បារាំង នឹងបន្ថែមកិច្ចប្រតិបត្តិការជាមួយកម្ពុជា ដើម្បីរៀបចំវគ្គសិក្សាដល់ មជ្ឈមណ្ឌលជាតិរក្សាសន្តិភាព ឱ្យក្លាយជាវិទ្យាស្ថានបណ្តុះបណ្តាលគំរូ ក្នុងតំបន់និងអាស៊ាន

ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព នាថ្ងៃទី១៣ ខែធ្នូ ឆ្នាំ២០២៣ បានអញ្ជើញជួបសវនាការ និងពិភាក្សាការងារជាមួយ ឯកឧត្តម នាយឧត្តមសេនីយ៍ឯក COLCOMBET Régis នាយក នាយកដ្ឋានសហប្រតិបត្តិការ សន្តិសុខ និងការពារជាតិ ក្រសួងកិច្ចការអឺរ៉ុប និងការបរទេស នៃសាធារណរដ្ឋបារាំង។

ឯកឧត្តម នាយឧត្តមសេនីយ៍ សែម សុវណ្ណនី បានទទួលស្វាគមន៍យ៉ាងកក់ក្តៅចំពោះវត្តមានមកដល់របស់ប្រតិភូនៃសាធារណរដ្ឋបារាំង។ តាមរយៈកិច្ចសហប្រតិបត្តិការល្អ រវាងប្រទេសទាំងពីរ បារាំង បានផ្តល់ការបណ្តុះបណ្តាលទាំងក្នុង និងក្រៅប្រទេស លើផ្នែករក្សាសន្តិភាព នាយទាហានសេនាធិការ សង្កេតការណ៍យោធា ។ល។ មកដល់ពេលនេះបានចំនួន៨៤វគ្គ ហើយសិក្ខាកាមទាំងអស់សុទ្ធតែបានចេញបំពេញបេសកកម្ម ក្រោមឆ័ត្រអង្គការសហប្រជាជាតិ។

ឯកឧត្តម នាយឧត្តមសេនីយ៍ បានបន្ថែមថា ក្រោមកិច្ចខិតប្រឹងប្រែងសហការគ្នាជាមួយទីប្រឹក្សាបារាំងប្រចាំមជ្ឈមណ្ឌលជាតិរក្សាសន្តិភាព យើងកំពុងរៀបចំយុទ្ធសាសន៍បង្កើនថ្នាក់សិក្សាភាសាបារាំងឱ្យបានច្រើន ដើម្បីជំរុញសិក្ខាកាមពេលរៀនចប់ទៅកាន់តំបន់បេសកកម្ម។

ទន្ទឹមនោះ ឯកឧត្តម នាយឧត្តមសេនីយ៍ សែម សុវណ្ណនី បានសំណូមពរដល់ភាគីបារាំង បន្តជួយជ្រោមជ្រែងដល់កងយោធពលខេមរភូមិន្ទ ជាពិសេសផ្នែកបណ្តុះបណ្តាលធនធានមនុស្ស និងបង្កើនកម្រិតវគ្គហ្វឹកហ្វឺនជាលក្ខណៈត្រីភាគីផងដែរ។ ជាមួយគ្នានោះ ឯកឧត្តម ក៏ស្នើរដល់ភាគីបារាំងផ្តល់សម្ភារៈសិក្សា ដើម្បីបំពាក់នៅអាគារសិក្សាថ្មី ដែលនឹងបញ្ចប់ការសាងសង់នាពេលខាងមុខនេះ។

ឯកឧត្តម នាយឧត្តមសេនីយ៍ឯក COLCOMBET Régis បានថ្លែងអំណរគុណយ៉ាងជ្រាលជ្រៅចំពោះការទទួលស្វាគមន៍ប្រកបដោយកិត្តិយស និងកក់ក្តៅជាទីបំផុត។ ឯកឧត្តម បានទទួលយកសំណើររបស់ ឯកឧត្តមអគ្គនាយកដោយរីករាយ និងបានលើកឡើងថា បារាំងនឹងបន្ថែមកិច្ចសហប្រតិបត្តិការបន្ថែមទៀត ដើម្បីរៀបចំវគ្គសិក្សាដល់មជ្ឈមណ្ឌលជាតិរក្សាសន្តិភាពឱ្យក្លាយជាវិទ្យាស្ថានបណ្តុះបណ្តាលគំរូក្នុងតំបន់និងអាស៊ាន។

ឯកឧត្តម នាយឧត្តមសេនីយ៍ ក៏បានសំណូមពរដល់កម្ពុជា ក្នុងការបង្កើនកិច្ចសហប្រតិបត្តិការបន្តទៀត ដើម្បីពង្រឹកទំនាក់ទំនងរវាងប្រទេសទាំងពីរឱ្យកាន់ល្អប្រសើរបន្ថែមទៀត ៕