ឯកឧត្តម ស្វាយ សំអ៊ាង៖ ទោះបីជាស្ថេរភាព សន្តិភាព រឹងមាំយ៉ាងណាក៏ដោយ ប៉ុន្តែសន្តិសុខសណ្តាប់ធ្នាប់សាធារណៈ នៅតែជាបញ្ហាត្រូវយកចិត្តទុកដាក់ ពិសេសសុខមាលភាព របស់ពលរដ្ឋ
ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានលើកឡើងថា ទោះបីជាស្ថេរភាព សន្តិភាព រឹងមាំយ៉ាងណាក៏ដោយ ប៉ុន្តែសន្តិសុខ សណ្តាប់ធ្នាប់សាធារណៈ នៅតែជាបញ្ហាដែលត្រូវយកចិត្តទុកដាក់ ជាពិសេសសុខមាលភាព របស់ប្រជាពលរដ្ឋ ដោយផ្តល់សេវាចាំបាច់នានា ។
ការលើកឡើងបែបនេះ ក្នុងឱកាសដែលឯកឧត្តម ស្វាយ សំអ៊ាង អភិបាលខេត្តស្ទឹងត្រែង និងឯកឧត្តម ទូច ណារ៉ុថ រដ្ឋលេខាធិការក្រសួងមហាផ្ទៃ បានអញ្ជើញដឹកនាំកិច្ចប្រជុំស្តីពីការត្រួតពិនិត្យ និងជំរុញការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» នាថ្ងៃទី៥ ខែធ្នូ ឆ្នាំ២០២៣នេះ ។
ក្នុងកិច្ចប្រជុំនោះដែរឯកឧត្តម ស្វាយ សំអ៊ាង បានថ្លែងថា ផ្អែកតាមស្មារតី ក៏ដូចជាគោលការណ៍ណែនាំ ជាពិសេសផ្អែកតាមគោលនយោបាយ ភូមិ ឃុំ សង្កាត់ មានសុវត្ថិភាព រដ្ឋបាលខេត្ត និងគណៈបញ្ជាការឯកភាពខេត្ត ក៏បានយកចិត្តទុកដាក់ជំរុញការអនុវត្ត ជាពិសេសគឺការការពារ សន្តិសុខ សណ្តាប់ធ្នាប់ ដែលជាគន្លឹះនៅក្នុងការកសាងអភិវឌ្ឍន៍សេដ្ឋកិច្ច និងវិស័យផ្សេងៗទៀត ដែលស៊ីជម្រៅស្របតាមគោលនយោបាយយុទ្ធសាស្ត្រចតុកោណ នៅក្នុងដំណាក់កាលរបស់រាជរដ្ឋាភិបាល ក្នុងអាណត្តិកន្លងមក និងបានកំណត់នៅក្នុងដំណាក់កាលបច្ចុប្បន្ន នីតិកាលទី៧ នៃរដ្ឋសភា ដែលរាជរដ្ឋាភិបាលបានដាក់ចេញកម្មវិធីគោលនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តមអភិបាលខេត្ត បញ្ជាក់ថា «ទោះបីជាស្ថេរភាព សន្តិភាព រឹងមាំយ៉ាងណាក៏ដោយ ប៉ុន្តែសន្តិសុខ សណ្តាប់ធ្នាប់សាធារណៈ នៅតែជាបញ្ហាដែលត្រូវយកចិត្តទុកដាក់ ជាពិសេសសុខមាលភាព របស់ប្រជាពលរដ្ឋ ដោយផ្តល់សេវាចាំបាច់នានា ដែលនៅតែជាកិច្ចការត្រូវយកចិត្តទុកដាក់ ដើម្បីធានាបានដល់ប្រជាជនគ្រប់រូប នៅក្នុងសង្គមមានសុវត្ថិភាពល្អប្រសើរ មានជីវភាពរុងរឿង ប្រជាពលរដ្ឋរស់នៅប្រកបដោយសុខដុមរមនា នៅគ្រប់ទីកន្លែង» ។
ឯកឧត្តមអភិបាលខេត្ត បានបន្ថែមថា តបតាមស្ថានភាពបច្ចុប្បន្ន និងការគាគរឲ្យមានការចូលរួមកាន់តែច្រើនថែមទៀត ដែលរាជរដ្ឋាភិបាល បានសម្រេចកែលម្អនូវលក្ខណៈសម្បត្តិ ភូមិ ឃុំ សង្កាត់ មានសុវត្ថិភាព ព្រមទាំងការលើកកម្រិតគោលនយោបាយនេះ ដែលជាអានុភាពរបស់រាជរដ្ឋាភិបាល ដែលមានបំណង និងសំណូមពរ ដែលខេត្តស្ទឹងត្រែង បានអនុវត្តកន្លងមក គឺត្រូវបន្តពង្រឹងសន្តិសុខ សុខភាពប្រជាពលរដ្ឋ និងការកាត់បន្ថយគ្រោះថ្នាក់ចរាចរណ៍ គ្រោះមហន្តរាយ និងជំងឺឆ្លងរាតត្បាតក្នុងគ្រប់កាលៈទេសៈ ព្រមទាំងការលើកទឹកចិត្តឲ្យមានការដោះស្រាយដល់មូលដ្ឋានក្រៅប្រព័ន្ធតុលាការ ដើម្បីបង្កអនុគ្រោះដំណើរការអភិវឌ្ឍសេដ្ឋកិច្ចនៅមូលដ្ឋាន។
ឯកឧត្តម ស្វាយ សំអ៊ាង មានប្រសាសន៍ថា ឆ្លើយតបទៅនឹងគោលនយោបាយ ភូមិ ឃុំ សង្កាត់ មានសុវត្ថិភាព របស់រាជរដ្ឋាភិបាល រដ្ឋបាលខេត្តស្ទឹងត្រែង ក៏បានរក្សាបាននូវសន្តិសុខ សណ្តាប់ធ្នាប់សាធារណៈ មានលក្ខណៈល្អប្រសើរ តាមរយៈការជំរុញការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព និងបានពង្រឹងតួនាទីភារកិច្ចរបស់គណៈបញ្ជាការឯកភាពខេត្ត គណៈបញ្ជាការឯកភាពក្រុង ស្រុក និងប៉ុស្តិ៍រដ្ឋបាល ឃុំ សង្កាត់។
ឯកឧត្តមអភិបាលខេត្ត គូសបញ្ជាក់បន្ថែមថា ស្ថានភាពខ្សែបន្ទាត់ព្រំដែនកម្ពុជា-ឡាវ រដ្ឋបាលខេត្ត ក៏រក្សាបាននូវសន្តិសុខ សណ្តាប់ធ្នាប់ បានល្អប្រសើរក្នុងការទប់ស្កាត់រាល់បទល្មើសឆ្លងដែននានា ជាពិសេសការទប់ស្កាត់ក្នុងការធ្វើចរាចរគ្រឿងញៀនខុសច្បាប់ និងរក្សាបាននូវទំនាក់ទំនងកិច្ចសហប្រតិបត្តិការល្អជាមួយកងកម្លាំងនៃអាជ្ញាធរឡាវ។
អញ្ជើញជាអធិបតីក្នុងពិធីនោះដែរ ឯកឧត្តម ទូច ណារ៉ុថ រដ្ឋលេខាធិការក្រសួងមហាផ្ទៃ មានប្រសាសន៍ថា គោលនយោបាយ ភូមិ ឃុំ សង្កាត់ មានសុវត្ថិភាពនេះ គឺជាគោលនយោបាយរបស់រាជរដ្ឋាភិបាលដែលបានដាក់ជូនដើម្បីអនុវត្តធ្វើឲ្យប្រជាពលរដ្ឋលោកមានជំនឿលើរាជរដ្ឋាភិបាល។
ឯកឧត្តមរដ្ឋលេខាធិការបន្តថា ប្រសិនបើប្រជាពលរដ្ឋមានជំនឿយើងទាំងអស់គ្នា និងសម្រេចជោគជ័យទាំងអស់គ្នា។ ដូច្នេះបានជាក្រសួងមហាផ្ទៃ ជាសេនាធិការរបស់រាជរដ្ឋាភិបាល ដើម្បីតាមដានក្នុងការជំរុញអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព។
ឯកឧត្តមរដ្ឋលេខាធិការបន្ថែមថា គោលនយោបាយនេះ មិនមែនទើបតែមាននៅក្នុងអាណត្តិទី៧ទេ គឺមានជាយូរឆ្នាំណាស់មកហើយ គ្រាន់តែថារាជរដ្ឋាភិបាល អាណត្តិទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបង្កើតក្រុមការងារមួយទៀត ដើម្បីជំរុញការអនុវត្តបន្ថែមទៀត។
ឯកឧត្តម ទូច ណារ៉ុថ មានជំនឿថាក្នុងខេត្តស្ទឹងត្រែង ដូចដែលឯកឧត្តមអភិបាលខេត្ត បានលើកឡើង មិនមានអ្វីជាបញ្ហានោះទេ។ ប៉ុន្តែខេត្តស្ទឹងត្រែង មានការព្រួយបារម្ភតែបញ្ហាគ្រឿងញៀន ដូច្នេះបានជាយើងចង់ឲ្យខេត្តស្ទឹងត្រែង ចំពោះបញ្ហាគ្រឿងញៀននេះ ក្លាយជាកន្លែងឆ្លងកាត់បានហើយ ចៀសមិនរួចទេចំពោះបញ្ហានេះ ក៏ប៉ុន្តែសូមកុំឲ្យទៅជាកន្លែងផលិត និងជួញដូរទៅបានហើយ ៕
