នាយឧត្តមសេនីយ៍ ឯក មនោសែន អញ្ជើញជួបសម្តែងការគួរសមជាមួយ ឯកឧត្តមរដ្ឋមន្ត្រី ហែម វណ្ណឌី ដើម្បីពិភាក្សាលើ៣ចំណុចសំខាន់ៗ អំពីតួនាទីនិងភារកិច្ចរបស់បណ្ឌិត្យសភានគរបាលកម្ពុជានិងក្រសួងឧស្សាហកម្ម
ភ្នំពេញ៖ នៅរសៀលថ្ងៃទី៤ ខែធ្នូ ឆ្នាំ២០២៣នេះ ឯកឧត្តមនាយឧត្តមសេនីយ៍សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញដឹកនាំគណៈប្រតិភូនៃបណ្ឌិត្យសភានគរបាលកម្ពុជា ចូលជួបសម្ដែងការគួរសមជាមួយ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាទីស្តីការក្រសួង។
នៅក្នុងកិច្ចជំនួបសម្តែងការគួរសមនោះ ឯកឧត្តមនាយឧត្តមសេនីយ៍ បានគោរពអបអរសាទរនិងជូនពរចំពោះឯកឧត្តមរដ្ឋមន្ត្រី ដែលទទួលបានការតែងតាំងជារដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងរដ្ឋាភិបាលនៃអាណត្តិនីតិកាលទី៧នៃរដ្ឋសភានេះ។
ក្នុងឱកាសជួបសម្តែងការគួរសមនោះ ឯកឧត្តមនាយឧត្តមសេនីយ៍សាស្ត្រាចារ្យប្រធានបណ្ឌិត្យសភា បានពិភាក្សាលើ៣ចំណុចសំខាន់ៗ ដូចតទៅ:
១-អំពីតួនាទីនិងភារកិច្ចរបស់បណ្ឌិត្យសភានគរបាលកម្ពុជានិងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីចែករំលែកបទពិសោធគ្នាទៅវិញទៅមកនិងកិច្ចសហប្រតិបត្តិការក្នុងការជួយដល់បណ្ឌិត្យសភានគបាល លើវិស័យពាក់ព័ន្ធនឹងមន្ទីរពិសោធន៍និងជួយពង្រឹងធនធានមនុស្សផ្នែកមន្ទីរពិសោធន៍
២-ការចងសម្ព័ន្ធមេត្រីភាពរវាងក្រសួងនិងបណ្ឌិត្យសភានគរបាលកម្ពុជា
៣-គោរពអញ្ជើញឯកឧត្តមរដ្ឋមន្ត្រី មកធ្វើបាឋកថាចែករំលែកចំណេះដឹងនិងបទពិសោធលើប្រធានបទចាំបាច់មួយចំនួនដែលពាក់ព័ន្ធនឹងកិច្ចសហការជាមួយបណ្ឌិត្យសភានគរបាលកម្ពុជាលើវិស័យនគរបាលកម្ពុជា។
កិច្ចជំនួបសម្តែងការគួរសមនិងពិភាក្សា បានប្រព្រឹត្តទៅក្រោមបរិយាកាសរីករាយនិងប្រកបដោយលទ្ធផលជាទីគាប់ប្រសើរ ៕
