អភិបាលខេត្តកំពង់ធំ ជម្រុញមន្ត្រីជំនាញ ខិតខំបន្តដោះស្រាយបញ្ហាប្រឈម និងទុក្ខកង្វល់របស់ប្រជាពលរដ្ឋឲ្យបានឆាប់រហ័ស
ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ បានជម្រុញអោយមន្ត្រីជំនាញ សហការជាមួយអាជ្ញាធរមូលដ្ឋានខិតខំបន្តដោះស្រាយបញ្ហាប្រឈម និងទុក្ខកង្វល់របស់ប្រជាពលរដ្ឋ ដែលបាននឹងកំពុងជួបប្រទះនៅតាមមូលដ្ឋាន ជាពិសេស សំណួរ និងសំណូមពរដែលបានលើកឡើងនៅក្នុងកម្មវិធីវេទិការផ្សព្វផ្សាយពិគ្រោះយោបល់របស់ក្រុមប្រឹក្សាខេត្ត ដែលយើងមិនទាន់បានឆ្លើយបំភ្លឺអស់ ក៏ដូចជាមិនទាន់បានដោះស្រាយចប់នៅឡើយ។
ឯកឧត្ដមលើកឡើងបែបនេះ នៅក្នុងកិច្ចប្រជុំសាមញ្ញលើកទី៥៤ របស់ក្រុមប្រឹក្សាខេត្តកំពង់ធំ អាណត្តិទី៣ នាព្រឹកថ្ងៃទី០៧ ខែធ្នូ ឆ្នាំ២០២៣ នៅសាលប្រជុំសាលាខេត្ត។
ឯកឧត្ដមបន្តថា ចំពោះបញ្ហា និងសំណូមពរខ្លះ យើងត្រូវត្រួតពិនិត្យទៅលើលទ្ធភាពរបស់អាជ្ញាធរខេត្តផងដែរ។ ម្យ៉ាងវិញទៀត ក្នុងនាមអាជ្ញាធរដែនដី ត្រូវចុះមើលអោយដល់មូលដ្ឋានរបស់ខ្លួន ក្នុងការដោះស្រាយបញ្ហាទំនាស់ ក៏ដូចជាការបង្ការទប់ស្កាត់ ការរំលោភយកចំណីផ្លូវ ប្រឡាយ លូ អាងស្តុបទឹក ដើម្បីរក្សាសណ្តាប់ធ្នាប់សារណៈឲ្យបានល្អ៕
