ក្រសួងកសិកម្ម រៀបចំកម្មវិធី កសិកម្ម វាលបៃតង ដើម្បីបង្ហាញពីផលិតផលកសិកម្ម

ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៨ ខែធ្នូ ឆ្នាំ២០២៣នេះ បានរៀបចំកម្មវិធី “កសិកម្ម វាលបៃតង” សម្រាប់ឆ្នាំ២០២៣ ដើម្បីបង្ហាញពីផលិតផលកសិកម្មដែលមានសក្ដានុពលរបស់កម្ពុជា នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ការរៀបចំកម្មវិធី “កសិកម្ម វាលបៃតង” នេះ រៀបចំឡើងក្រោមអធិបតីភាព ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងគោលបំណងបង្ហាញពីផលិតផលកសិកម្មដែលមានសក្ដានុពលរបស់កម្ពុជា តាមរយៈពិព័រណ៍ផលិត ផលកសិកម្មពីសហគ្រាសជាច្រើន ចាប់ពីម៉ោង ១៧:០០ល្ងាច ដល់ ២១:០០យប់ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ក្នុងកម្មវិធីនេះ ក៏មានវត្តមានភ្ញៀវកិត្តិយសជាតិ និងអន្តរជាតិ អង្គទូត និងតំណាងដៃគូអភិវឌ្ឍទាំងអស់ដែលបានចូលរួម ក៏នឹងមានឱកាសភ្លក្សម្ហូបអាហារផលិតពីផលិតផលខ្មែរដែលមានគុណភាព។

មិនត្រឹមតែប៉ុណ្ណោះ កម្មវិធីនេះ ក៏នឹងរៀបចំបង្ហាញដល់ភ្ញៀវកិត្តិយសអំពីការដាល់អំបុក ដែលជាផ្នែកមួយនៃវប្បធម៌ផ្សារភ្ជាប់នឹងវិស័យកសិកម្មដំណាំស្រូវក្រោយប្រមូលផលផងដែរ៕