អង្គការអភិរក្សអន្តរជាតិ បេ្តជ្ញាចូលរួមជាមួយក្រសួងបរិស្ថានក្នុងកិច្ចការអភិរក្សធនធានធម្មជាតិ ពិសេសលើយុទ្ធនាការ «បណ្តុះកូនឈើ ១លានដើម ក្នុង១ឆ្នាំ»

ភ្នំពេញ៖ កិច្ចប្រជុំទ្វេភាគីរវាង ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ជាមួយលោកស្រី Patricia អគ្គនាយិកាផ្នែកយុទ្ធសាស្ត្ររបស់អង្គការ CI នៅទីក្រុងឌូបៃ ប្រទេសអារ៉ាប់រួម។

ឆ្លៀតក្នុងឱកាសនៃការចូលរួមសន្និសីទ កំពូលបណ្តាភាគីលើកទី២៨ (COP-28) របស់អនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ (UNCCC) ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន តំណាងសម្តេចធិបតីបណ្ឌិតហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានដឹកនាំប្រតិភូកម្ពុជាចូលរួមប្រជុំទ្វេភាគី ជាមួយជាមួយលោកស្រី Lina Barrera អនុប្រធានជាន់ខ្ពស់ និងសហការីនៃអង្គការអភិរក្សអន្តរជាតិ នារសៀលថ្ងៃទី០៩ ខែធ្នូ ឆ្នាំ២០២៣។

ជំនួបទ្វេភាគីនេះ ធ្វើឡើងក្នុងគោលបំណងពិភាក្សាលើ ការពង្រឹង និងពង្រីកកិច្ចសហការក្នុងភាពជាដៃគូ រវាងភាគីទាំងពីរលើការអភិរក្សធនធានធម្មជាតិ ពិសេសសម្រួចនិងតម្រង់ទិសការអនុវត្តនានាឱ្យស្របនឹងយុទ្ធសាស្រ្តចក្រាវិស័យបរិស្ថានឆ្នាំ២០២៣-២០២៨។

ថ្លែងក្នុងជំនួបនោះ ឯកឧត្តមរដ្ឋមន្រ្តី បានលើកឡើងអំពីជំហររបស់កម្ពុជាក្នុងកិច្ចការអភិរក្សធនធានធម្មជាតិ តាមរយៈការដាក់ ចេញនូវយុទ្ធសាស្រ្តចក្រានិងការអនុវត្ត Article 6 តាមរយៈការនាំយកគោលនយោបាយ ដែលមានស្រាប់ ទៅអនុវត្តជាក់ស្តែង។

ជាមួយគ្នានោះ អង្គការអភិរក្សអន្តរជាតិ បានអបអរសាទរចំពោះក្រសួងបរិស្ថានលើការបង្កើតឱ្យមានយុទ្ធនាការផ្សេងៗ ពិសេស យុទ្ធនាការកាត់បន្ថយប្លាស្ទិក ក្រោមប្រធានបទ «ថ្ងៃនេះខ្ញុំមិនប្រើប្លាស្ទិកទេ»។ ទន្ទឹមនឹងនោះ ក៏បានបង្ហាញពីជំហរគាំទ្រ និងបេ្តជ្ញាចូលរួមជាមួយក្រសួងបរិស្ថានក្នុងកិច្ចការអភិរក្សធនធានធម្មជាតិ ពិសេសលើយុទ្ធនាការ «បណ្តុះកូនឈើ ១លានដើម ក្នុង១ឆ្នាំ» ជូនដល់ប្រជាពលរដ្ឋដាំ ដែលជាការងារអាទិភាពមួយក្នុងចំណោមអាទិភាពផ្សេងទៀតដែលក្រសួងបរិស្ថានបាននិងកំពុងដាក់ចេញ។

ឯកឧត្តមរដ្ឋមន្រ្តី ស្វាគមន៍ជានិច្ចនូវរាល់កិច្ចសហប្រតិបត្តិការទាំងឡាយណា ដែលស្របជាមួយនឹងយុទ្ធសាស្រ្តចក្រាវិស័យបរិស្ថាន ដែលបានបង្កើតឡើងជាប្រយោជន៍យូរអង្វែងដល់ប្រជាពលរដ្ឋ និងព្រះរាជាណាចក្រកម្ពុជា ពិសេសគឺចូលរួមជាមួយរាជរដ្ឋាភិបាលកម្ពុជាក្នុងការជំរុញអនុវត្តយុទ្ធសាស្រ្តបញ្ចកោណ-ដំណាក់កាលទី១ ដើម្បីកម្ពុជាក្លាយជាប្រទេសអព្យាក្រឹតកាបូននៅឆ្នាំ២០៥០ ៕