ឧត្តមសេនីយ៍ទោ សេង ធារិន អញ្ជើញត្រួតពិនិត្យលទ្ធផលបាញ់គ្រាប់ពិត របស់សិក្ខាកាមវគ្គពង្រឹង វរសេនាតូចលេខ៥២១ កងពលតូចថ្មើរជើងលេខ៥២

ភ្នំពេញ៖ ឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥ នៅថ្ងៃទី១៣ ខែធ្នូ ឆ្នាំ២០២៣ បានអញ្ជើញត្រួតពិនិត្យលទ្ធផលបាញ់គ្រាប់ពិតរបស់សិក្ខាកាមវគ្គពង្រឹង វរសេនាតូចលេខ៥២១ កងពលតូចថ្មើរជើងលេខ៥២ នៅទីលានបាញ់គ្រាប់ពិត ស្ថិតក្នុងភូមិសាស្ត្រតំបន់ភ្នំវាលចាប ចំណុចចុងខាងកើតទំនប់ពហុបំណងសេកសក ក្នុងភូមិគីឡូ ឃុំត្រែង ស្រុករតនមណ្ឌល ខេត្តបាត់ដំបង។

ឧត្តមសេនីយ៍ទោ សេង ធារិន បានថ្លែងការកោតសរសើរ និងវាយតម្លៃខ្ពស់ចំពោះ សិក្ខាកាមវគ្គពង្រឹង វរសេនាតូចលេខ៥២១ កងពលតូចថ្មើរជើងលេខ៥២ ដែលបានទទួលលទ្ធផលក្នុងការហ្វឹកហ្វឺនជាក់ស្ដែង ល្អ ចំនួន ២៧នាក់ បង្គួរ ចំនួន ៦០នាក់ និង មធ្យម ចំនួន ១៣នាក់។

មេបញ្ជាការរង នាយសេនាធិការ បានគូសបញ្ជាក់ថា ការងារបណ្តុះបណ្តាល គឺជាកិច្ចការអាទិភាពមួយនៃការងារកំណែទម្រង់កងទ័ព នៅក្នុងរយៈពេលប្រាំឆ្នាំ ឬដប់ឆ្នាំទៅមុខទៀត កងទ័ពយើងក៏ចង់មានលទ្ធភាព នៅក្នុងការផលិតធនធានមនុស្ស និងផលិតសម្ភារ យុទ្ធោបករណ៍ចាំបាច់មួយចំនួនបានដោយខ្លួនឯងផងដែរ។

ហើយការបើកវគ្គបណ្តុះបណ្តាលនៅពេលនេះ គឺពិតជាឆ្លើយតបទៅនឹងគោលបំណង និងសំណូមពរភារកិច្ចលើការងារហ្វឹកហ្វឺន ស្របតាមតម្រូវការចាំបាច់ ដើម្បីបំពេញភារកិច្ចស្នូលរបស់អង្គភាព ក្នុងការធានាសន្តិសុខ សុវត្ថិភាពជូនប្រមុខរាជរដ្ឋាភិបាល ក៏ដូចជា ការពារថ្នាក់ដឹកនាំជាតិ អន្តរជាតិ ក្នុងពិធីបុណ្យជាតិ ព្រមទាំងការរៀបចំព្រឹត្តិការណ៍ជាតិ អន្តរជាតិសំខាន់ៗ នៅព្រះរាជាណាចក្រកម្ពុជា។

ឧត្តមសេនីយ៍ទោ បានថ្លែងដែរថា គោលដៅសំខាន់ពីរនៃគោលនយោបាយការពារជាតិរបស់រាជរដ្ឋាភិបាល គឺការធ្វើឲ្យមានសន្តិភាព ស្ថិរភាពយូរអង្វែង និងការកសាងឱកាសសម្រាប់ការអភិវឌ្ឍន៍ជាតិ សន្តិភាព ស្ថិរភាពនយោបាយ និងការរីកចម្រើនផ្នែកសេដ្ឋកិច្ច ដែលកម្ពុជាកំពុងមានក្នុងពេលបច្ចុប្បន្ន គឺបាននិងកំពុងផ្តល់ឱកាសការកសាង និងអភិវឌ្ឍសមត្ថភាព កងយោធពលខេមរភូមិន្ទ កងកម្លាំងទាំងអស់មានការប្រុងប្រយ័ត្នក្នុងការចែករំលែករូបភាព ទីតាំង សព្វាវុធ យុទ្ធោបករណ៍ និងព័ត៌មាននានា ពាក់ព័ន្ធនឹងវិស័យការពារជាតិ និងសន្តិសុខ ធានាដល់ការរក្សាការសម្ងាត់យោធា ក្នុងនាមជាកងកម្លាំង យើងបេ្តជ្ញាការពារជាតិ សាសនា ព្រះមហាក្សត្រ ការពាររាជរដ្ឋាភិបាល បន្តគាំទ្រសម្តេចធិបតី និងបេ្តជ្ញាថែរក្សាការពារសុខសន្តិភាពឱ្យខានតែបាន។

ទន្ទឹមនឹងនេះ ភាពសុខដុមរមនាក្នុងស្មារតីឯកភាពជាតិ និងការអភិវឌ្ឍន៍រីកចម្រើនដូចសព្វថ្ងៃ ការធានាសុខសន្តិភាព ស្ថិរភាពនយោបាយ និងសណ្តាប់ធ្នាប់សាធារណៈ នៅតែជាបញ្ហាប្រឈមដ៏សំខាន់ ដែលត្រូវបន្តយកចិត្តទុកដាក់ តួនាទីភារកិច្ច និងកាតព្វកិច្ច របស់កងទ័ព មិនថានៅសម័យណានោះទេ គឺត្រូវតែស្មោះត្រង់ចំពោះ ជាតិ សាសនា ព្រះមហាក្សត្រ ការពាររាជរដ្ឋាភិបាល ការពារទឹកដី និងរក្សាសន្តិភាពជូនមាតុភូមិ និងប្រជាជន៕