សម្តេចធិបតី ហ៊ុន ម៉ាណែត ដាក់ឱ្យដំណើរការរថយន្ត ១០គ្រឿង សម្រាប់ដឹកពលរដ្ឋនៅតំបន់រុនតាឯក ទៅកាន់ទីរួមខេត្តសៀមរាប ដោយមិនគិតប្រាក់

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចដាក់ឱ្យដំណើរការរថយន្តចំនួន ១០ គ្រឿង សម្រាប់ដឹកពលរដ្ឋនៅតំបន់រុនតាឯក ទៅកាន់ទីរួមខេត្តសៀមរាបទាំងទៅទាំងមក ដោយមិនគិតប្រាក់។

ក្នុងពិធីសំណេះ​សំណាលជាមួយប្រជាពលរដ្ឋរស់នៅ តំបន់១ តំបន់២ នៃរមណីយដ្ឋានអង្គរ ដែលស្ម័គ្រចិត្តមករស់នៅភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប នាថ្ងៃទី៨ ធ្នូនេះ សម្តេចធិបតី ហ៊ុន ម៉ាណែត បានគូសបញ្ជាក់ថា រថយន្តក្រុងដំណើរការរត់ពីរវេន ព្រឹកមួយវេន និងល្ងាចមួយវេន ។

សម្តេចធិបតី សង្កតធ្ងន់ថា មិនមានការយកប្រាក់ពីពលរដ្ឋឡើយ ប្រសិនបើមានករណីយកប្រាក់ពីពលរដ្ឋ អភិបាលខេត្តសៀមរាប ត្រូវទទួលខុសត្រូវ ៕