ឧត្តមសេនីយ៍ទោ សោម ស៊ុន ផ្សព្វផ្សាយសេចក្តីណែនាំរបស់បញ្ជាការដ្ឋានកងទ័ពជើងគោក ស្ដីពីវិធានការដាក់យោធិនអាជីព ឲ្យចូលសោធននិវត្តន៍ យោធិនពិការ នឹងយោធិនពលីមរណៈ សម្រាប់ឆ្នាំ២០២៤
ភ្នំពេញ៖ នៅថ្ងៃទី៦ ខែធ្នូ ឆ្នាំ២០២៣ នៅទីបញ្ជាការតំបន់ប្រតិបត្តិការសឹករងកំពង់ធំ ស្ថិតនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ បានរៀបចំពិធីផ្សព្វផ្សាយសេចក្តីណែនាំរបស់បញ្ជាការដ្ឋានកងទ័ពជើងគោក ស្ដីពីវិធានការដាក់យោធិនអាជីពទាំងពីរភេទ ឱ្យចូលសោធននិវត្ត យោធិនពិការ និងយោធិនពលីមរណៈ ដែលពិធីផ្សព្វផ្សាយនេះ ស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ។
លោកវរសេនីយ៍ទោ នូ វុទ្ធា នាយការិយាល័យទី១ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើយអានសេចក្តីណែនាំលេខ០០២/២០២៣ សណន ចុះថ្ងៃទី២៧ ខែវិច្ឆិកា ឆ្នាំ២០២៣ របស់បញ្ជាការដ្ឋានកងទ័ពជើងគោក ស្ដីពីវិធានការដាក់យោធិនអាជីពទាំងពីរភេទឱ្យចូលសោធននិវត្តន៍ យោធិនពិការ និងយោធិនពលីមរណៈ និងបានណែនាំអំពីតួនាទីភារកិច្ចមួយចំនួនរបស់ជំនាញការិយាល័យទី១ ដល់ស្ថាប័នជំនាញបុគ្គលិក មេបញ្ជាការគ្រប់បណ្ដាកងឯកភាព និងស្ថាប័នពាក់ព័ន្ធ ដើម្បីបំពេញរាល់បណ្ដាសំណុំលិខិតផ្សេងៗដែលថ្នាក់លើបានណែនាំ ។ អង្គប្រជុំបានពិភាក្សាគ្នាយ៉ាងល្អិតល្អន់ ដើម្បីចាត់តាំងដំណើរការអនុវត្តឲ្យទទួលបានលទ្ធផលល្អតាមការណែនាំរបស់ថ្នាក់ដឹកនាំ តាមឋានានុក្រមគ្រប់លំដាប់ថ្នាក់។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានបញ្ជាក់ជូនអំពីលក្ខខណ្ឌបួនចំណុចនៃការដាក់យោធិនឲ្យចូលសោធននិវត្តន៍សម្រាប់ឆ្នាំ២០២៤ ។ ក្នុងនោះទីមួយយោធិនដែលមានសុខភាពទ្រុឌទ្រោម ទីពីរ បាត់បង់សមត្ថភាពការងារ ទីបី យោធិនដែលអសកម្មការងារ និងទី៤ យោធិនដែលស្ម័គ្រចិត្ដចូលសោធននិវត្តន៍មុនកាលកំណត់ ។
ឧត្តមសេនីយ៍ទោ សោម ស៊ុន បានណែនាំដល់មេបញ្ជាការគ្រប់កងឯកភាព និងស្ថាប័នចំណុះ ត្រូវប្រជុំផ្សព្វផ្សាយខ្លឹមសារសេចក្តីណែនាំនេះក្នុងជួរយោធិនក្រោមឱវាទ ហើយចាត់តាំងក្រុមការងារត្រួតពិនិត្យវាយតម្លៃ ដើម្បីបំពេញសំណុំបែបបទឯកសារផ្សេងៗ ដែលជំនាញការិយាល័យទី១ បានណែនាំ ដើម្បីបញ្ជាការដ្ឋានតំបន់ប្រតិបត្តិការសឹករងកំពង់ធំ ចាត់តាំងវាយតម្លៃនិងធ្វើរបាយការណ៍ជូនទៅថ្នាក់លើតាមឋានានុក្រម ៕
