អគ្គនាយកដ្ឋានពន្ធនាគារ ក្រសួងមហាផ្ទៃ រៀបចំកិច្ចប្រជុំផ្លាស់ប្តូរបទពិសោធន៍ការងារជាមួយប្រតិភូនាយកដ្ឋានពន្ធនាគារ ក្រសួងសន្តិសុខសាធារណៈឡាវ
ភ្នំពេញ៖ អគ្គនាយកដ្ឋានពន្ធនាគារ ក្រសួងមហាផ្ទៃ នាព្រឹកថ្ងៃអង្គារ ទី៥ ខែធ្នូ ឆ្នាំ២០២៣ បានរៀបចំកិច្ចប្រជុំផ្លាស់ប្តូរបទពិសោធន៍ការងារជាមួយគណៈប្រតិភូ នាយកដ្ឋានពន្ធនាគារ ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ដែលភាគីកម្ពុជាដឹកនាំដោយ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ និងភាគីឡាវ ដឹកនាំដោយ ឯកឧត្តម ឧត្តមសេនីយ៍ត្រី ស៊ុមលិត ដាវហ៊ុងស៊ុលិ នាយកដ្ឋានពន្ធនាគារ ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ដោយមានការអញ្ជើញចូលរួមពី ឯកឧត្តម ឧត្តមអគ្គានុរក្ស អគ្គនាយករង ប្រធាននាយកដ្ឋាន និងមន្ត្រីពាក់ព័ន្ធ នៃអគ្គនាយកដ្ឋានពន្ធនាគារ ក្រសួងមហាផ្ទៃ ព្រមទាំងគណៈប្រតិភូនៃសាធារណរដ្ឋប្រជាធិបតេយ្យប្រជាមានិតឡាវ ជាច្រើនរូបផងដែរ។
នាឱកាសនោះ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ បានសម្តែងការស្វាគមន៍ចំពោះគណៈប្រតិភូ នាយកដ្ឋានពន្ធនាគារ ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ដែលបានអញ្ជើញមកបំពេញទស្សនៈកិច្ចផ្លាស់ប្តូរបទពិសោធន៍ការងារនៅព្រះរាជាណាចក្រកម្ពុជានាពេលនេះ។ ទន្ទឹមនោះ ឯកឧត្តម ឧត្តមអគ្គានុរក្សថ្នាក់លេខ១ អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ ក៏បានលើកឡើងអំពីស្ថានភាពទូទៅ ក៏ដូចជាការងារពាក់ព័ន្ធមួយចំនួនរបស់អគ្គនាយកដ្ឋានពន្ធនាគារ ក្រសួងមហាផ្ទៃ ដើម្បីចែករំលែក និងធ្វើការផ្លាស់ប្តូរយោបល់គ្នា។
ជាមួយគ្នានោះ ឯកឧត្តម ឧត្តមសេនីយ៍ត្រី ស៊ុមលិត ដាវហ៊ុងស៊ុលិ នាយកដ្ឋានពន្ធនាគារ ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ក៏បានថ្លែងអំណរគុណចំពោះគណៈប្រតិភូនៃព្រះរាជាណាចក្រកម្ពុជា ដែលបានទទួលស្វាគមន៍ដ៏កក់ក្ដៅ និងប្រកបដោយភាពស្និទ្ធស្នាលនាឱកាសនេះ។ ឯកឧត្តម ឧត្តមសេនីយ៍ត្រី ក៏បានមានប្រសាសន៍ថា គណៈប្រតិភូនៃនាយកដ្ឋានពន្ធនាគារ ក្រសួងសន្តិសុខសាធារណៈឡាវ អញ្ជើញមកចូលរួមក្នុងកិច្ចប្រជុំនៅថ្ងៃនេះគឺដើម្បីជួបសម្តែងការសួរសុខទុក្ខ និងពង្រឹងកិច្ចសហប្រតិបត្តិការនានាជាមួយគណៈប្រតិភូនៃអគ្គនាយកដ្ឋានពន្ធនាគារ ក្រសួងមហាផ្ទៃ។
បន្តទៀត ឯកឧត្តម ឧត្តមសេនីយ៍ត្រី បានលើកឡើងថា ឡាវមានកេរ្តិ៍ដំណែលនៃកិច្ចសហប្រតិបត្តិការជាប្រទេសភូមិផងរបងនឹងគ្នា មានព្រំដែនជាប់គា្នទាំងព្រំដែនគោក និងព្រំដែនទឹក ជាប្រទេសបងប្អូន មានទំនៀមទម្លាប់ប្រពៃណី និងវប្បធម៌ស្រដៀងគ្នា ប្រជាជននៃប្រទេសទាំងពីរមានការចេញចូលរាប់រកគ្នា ជួយទុក្ខធុរៈគ្នាទៅវិញទៅមកតាំងពីយូរលង់មកហើយមិនថាអំឡុងពេលនៃការបង្រួបបង្រួមប្រទេសជាតិ ការដណ្ដើមឯករាជ្យពីពួកឈ្លានពានបរទេស ក៏ដូចជាអំឡុងពេលនៃការអភិវឌ្ឍប្រទេសនាពេលបច្ចុបុ្បន្ន។
ឯកឧត្តម ឧត្តមសេនីយ៍ត្រី បន្តថា កេរ្តិ៍ដំណែលនៃសាមគ្គីភាពទាំងអស់ខាងលើនេះហើយ ដែលជាកក្ដាធ្វើឱ្យចំណងទំនាក់ទំនងមិត្តភាព រវាងប្រទេសយើងទាំងពីរ កម្ពុជា-ឡាវ គ្មានអ្វីអាចមកកាត់ផ្ដាច់ទំនាក់ទំនងនេះបានឡើយ។
ស្របពេលជាមួយគ្នានោះ ឯកឧត្តម ឧត្តមសេនីយ៍ត្រី បានគូសបញ្ជាក់ថា អនុវត្តតាមសេចក្ដីថ្លែងការរួមរបស់រដ្ឋាភិបាលនៃប្រទេសទាំងពីរ កម្ពុជា-ឡាវ និងកំណត់ហេតុស្ដីពីកិច្ចសហប្រតិបត្តិការ រវាងក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ និងក្រសួងមហាផ្ទៃ នៃព្រះរាជាណាចក្រកម្ពូជាប្រចាំឆ្នាំ២០២៣ ទើបថ្ងៃនេះយើងបានរួមគ្នាពិភាក្សាផ្លាស់ប្ដូរបទពិសោធការងារជំនាញ ដើម្បីពង្រឹង និងពង្រីកដៃគូយុទ្ធសាស្ត្រគ្រប់ជ្រុងជ្រោយ និងមានស្ថិរភាពយូរអង្វែង រវាងនាយកដ្ឋាននគរបាលពន្ធនាគារ ក្រសួងសន្តិសុខសាធារណៈឡាវ និងអគ្គនាយកដ្ឋានពន្ធនាគារ ក្រសួងមហាផ្ទៃ នៃព្រះរាជាណាចក្រកម្ពុជា ឱ្យកាន់តែរីកចម្រើនតាមការចង្អុលបង្ហាញពីថ្នាក់ដឹកនាំនៃក្រសួងទាំងពីរ ដើម្បីសហការជួយគ្នាទៅវិញទៅមក រួមគ្នាដោះស្រាយបញ្ហាឧក្រិដ្ឋកម្ម និងបញ្ហាអវិជ្ជមានផ្សេងៗដែលកើតឡើងនៅក្នុងប្រទេសទាំងពីរតាមផ្លូវច្បាប់ និងតាមបទបញ្ញត្តិដែលប្រទេសទាំងពីរបានឯកភាពគ្នា។
បន្ថែមពីនោះទៀត ឯកឧត្តម ឧត្តមសេនីយ៍ត្រី ស៊ុមលិត ដាវហ៊ុងស៊ុលិ នាយកដ្ឋានពន្ធនាគារ ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ក៏បានធ្វើសេចក្តីរាយការសង្ខេបស្តីពីស្ថានភាពទូទៅនៃការគ្រប់គ្រង ការចាត់ចែង និងបទពិសោធន៍ការងារទូទៅរបស់នាយកដ្ឋានពន្ធនាគារ ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ជូនគណៈប្រតិភូនៃអគ្គនាយដ្ឋានពន្ធនាគារ ក្រសួងមហាផ្ទៃ។
ជាថ្មីម្តងទៀត ក្រោយពីបានស្តាប់ការលើកឡើង ក៏ដូចជាចែករំលែកបទពិសោធន៍ការងារពីភាគីឡាវ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ បានថ្លែងអំណរគុណចំពោះគណៈប្រតិភូឡាវដែលបានចែករំលែកបទពិសោធន៍ដល់កម្ពុជា។ ទន្ទឹមនោះ ឯកឧត្តម ឧត្តមអគ្គានុរក្សថ្នាក់លេខ១ ក៏បានចែករំលែកនូវបទពិសោធន៍ការងារពាក់ព័ន្ធនានាដែលជាសមត្ថកិច្ចរបស់អគ្គនាយកដ្ឋានពន្ធនាគារ ក្រសួងមហាផ្ទៃ ជូនទៅគណៈប្រតិភូឡា ដើម្បីសិក្សា និងផ្លាស់ប្តូរបទពិសោធន៍គ្នាទៅវិញទៅមកប្រកបដោយភាពស្និតស្នាល។ បន្ទាប់មក ក្រោយពីបានបញ្ចប់កិច្ចពិភាក្សា និងផ្លាស់ប្តូរយោបល់គ្នាទៅវិញទៅមករួច ភាគីទាំងពីរ ក៏បានចុះហត្ថលេខាលើខ្លឹមសារអនុស្សរណៈនៃការយោគយល់គ្នា ដើម្បីពង្រឹងចំណង់នៃកិច្ចសហប្រតិបត្តិការឱ្យកាន់តែស៊ីជម្រៅថែមទៀត ផងដែរ៕
