ថ្នាក់ដឹកនាំខេត្តស្វាយរៀង ដឹកនាំក្រុមការងារចុះត្រួតពិនិត្យដីសម្បទាន នៅភូមិតាសួស ស្រុករមាសហែក

ភ្នំពេញ៖ នៅរសៀលថ្ងៃពុធ ទី៦ ខែធ្នូ ឆ្នាំ២០២៣ ឯកឧត្តម ម៉ែន អេង អភិបាលរងខេត្តស្វាយរៀង តំណាងឯកឧត្ដម ប៉េង ពោធិ៍សា អភិបាលខេត្ត បានអញ្ចើញដឹកនាំក្រុមការងារចុះត្រួតពិនិត្យដីសម្បទាននៅភូមិតាសួស ឃុំត្រស់ ស្រុករមាសហែក ខេត្តស្វាយរៀង។

នៅក្នុងការចុះត្រួតពិនិត្យដីនេះផងដែរ ក៏មានការអញ្ចើញចូលរួមពី:លោក ម៉ិញ ស៊ីចាយប្រធានមន្ទីរដែនដីនគរូបនីយកម្ម សំណង់ និងសូរិយោដី ខេត្តស្វាយរៀង លោក សុខ សុទ្ធាវុធ ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្ត លោក ហម ហឿន អភិបាលរងស្រុករមាសហែក លោកស្រី មេឃុំតាសួស កងកម្លាំងប្រដាប់អាវុធទាំងបីប្រភេទ និងមន្ត្រីដែលពាក់ព័ន្ធជាច្រើនរូបទៀត។

នៅក្នុងការចុះត្រួតពិនិត្យដីសម្បទាននៅភូមិតាសួស ឃុំត្រស់ ឯកឧត្តម ម៉ែន អេង អភិបាលរងខេត្ត បានមានប្រសាសន៍ថារាល់ការសំណើដោះស្រាយដីធ្លីរបស់ពុកម៉ែបងប្អូនប្រជាពលរដ្ឋ គឺ ថ្នាក់ស្រុក ថ្នាក់ខេត្ត តែងតែចុះត្រួតពិនិត្យ និងព្យាយាមរកដំណោះស្រាយដោះជូនបងប្អូនទោះក្នុងកាល:ទេស:ណាក៏ដោយ។ គ្រប់សំណើរទាំងអស់ ជាពិសេសដែលពាក់ព័ន្ធនឹងដីធ្លី សូមពុកម៉ែបងប្អូន កុំធ្វើការរំលងថ្នាក់ឃុំ ថ្នាក់ស្រុកព្រោះថ្នាក់ឃុំ ថ្នាក់ស្រុកនេះហើយគឺជា អ្នកដែលរស់នៅជាប់ជាមួយពុកម៉ែបងប្អូនទាំងភាពស្រណុកសុខស្រួលទាំងភាពលំបាក គឺគាត់តែងតែចូលរួមយ៉ាងសកម្មជានិច្ចជាមួយបងប្អូន។

ឯកឧត្តមអភិបាលរងខេត្ត ក៏បានបន្ថែមទៀតថា ចំពោះឯកឧត្តមអភិបាលខេត្ត លោកបានយកចិត្តទុកដាក់ចំពោះរឿងនេះណាស់ គឺបានដាក់ជាវិធានការជូនបងប្អូនដែលបានដាក់សំណើរឱ្យបានទាន់ពេលវេលា។

ជាលទ្ធផល ក្នុងការចុះត្រួតពិនិត្យដីសម្បទាននៅភូមិតាសួសនេះ ថ្នាក់ឃុំ ថ្នាក់ស្រុក ថ្នាក់ខេត្ត នឹងធ្វើការសិក្សាស្រាវជ្រាវបន្ថែមទៀតដើម្បីដោះជូនបងប្អូនទោះជាលទ្ធផលចេញមកយ៉ាងណាក៏ដោយ ក៏ក្រុមការងារខិតខំប្រឹងប្រែងដើម្បីបងប្អូនប្រជាពលរដ្ឋ ផងដែរ ៕