មនុស្សម្នាក់បានស្លាប់ និង ១១ នាក់បាត់ខ្លួនក្នុងគ្រោះទឹកជំនន់ នៅជុំវិញបឹង Toba ប្រទេសឥណ្ឌូនេស៊ី
ហ្សាការតា៖ ទីភ្នាក់ងារគ្រោះមហន្តរាយរបស់ប្រទេសឥណ្ឌូនេស៊ី BNPB បានឲ្យដឹងថា មនុស្សម្នាក់បានស្លាប់ និង ១១ នាក់បាត់ខ្លួន បន្ទាប់ពីទឹកជំនន់ភ្លាមៗបានវាយប្រហារនៅជិតបឹង Toba ក្នុងខេត្តស៊ូម៉ាត្រាខាងជើង របស់ប្រទេសឥណ្ឌូនេស៊ី ដោយមនុស្សជាច្រើននាក់ត្រូវបានជម្លៀសចេញ និងកិច្ចខិតខំប្រឹងប្រែងជួយសង្គ្រោះកំពុងដំណើរការ។
BNPB បានលើកឡើងនៅក្នុងសេចក្តីថ្លែងការណ៍មួយកាលពីល្ងាចថ្ងៃសៅរ៍ថា ភ្លៀងធ្លាក់ខ្លាំងដែលអមដោយទឹកជំនន់ភ្លាមៗនៅល្ងាចថ្ងៃសុក្របានវាយប្រហារតំបន់ដែលមានទីតាំងនៅច្រាំងសមុទ្រដោយបានបំផ្លាញផ្ទះរាប់សិបខ្នង ព្រះវិហារ សាលារៀន និងសណ្ឋាគារមួយ។
បឹង Toba ដែលជាបឹងភ្នំភ្លើងដ៏ធំបំផុតរបស់ពិភពលោក គឺជាតំបន់ទេសចរណ៍ដ៏ពេញនិយមសម្រាប់ប្រជាជនឥណ្ឌូនេស៊ី និងភ្ញៀវទេសចរអន្តរជាតិ។
រូបភាពពីទីភ្នាក់ងារបានបង្ហាញថា ទឹកជំនន់ភ្លាមៗបានអូសយកដុំថ្មធំៗ ដើមឈើ និងភក់ចុះតាមចង្កេះភ្នំ ដោយបន្សល់ទុកផ្ទះខ្លះកប់ដល់ដំបូល។
ទីភ្នាក់ងារនេះបានបញ្ជាក់ថា មនុស្សប្រហែល ៣៥០ នាក់ដែលប្រើប្រាស់ឧបករណ៍ធុនធ្ងន់កំពុងអនុវត្តកិច្ចខិតខំប្រឹងប្រែងស្វែងរក និងជួយសង្គ្រោះ ខណៈដែលមនុស្សប្រហែល ២០០ នាក់ត្រូវបានជម្លៀសចេញ។
