារអាម៉េរិក ដែលមានអានុភាព៧០០មេហ្គាវ៉ាត់ នៅក្នុងខេត្តកោះកុង ដោយនឹងសាងសង់ជំនួសវិញនូវរោងចក្រថាមពលអគ្គិសនីដើរដោយឧស្ម័នធម្មជាតិរាវ ឬ LNG ជំនួសវិញ ដែលមានអនុភាពដល់៨០០មេហ្គាវ៉ាត់។
នេះបើតាមការចុះផ្សាយរបស់សារព័ត៌មានរ៉យទ័រ ក្នុងកិច្ចសម្ភាសផ្តាច់មុខមួយជាមួយរដ្ឋមន្ត្រីក្រសួងរ៉ែ និងថាមពលរបស់កម្ពុជា។
រដ្ឋមន្ត្រីក្រសួងរ៉ែ និងថាមពល ឯកឧត្តម កែវ រតនៈ បានប្រាប់សារព័ត៌មានរ៉យទ័រថា គម្រោងថ្មីរបស់កម្ពុជា គឺកំពុងសម្លឹងឃើញការសាងសង់ស្ថានីយទទួល និងផ្ទុកឧស្ម័នធម្មជាតិរាវ (LNG) ដើម្បីនាំចូលថាមពលប្រភេទនេះ សម្រាប់ការប្រើប្រាស់ក្នុងរោងចក្រថាមពល។ ស្ថានីយទុកឧស្ម័ន LNG ដែលកម្ពុជាគ្រោងបង្កើត គឺជាប្រភេទស្ថានីយស្ថិតនៅលើផ្ទៃដី ហើយកម្ពុជានឹងក្លាយជាទីផ្សារនាំចូលឧស្ម័នប្រភេទនេះថ្មីមួយទៀត នៅក្នុងតំបន់អាស៊ាន។ ជាក់ស្តែងប្រទេសវៀតណាម និងហ្វីលីពីនបានចាប់ផ្តើមនាំចូល LNG ចាប់តាំងពីឆ្នាំនេះទៅហើយ។
ឯកឧត្តម កែវ រតនៈ បានប្រាប់រ៉យទ័រយ៉ាងដូច្នេះថា៖«នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត នឹងប្រកាសនៅថ្ងៃទី៣០ ខែវិច្ឆិកា ឆ្នាំ២០២៣ អំពីការលុបចោលគម្រោងវិនិយោគសាងសង់រោងចក្រអគ្គិសនីធ្យូងថ្ម អានុភាព៧០០មេហ្គាវ៉ាត់ ខេត្តកោះកុង និងប្រកាសពីផែនការជំនួសវិញដោយថាមពល៨០០មេហ្គាវ៉ាត់ ដែលនឹងដាក់ឱ្យដំណើរការក្រោយឆ្នាំ២០៣០»។ ទោះជាយ៉ាងណា រដ្ឋមន្ត្រីរូបនេះ មិនបានបញ្ជាក់ថា តើរោងចក្រផលិតថាមពលថ្មី និងស្ថានីយ LNG អាចនឹងចំណាយថវិកាប៉ុន្មាននោះទេ។
ឯកឧត្តម កែវ រតនៈ បានឱ្យដឹងថា ការសម្រេចចិត្តលុបចោលគម្រោងធ្យូងថ្មដែលគ្រោងនឹងចាប់ផ្តើមផលិតថាមពលនៅចុងឆ្នាំ២០២៥មួយនេះ ឆ្លុះបញ្ចាំងពីការប្តេជ្ញាចិត្តរបស់ប្រទេសកម្ពុជា ចំពោះការប្រើប្រាស់ថាមពលបៃតង។ កម្ពុជាចង់បង្កើនការផលិត និងប្រើប្រាស់ថាមពលស្អាតពី៥០ភាគរយនៃការប្រើប្រាស់សរុបនៅឆ្នាំ២០២២ ដល់ ៧០ភាគរយនៅឆ្នាំ២០៣០ តាមរយៈការសាងសង់រោងចក្រផលិតថាមពលពីសូឡាពន្លឺព្រះអាទិត្យ ខ្យល់ និងគម្រោងទំនប់វារីអគ្គិសនីថ្មីៗ។ បើតាមរ៉យទ័រ រោងចក្រធ្យូងថ្ម ដែលត្រូវវិនិយោគក្នុងទឹកប្រាក់ជាង១៥០០លានដុល្លារមានទីតាំងនៅស្រុកបុទុមសាគរ ខេត្តកោះកុងនេះ ត្រូវបានសកម្មជនអ្នកការពារបរិស្ថាន និងពលរដ្ឋក្នុងតំបន់រិះគន់ថា បានទន្ទ្រានយកដីព្រៃដ៏ក្រាស់បំផុតរបស់កម្ពុជា រំខានដល់ការរស់នៅ និងបំពុលដល់តំបន់ដែលជាជម្រកនៃប្រភេទសត្វជិតផុតពូជរាប់សិបប្រភេទ ជាមួយនឹងធូលីធ្យូងថ្ម។
កម្ពុជាមានតម្រូវការថាមពលកើនឡើងប្រហែល១៥ភាគរយជារៀងរាល់ឆ្នាំ ក្នុងប៉ុន្មានទសវត្សរ៍ចុងក្រោយនេះ បានប្រើប្រាស់ថាមពលវារីអគ្គិសនីដើម្បីដោះស្រាយតម្រូវការអគ្គិសនីដែលកើនឡើង មិនដូចប្រទេសដទៃទៀតនៅក្នុងតំបន់ដូចជាម៉ាឡេស៊ី និងវៀតណាមឡើយ ដែលកំពុងងាកទៅរកការប្រើថាមពលធ្យូងថ្ម។ គេនៅចាំបានថា ប្រហែលពីរឆ្នាំមុន រាជរដ្ឋាភិបាលកម្ពុជាធ្លាប់បានប្រកាសថា ខ្លួននឹងមិនសាងសង់គម្រោងអគ្គិសនីដើរដោយធ្យូងថ្មថ្មីៗទៀតទេ លើកលែងតែគម្រោងដែលបាននិងកំពុងសាងសង់រួចទៅហើយ។ ជាមួយនឹងការលុបចោលគម្រោងរោងចក្រធ្យូងថ្មនៅបុទុមសាគរ គម្រោងថាមពលធ្យូងថ្មតែមួយគត់របស់កម្ពុជាដែលនៅសេសសល់ និងកំពុងស្ថិតក្រោមការអភិវឌ្ឍ គឺមានខ្នាតតូចទំហំត្រឹម២៦៥មេហ្កាវ៉ាត់ នៅក្នុងខេត្តឧត្តរមានជ័យ។
សូមជម្រាបថា បើតាមរដ្ឋមន្រ្តីក្រសួងរ៉ែ និងថាមពល គម្រោងរោងចក្រថាមពលធ្យូងថ្មនៅស្រុកបុទុមសាគរ ដំបូងឡើយនឹងត្រូវសាងសង់ គ្រប់គ្រង និងដំណើរការដោយក្រុមហ៊ុនក្នុងស្រុក Royal Group របស់អ្នកឧកញ៉ា គិត ម៉េង ដែលជាក្រុមហ៊ុនវិនិយោគលើវិស័យទូរគមនាគមន៍ និងដឹកជញ្ជូនផងដែរ។ យ៉ាងណាពេលនេះក្រុមហ៊ុនដដែលនេះ នឹងទទួលបន្ទុកសាងសង់គម្រោងថាមពល LNG នេះជាបន្ត៕
