សម្តេចធិបតី ហ៊ុន ម៉ាណែត៖ ការស្ម័គ្រចិត្តចាកចេញពីតំបន់រុតតាឯកនេះ គឺដើម្បីផលប្រយោជន៍ជាតិ

ភ្នំពេញ៖ ក្នុងពិធីអញ្ជើញជួបសំណេះសំណាលជាមួយបងប្អូនប្រជាពលរដ្ឋរស់នៅក្នុងតំបន់រុនតាឯក ស្ថិតនៅក្នុងស្រុកបន្ទាយស្រី នាព្រឹកថ្ងៃទី៨ ខែធ្នូ ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ប្រជាពលរដ្ឋដែលបានស្ម័គ្រចិត្តចាកចេញពីតំបន់រមណីយដ្ឋានអង្គរមករស់នៅតំបន់រុតតាឯកនេះ គឺដើម្បីផលប្រយោជន៍ជាតិយូរអង្វែងសម្រាប់កូនខ្មែរជំនាន់ក្រោយៗផងដែរ។

សម្តេចធិបតី ហ៊ុន ម៉ាណែត បានគូសបញ្ជាក់ថា ការស្ម័គ្រចិត្តចាកចេញពីតំបន់រមណីយដ្ឋានអង្គររបស់បងប្អូនប្រជាពលរដ្ឋ ក៏ជាការបង្ហាញនូវការជឿជាក់លើសម្តេចតេជោ ហ៊ុន សែន ដែលសម្តេចមានចក្ខុវិស័យវែងឆ្ងាយក្នុងការអភិវឌ្ឍប្រទេសជាតិ ការពារអាយុជីវិតប្រជាជន រួមទាំងការពារសម្បត្តិវប្បធម៌ជាតិផងដែរ។

សម្តេចធិបតី នាយករដ្ឋមន្ត្រី ក៏បានថ្លែងអំណរគុណដល់ប្រជាពលរដ្ឋទាំងអស់ដែលជឿជាក់លើសម្តេចតេជោ និងគណបក្សប្រជាជនកម្ពុជា តាមរយៈការបោះឆ្នោតគាំទ្រភ្លូកទឹកភ្លូកដីចំពោះគណបក្សប្រជាជនកម្ពុជាកាលពីថ្ងៃទី២៣ ខែកក្កដា ឆ្នាំ២០២៣កន្លងទៅ ព្រោះបងប្អូនបានដឹងថា ក្នុងរយៈពេល៤០ឆ្នាំកន្លងមកនេះ សម្តេចតេជោ ខិតខំប្រឹងប្រែងដើម្បីការពារអាយុជីវិតប្រជាជន និងការពារសម្បត្តិវប្បធម៌ជាតិ ៕