រដ្ឋមន្ត្រីក្រសួងយុត្តិធម៌ អនុញ្ញាតឱ្យនិស្សិតជ័យលាភីអាហារូបករណ៍រដ្ឋាភិបាលអូស្ត្រាលី ចំនួន ៣៤រូប ចូលជួបសម្ដែងការគួរសម មុននឹងចេញទៅបន្តការសិក្សានៅប្រទេសអូស្ត្រាលី

ភ្នំពេញ៖ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ នាព្រឹកថ្ងៃអង្គារ ៨រោច ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៥ ខែធ្នូ ឆ្នាំ២០២៣ បានអនុញ្ញាតឱ្យនិស្សិតជ័យលាភីអាហារូបករណ៍រដ្ឋាភិបាលអូស្ត្រាលី ចំនួន ៣៤រូប ចូលជួបសម្តែងការគួរសម មុននឹងចេញដំណើរទៅសិក្សានៅប្រទេសអូស្រ្តាលី នៅដើមខែមករា ឆ្នាំ២០២៤ ខាងមុខនេះ។

នៅក្នុងឱកាសនេះ ឯកឧត្តមឧបនាយករដ្ឋមន្ត្រី បានសម្ដែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងរបស់បេក្ខជន បេក្ខនារីទាំងអស់ ក្នុងការចូលរួមប្រកួតប្រជែង រហូតក្លាយជាជ័យលាភីអាហារូបករណ៍ ដើម្បីទៅបន្តការសិក្សានៅក្រៅប្រទេស។

ទន្ទឹមនេះ ឯកឧត្តមឧបនាយករដ្ឋមន្ត្រី ក៏បានចែករំលែកនូវបទពិសោធន៍ ក្នុងនាមជានិស្សិតធ្លាប់ទទួលបានអាហារូបករណ៍ទៅសិក្សានៅប្រទេសបារាំង និងបានណែនាំដល់បេក្ខជន បេក្ខនារីទាំងអស់ឱ្យខិតខំសិក្សារៀនសូត្រ ជាពិសេស ត្រូវចេះរួមសាមគ្គីគ្នា និងជួយយកអាសាគ្នាទៅវិញទៅមក ដូចពាក្យស្លោកពោលថា «នៅផ្ទះម្ដាយទីទៃ នៅព្រៃម្ដាយតែមួយ»។

ជាចុងក្រោយ ឯកឧត្តមឧបនាយករដ្ឋមន្ត្រី ក៏បានផ្ដាំផ្ញើ ៤ចំណុច ដល់បេក្ខជន បេក្ខនារីជ័យលាភីទាំងអស់ ក្នុងនោះរួមមាន៖
ទី១-ការទទួលបាននូវជ័យលាភីទៅសិក្សានៅក្រៅប្រទេស ជាការបន្តដំណើរក្នុងរបត់ជិវិតថ្មីមួយរបស់បេក្ខជន បេក្ខនារីទាំងអស់គ្នា ហើយការចេញដំណើររបស់អ្នកទាំងអស់គ្នានេះ គឺជាការឆ្លុះបញ្ចាំងឱ្យឃើញថា អ្នកទាំងអស់គ្នាជាទំពាំងស្នងឫស្សីរបស់កម្ពុជា។
ទី២-ត្រូវចូលរួមថែរក្សានូវអត្តសញ្ញាណជាតិខ្មែរ ដោយត្រូវបង្កើននូវសាមគ្គីភាពរួមគ្នា ដើម្បីនាំមកនូវមោទនភាព សម្រាប់ជាតិ មាតុភូមិកម្ពុជា។
ទី៣-ត្រូវលើកតម្កើងកិត្តិយសខ្មែរ តាមរយៈការចែករំលែក វប្បធម៌ ប្រពៃណី ទំនៀមទម្លាប់ខ្មែរ។
ទី៤-ត្រូវបន្តថែរក្សានូវសុខសន្តិភាព ព្រមទាំងអភិវឌ្ឍសមត្ថភាពឱ្យក្លាយជាមូលធនមនុស្ស ដើម្បីចូលរួមអភិវឌ្ឍសង្គមជាតិឱ្យកាន់តែរីកចម្រើន ព្រោះសមត្ថភាព គឺជាគ្រឹះនៃអ្វីៗទាំងអស់ ដើម្បីអភិវឌ្ឍប្រទេសជាតិ តាមរយៈគោលការណ៍ «អ្នកមានសមត្ថភាព ត្រូវបំពាក់នូវសមត្ថកិច្ច! អ្នកមានសមត្ថកិច្ច ត្រូវបំពាក់បន្ថែមនូវសមត្ថភាព!» ៕