មេទ័ពជើងគោក៖ ការដាក់យោធិនអាជីពទាំងពីរភេទឱ្យចូលសោធននិវត្តន៍ ដើម្បីចូលរួមទទួល យកផែនការ ធ្វើការអនុវត្តឱ្យស្របតាម គោលនយោបាយកំណែទម្រង់ក្នុងជួរកងយោធពលខេមរភូមិន្ទ
ភ្នំពេញ៖ ថ្លែងនៅក្នុងកិច្ចប្រជុំផ្សព្វផ្សាយសេចក្ដីណែនាំស្តីពីវិធានការចាត់តាំងអនុវត្ត ការដាក់យោធិនអាជីពទាំងពីរភេទឱ្យចូលសោធននិវត្តន៍ យោធិនពិការ និងពលី-មរណៈ សម្រាប់ឆ្នាំ២០២៤ នៅកងពលតូចលេខ៧០ នារសៀលថ្ងៃទី១ ខែធ្នូ ឆ្នាំ២០២៣ នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានមានប្រសាសន៍ថា ការដាក់យោធិនអាជីពទាំងពីរភេទឱ្យចូលសោធននិវត្តន៍ ដើម្បីចូលរួមទទួលយកផែនការ ធ្វើការអនុវត្តឱ្យស្របតាម គោលនយោបាយកំណែទម្រង់ ក្នុងជួរកងយោធពលខេមរភូមិន្ទ ដោយផ្អែកតាមច្បាប់ សោធននិវត្តន៍ សោធនបាត់បង់សមត្ថភាពការងារ ចំពោះយោធិនទាំងពីរភេទ នៃកងយោធពលខេមរភូមិន្ទ និងស្របតាមគោលនយោបាយរបស់ប្រមុខរាជរដ្ឋាភិបាលកម្ពុជា។
នាយឧត្តមសេនីយ៍ ម៉ៅ សុផាន់ បានបន្ថែមទៀតថា ដើម្បីសម្រេចបាននូវលទ្ធផលល្អប្រសើរ ការដាក់យោធិនឱ្យចូលសោធននិវត្តន៍ សម្រាប់ឆ្នាំ២០២៤នេះ គ្រប់អង្គភាពត្រូវអនុវត្ត ៖ ទី១.ផ្សព្វផ្សាយអប់រំដល់យោធិនគ្រប់រូបក្នុង កងឯកភាព- ស្ថាប័ន ជាពិសេស យោធិនដល់អាយុចូលសោធននិវត្តន៍ យោធិនដែលបានវាយតម្លៃប្រភេទថ្នាក់ពិការរួចពី ក្រុមប្រឹក្សាវាយតម្លៃប្រភេទថ្នាក់ពិការ ឱ្យបានយល់ជ្រួតជ្រាបពីកាតព្វកិច្ចក្នុងការដាក់ យោធិនអាជីពទាំងពីរភេទឱ្យចូលសោធននិវត្តន៍ យោធិនពិការ គឺការអនុវត្តត្រឹមត្រូវ តាមច្បាប់ និងរួមចំណែកក្នុងការធ្វើកំណែ ទម្រង់កងយោធពលខេមរភូមិន្ទ ដែលជាផ្នែក មួយនៃយុទ្ធសាស្ត្របញ្ចកោណដំណាក់កាលទី១។ ទី២.គ្រប់កងឯកភាព ស្ថាប័ន ត្រូវលើកសន្ទស្សន៍ កសាងផែនការឆ្នាំ២០២៤ ចំពោះយោធិនស្ម័គ្រចិត្តសុំចូលសោធិននិវត្តន៍ និងយោធិនពិការ ត្រូវស្នើសុំគ្រឿង ឥស្សរិយយសគ្រប់ប្រភេទតាមលំដាប់ថ្នាក់ ព្រមទាំងយោធិនពលី-មរណៈត្រូវផ្ទេរចេញ ទី៣.ការជ្រើសរើសយោធិនឱ្យចូលសោធិននិវត្តន៍ ត្រូវឆ្លងកាត់អនុគណៈកម្មការ សោធនតាមបណ្ដាកងឯកភាព-ស្ថាប័នខ្លួន ដើម្បីធ្វើការត្រួតពិនិត្យវាយតម្លៃឱ្យគ្រប់ជ្រុងជ្រោយ មុនបញ្ជូនមក គណៈកម្មការសោធននិវត្តន៍ កងទ័ពជើងគោក និងទី៤.ត្រូវរាយការណ៍មកការិយាល័យទី១ កងទ័ពជើងគោក (ផ្នែកសោធននិវត្តន៍) ឱ្យបានមុនថ្ងៃទី២៥ ខែធ្នូ ឆ្នាំ២០២៣។
នាយឧត្តមសេនីយ៍ ម៉ៅ សុផាន់ បន្ថែមទៀតថា មេបញ្ជាការគ្រប់យោធភូមិភាគ កងពលធំ កងពលតូច បញ្ជាការដ្ឋានទ័ពជំនាញ នាយកមជ្ឈមណ្ឌលហ្វឹកហ្វឺន និងនាយស្ថាប័នចំណុះកងទ័ពជើងគោក ត្រូវធ្វើការស្រង់ស្ថិតិយោធិនដែលស្ម័គ្រចិត្តសុំចូលសោធននិវត្តន៍ តាមការកំណត់នៃច្បាប់ យោធិនពិការ និងពលី-មរណៈ ដើម្បីលើកសន្ទស្សន៍ កសាងផែនការរបស់កងឯកភាព-ស្ថាប័ន របស់ខ្លួន នីមួយៗសម្រាប់ឆ្នាំ២០២៤ ដោយផ្អែកលើគោលការណ៍មួយចំនួនរួមមាន៖
ក. ចំពោះយោធិនសោធននិវត្តន៍៖ មានសុខភាពទ្រុឌទ្រោម, បាត់បង់សមត្ថភាពការងារ, អសកម្មការងារ, ស្ម័គ្រចិត្តចូលសោធននិវត្តន៍មុនកាលកំណត់។
ខ. ចំពោះយោធិនពិការ គឺជាយោធិនដែលត្រូវបានក្រុមការងារ អនុគណៈកម្មាការ និងគណៈ កម្មការ កងឯកភាព ស្ថាប័នបានវាយតម្លៃត្រឹមត្រូវ ហើយស្នើសុំតាមឋានានុក្រម ដើម្បីធ្វើការវាយតម្លៃពីក្រុម ប្រឹក្សាវាយតម្លៃប្រភេទថ្នាក់ពិការ។
គ.ចំពោះយោធិនពលី-មរណៈ ត្រូវបំពេញបែបបទស្នើសុំប្រាក់បូជាសព មិនឱ្យលើសពី៩០ថ្ងៃ ក្រោយពេលពលី-មរណៈហើយត្រូវបំពេញបែបបទស្នើសុំផ្ទេរទៅក្រសួងសង្គមកិច្ច អតីតយុទ្ធជន និង យុវនីតិសម្បទា មិនឱ្យលើសពី២ឆ្នាំ។
នាយឧត្តមសេនីយ៍ ម៉ៅ សុផាន់ សង្ឃឹមថា ឯកឧត្តមអស់លោកមេបញ្ជាការ មេបបញ្ជាការរង គ្រប់កងឯកភាព- ស្ថាប័ន បញ្ជាការដ្ឋានទ័ពជំនាញចូលរួមអនុវត្តសេចក្ដីណែនាំស្តីពីវិធានការចាត់តាំងអនុវត្ត ការដាក់យោធិនអាជីពទាំងពីរភេទឱ្យចូលសោធននិវត្តន៍ យោធិនពិការ និងពលី-មរណៈ សម្រាប់ឆ្នាំ២០២៤ ទទួលបានជោគជ័យ និងមានប្រសិទ្ធភាពខ្ពស់៕
